Bakı, 7 may, AZƏRTAC 

Mayın 7-də Azərbaycan Sosial Rifah Partiyasının və Avrasiya Qiymətləndiricilər Birlikləri Şurası Beynəlxalq Assosiasiyasının birgə təşkilatçılığı ilə Bakıda Avrasiya Qiymətləndiricilərinin XV Beynəlxalq Konqresi və "Böyük siyasətin davamı" kitabının yeni nəşr olunmuş 8-ci cildinin təqdimat mərasimi keçirilib.

AZƏRTAC xəbər verir ki, ulu öndər Heydər Əliyevin xatirəsinə həsr olunmuş tədbirdə Azərbaycanla yanaşı, Moldova, Özbəkistan, Rusiya, Gürcüstan, Belarusdan qonaqlar iştirak ediblər.

AZƏRTAC xəbər verir ki, əvvəlcə tədbir iştirakçıları Fəxri xiyabanda ulu öndər Heydər Əliyevin məzarını ziyarət ediblər. Ümummilli Liderin məzarı önünə əklil və güllər qoyulub, əziz xatirəsi ehtiramla yad edilib.

Azərbaycan Qiymətləndiricilər Cəmiyyətinin sədr müavini Vüqar Oruc bu tədbirin Avrasiya qiymətləndiricilərinin əməkdaşlığında, təcrübə mübadiləsində, qarşılıqlı əlaqələrin daha da inkişaf etdirilməsində mühüm rol oynayacağını bildirib. O deyib ki, konqresdə iştirak edən qurumlarla birgə layihələrin işlənilməsi və digər istiqamətlərdə razılaşmaların əldə olunacağı gözlənilir.

Konqresdə Azərbaycan torpaqlarının 20 faizinin Ermənistan tərəfindən işğal olunması, hərbi təcavüz nəticəsində ölkəmizin üzləşdiyi problemlərlə bağlı qonaqlara məlumat verilib.

Konqresə sədrlik edən Azərbaycan Qiymətləndiricilər Cəmiyyətinin fəxri sədri, Milli Məclisin deputatı Xanhüseyn Kazımlı ulu öndər Heydər Əliyevin xalqımız və dövlətimiz qarşısındakı misilsiz xidmətlərindən danışıb. O deyib ki, Azərbaycanın ictimai-siyasi, iqtisadi və mədəni həyatının bütün sahələrində dirçəliş məhz Heydər Əliyevin adı ilə bağlıdır. Ümummilli lider Heydər Əliyevin rəhbərliyi ilə ölkəmiz zamanın ağır və sərt sınaqlarından çıxıb, böyük inkişaf yoluna qədəm qoyub.

Ulu Öndərin layiqli davamçısı Prezident İlham Əliyevin apardığı müdrik siyasət nəticəsində ölkəmizin uğurları daha da artıb. Dövlətimizin başçısının həyata keçirdiyi siyasət əhalinin rifah halını yaxşılaşdırıb. Bütün istiqamətlərdə yüksək nailiyyətlər əldə edilib və Azərbaycan hazırda regionun lider dövləti statusundadır.

Avrasiya Qiymətləndiricilər Birlikləri Şurası Beynəlxalq Assosiasiyasının baş direktoru Nikolay Trifonov konqresin işinə uğurlar arzulayıb.

Konqresdə Avrasiya Qiymətləndiricilər Birlikləri Şurası Beynəlxalq Assosiasiyasının və Təftiş Komissiyasının hesabatı, eləcə də yerli və xarici mütəxəssislərin bir sıra məsələlərə həsr olunmuş çıxışları dinlənilib.

Avrasiya Qiymətləndiricilər Birlikləri Şurası Beynəlxalq Assosiasiyasına rəhbərlik Azərbaycanda qalıb və Xanhüseyn Kazımlı qiymətçi olaraq həmin təşkilatın sədri seçilib.

Sonra professor Xanhüseyn Kazımlı və Azərbaycan Dövlət İqtisad Universitetinin müəllimi, iqtisadiyyat üzrə fəlsəfə doktoru Əsli Kazımovanın birgə hazırladıqları “Böyük siyasətin davamı” kitabının 8-ci cildinin təqdimatı olub. Kitabda Prezident İlham Əliyevin həyata keçirdiyi daxili və xarici siyasətin uğurlu nəticələri öz əksini tapıb.

Kitabın redaktoru Prezidentin ictimai-siyasi məsələlər üzrə köməkçisi, professor Əli Həsənov, rəyçisi Milli Məclisin deputatı, Xalq yazıçısı Elmira Axundovadır. Səkkizinci cildə yazılmış ön sözün müəllifi Azərbaycan Milli Elmlər Akademiyasının vitse-prezidenti, Milli Məclisin elm və təhsil komitəsinin sədri, akademik İsa Həbibbəylidir.