İQTİSADİYYAT


Bakıda Davamlı İnkişaf Məqsədlərinə dair konfrans təşkil olunacaq YENİLƏNİB VİDEO

Bakı, 14 fevral, AZƏRTAC

Sentyabrda Bakıda Davamlı İnkişaf Məqsədləri (DİM) üzrə konfrans təşkil ediləcək.

AZƏRTAC xəbər verir ki, bu barədə fevralın 14-də BMT-nin İnkişaf Proqramının (BMTİP) təşkilatçılığı ilə keçirilən “İnteqrasiya, sürətləndirmə və siyasətə dəstək” (MAPS) hesabatı üzrə məsləhətləşmə seminarında BMT-nin Azərbaycandakı rezident əlaqələndiricisi və təşkilatın İnkişaf Proqramının rezident nümayəndəsi Qulam İshaqzai deyib.

“Azərbaycan BMT-nin Dayanıqlı İnkişaf Məqsədləri üzrə qlobal təşəbbüsünə fəal qoşulub və ötən müddətdə bu sahədə mühüm işlər görüb. Azərbaycan öz Könüllü Milli Hesabatını BMT-nin Yüksək Səviyyəli Siyasi Forumuna təqdim edən ilk ölkələrdən biridir. Ötən dövrdə Dayanıqlı İnkişaf Məqsədlərinə dair müxtəlif müzakirələr aparılıb. Azərbaycan hökuməti bununla bağlı bir sıra tədbirlər görüb. Dayanıqlı İnkişaf Məqsədləri mühüm bir platformadır. Biz bu platformanı genişləndirməkdə maraqlıyıq ki, irəliyə doğru gedək. Sentyabrda Azərbaycanda Dayanıqlı İnkişaf Məqsədləri üzrə konfrans keçiriləcək”, - deyə o bildirib.

Ölkəmizin DİM-lərin həyata keçirilməsində göstərdiyi diqqətəlayiq fədakarlığını vurğulayan Q.İshaqzai qeyd edib ki, Azərbaycan regionda Davamlı İnkişaf Məqsədlərinin təşviqində qabaqcıl öndərlərdən biridir. O bildirib ki, bu sahədə BMT sisteminin bacarıqları, texniki ekspertizası və lazım olan hər hansı dəstəyinin effektiv bir şəkildə və vaxtında çatdırılmasını təmin etmək üçün BMT Azərbaycan hökuməti, özəl sektor, media və vətəndaş cəmiyyəti ilə işləməyə davam edəcək.

Dayanıqlı İnkişaf Məqsədlərinin önəmindən danışan Azərbaycanın iqtisadiyyat nazirinin müavini Sevinc Həsənova qeyd edib ki, Azərbaycan BMT-nin yeni təşəbbüsünə də qoşulub. “Dayanıqlı İnkişaf Məqsədlərinin milli səviyyədə inteqrasiyası və onların sürətləndirilməsinə dair “Bakı prinsipləri” layihəsinin bu ilin sentyabr ayında Bakıda keçiriləcək konfransda qəbul edilməsi gözlənilir: “Ölkəmiz “Bakı prinsipləri”nin qəbulunda maraqlıdır. Biz bu barədə müzakirələr aparmışıq və qərara alınıb ki, “Bakı prinsipləri” qəbul olunsun. Bundan sonra dünyada qəbul edilən daha təkmil sənədin qəbuluna nail olacağıq”.

“Ölkədə yoxsulluq səviyyəsi dəfələrlə azalıb. Azərbaycan çox az ölkələrdəndir ki, yoxsulluğun 10 dəfə azalmasına nail olub. Burada ölkə başçısının rəhbərliyi ilə həyata keçirilən sosial-iqtisadi siyasət öz rolunu oynayıb”, - deyə nazir müavini əlavə edib.

BMTİP-in Avropa və MDB ölkələri üzrə Regional Bürosunun direktor müavini və BMTİP-in İstanbul Regional Mərkəzinin rəhbəri Rastislav Vrbensky qeyd edib ki, indiyədək MAPS missiyaları 20-dən çox ölkədə keçirilib və bu il əlavə 20 missiyanın keçiriləcəyi planlaşdırılır. O bildirib ki, Azərbaycanda DİM-lərə dair hazırlanmış MAPS hesabatının təhlili və hesabatdan irəli gələn təkliflər toplusu yalnız Azərbaycan üçün deyil, hazırda bu platformanı DİM-lərin milli səviyyədə tətbiqini sürətləndirmək üçün istifadə edən digər ölkələr üçün də böyük əhəmiyyət kəsb edir.

Seminarda Azərbaycanın müxtəlif dövlət qurumlarının nümayəndələri iştirak edib. BMT-nin agentlikləri tərəfindən keçirilən məsləhətləşmə seminarında Davamlı İnkişaf Məqsədlərinin Azərbaycanda milli inkişaf planlarına inteqrasiya olmasının yolları müzakirə olunub. Əlliyə yaxın hökumət rəsmisi, BMT təşkilatları və özəl sektorun nümayəndələrinin bir araya gəldiyi seminar 2017-ci ilin may-iyun aylarında Azərbaycanda başlayan strateji siyasətin dəstəklənməsi missiyasının davamıdır.

Bildirilib ki, hökumət və bir sıra ekspert qrupları ilə aparılan məsləhətləşmələrə əsaslanaraq, missiya Azərbaycanda Dayanıqlı İnkişaf Məqsədlərinin milli səviyyədə tətbiqi prosesini sürətləndirmək üçün bir sıra qabaqcıl siyasət və proqramlaşdırma addımlarını əks etdirən DİM sahəsində “İnteqrasiya, sürətləndirmə və siyasətə dəstək” adlı hesabat hazırlayıb. Ötən ilin noyabr ayında hökumətə təqdim edilən bu hesabat bugünkü seminarda əsas diqqət mərkəzində olub.

MAPS Dayanıqlı İnkişaf Məqsədlərinin yerinə yetirilməsini sürətləndirmək istiqamətində milli potensialları dəstəkləmək üçün tətbiq olunan və dünya səviyyəsində tanınmış qlobal bir yanaşmadır. MAPS yanaşması konseptual olaraq tərəfdaşlıq şəbəkələri, hesabatlılıq, maliyyələşdirilmə və etibarlı məlumat bazasının yaradılmasının vacibliyini inkişaf siyasətinin ön cərgələrinə qoyur.

Seminar Birləşmiş Millətlər Təşkilatının İnkişaf Proqramının Azərbaycan Respublikasının Dayanıqlı İnkişaf üzrə Milli Əlaqələndirmə Şurası ilə birgə icra etdiyi “Dayanıqlı İnkişaf Məqsədlərinin lokallaşdırılmasına dəstək və milli inkişaf planlarının DİM-lərə uyğunlaşdırılması” layihəsi çərçivəsində həyata keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.