CƏMİYYƏT
Bakıda “Hərbi vətənpərvərlik: Silahlı Qüvvələrimiz və milli-mənəvi dəyərlərimiz” adlı konfrans keçirilib
Bakı, 22 iyun, Pərvanə Rəhimova, AZƏRTAC
İyunun 22-də Bakıda Dini Qurumlarla İş üzrə Dövlət Komitəsinin təşkilatçılığı ilə “Hərbi vətənpərvərlik: Silahlı Qüvvələrimiz və milli-mənəvi dəyərlərimiz” adlı konfrans keçirilib.
AZƏRTAC xəbər verir ki, Azərbaycan Silahlı Qüvvələrinin 100 illiyinə həsr olunan konfransda Dövlət Komitəsinin rəhbər şəxsləri, Azərbaycan Respublikası Silahlı Qüvvələrinin nümayəndələri, ölkəmizdə fəaliyyət göstərən dini konfessiyaların təmsilçiləri, eləcə də gənclər iştirak ediblər.
Azərbaycanın dövlət himni səsləndirildikdən sonra Vətən uğrunda canlarından keçən şəhidlərimizin xatirəsi bir dəqiqəlik sükutla yad edilib.
Dini Qurumlarla İş üzrə Dövlət Komitəsinin sədr müavini Səyavuş Heydərov çıxış edərək konfransın gənclər arasında hərbi vətənpərvərliyin təbliği baxımından önəmini vurğulayıb. Sədr müavini vətənpərvərliyin gücləndirilməsində milli-mənəvi dəyərlərin özünəməxsus rolu olduğunu deyib. Ordumuzdakı mənəvi, psixoloji duruma da toxunan S.Heydərov qeyd edib ki, indiki dövrdə vətənpərvərlik hissinin yüksəlməsinə böyük ehtiyac var.
Qurum rəsmisi DQİDK-nın bu istiqamətdə müvafiq dövlət orqanları ilə sıx əməkdaşlıq etdiyini, ölkədəki bütün hərbi hissələrdə maarifləndirici tədbirlərin keçirildiyini bildirib. S.Heydərov vurğulayıb ki, bu gün Azərbaycan Ordusu dünyanda hərbi-texnika ilə təchiz olunan güclü ordu kimi dəyərləndirilir. Hərb tariximizə şanlı hərflərlə yazılan Aprel döyüşlərindən sonra Ordumuzun əldə etdiyi uğurlar, o cümlədən Naxçıvanın işğal olunmuş ərazilərinin azad edilməsi bir daha Azərbaycan Silahlı Qüvvələrinin gücünü göstərib.
Komitə sədrinin müavini hərbçiləri DQİDK-nın sifarişi əsasında vətənpərvərlik mövzusunda çəkilən “Şəhadət” sənədli filmi barədə də məlumatlandırıb. Bildirib ki, filmə baxarkən Vətən uğrunda şəhid olmuş fədakar, qəhrəman hərbi qulluqçularımız bizi qürurlandırır. Yad dini ideologiyaların təsirinə məruz qalmış, ailələrinə faciələr yaşatmış gəncləri gördükdə isə təəssüf hissi keçiririk. Filmdə hərbçilərimizin qəhrəmanlıqları və fədakarlıqları gənclərimiz üçün bir nümunədir. S.Heydərov vurğulayıb ki, filmdə bəhs edilən Aprel döyüşləri ölkəmizdə həmrəyliyi, birliyi və vətənpərvərliyi daha da gücləndirib. Bu döyüşlər göstərib ki, Azərbaycan xalqı bir qarış torpağını belə heç kimə güzəştə getməyəcək.
Sədr müavini şəhidlik zirvəsinin müqəddəsliyinə də toxunaraq deyib: “Şəhidlik təbii ki, müzakirə mövzusudur. Bəzən gedib hansısa xarici ölkədə, xarici münaqişədə din adı altında döyüşlərdə ölənləri də şəhid adlandırırlar. Bu, yanlışdır. Şəhidliyi öz ordusunda öz vətəni, dövlətinin suverenliyi və təhlükəsizliyi uğrunda həyatlarını qurban verənlər qazanırlar. Vətənpərvərlik hissi zəif olan insanlar yad dini ideologiyaların təsirinə məruz qalırlar və cəmiyyət üçün təhlükəli şəxslərə çevrilirlər. Ölkəmizdə formalaşmış milli-mənəvi dəyərlər, xüsusilə tolerantlıq və multikultural ənənələr, dünyəvilik və azərbaycançılıq prinsipləri bu modelin tərkib hissəsidir. Bütün bunlar özlüyündə bizim milli-dini modelimizi formalaşdırır. Azərbaycanın multikulturalizm və tolerantlıq modeli bütün dünyaya nümunədir. Azərbaycan Prezidenti İlham Əliyevin seçkilərdən sonra iştirak etdiyi ilk tədbir Hacı Cavad Məscidinin açılışı oldu. Bu isə dövlətimizin başçısının milli-mənəvi dəyərlərimizə verdiyi önəmin göstəricisidir”.
Sonra “Şəhadət” sənədli filmi nümayiş olunub.
Qafqaz Müsəlmanları İdarəsinin nümayəndəsi Rəşad Əliyarlı “Şəhadət” filminin ərsəyə gəlməsində əməyi olan hər kəsə və tədbirin təşkilinə görə Dini Qurumlarla İş üzrə Dövlət Komitəsinə təşəkkürünü bildirib. Bildirib ki, gənclərin vətənpərvərlik ruhunda tərbiyəsinə töhfə olan, eləcə də dini fanatizm, radikalizm və ekstremizm meyillərinə qarşı preventiv xarakter daşıyan “Şəhadət” filmini hər bir azərbaycanlı izləməlidir. O konfransın mövzusunun önəmli hadisəyə həsr edildiyini deyərək milli ordunun, təhlükəsizlik strukturlarının qurulmasının Xalq Cümhuriyyəti hökumətinin yürütdüyü siyasətin miqyasını, mahiyyət və mənasını əyani şəkildə səciyyələndirdiyini deyib.
Sonra Qafqaz Müsəlmanları İdarəsinin Qazilər Şurasının üzvü, İlahiyyat məscidinin imamı Ceyhun Rüstəmovun “İslamda şəhidlik”, Mənəvi Dəyərlərin Təbliği Fondunun icraçı direktorunun müavini Ceyhun Əliyevin “Hərbi vətənpərvərliyin gücləndirilməsində milli-mənəvi dəyərlərimizin rolu” adlı məruzələri dinlənilib.
Tədbirdə çıxış edən Bakı şəhəri Dağ Yəhudiləri Dini İcmasının sədri Milix Yevdayev şəhidlik zirvəsinin ucalığından bəhs edib. O, ötən gün Bakıda Azərbaycanın Milli Qəhrəmanı, tankçı Albert Aqarunovun xatirəsinə həsr olunmuş beynəlxalq karate turnirinin bütün şəhidlərimizin şərəfinə keçirildiyini, milli qəhrəmanlarımızın daim qəlbimizdə yaşayacaqlarını bildirib.
Rus-Pravoslav Kilsəsinin Bakı və Azərbaycan Yeparxiyasının nümayəndəsi Konstantin Pominov xalqımızı Azərbaycan Xalq Cümhuriyyətinin və Azərbaycan Ordusunun yaranmasının 100 illiyi münasibətilə təbrik edib. Vurğulayıb ki, bu gün Azərbaycan Ordusunun çox güclü olduğunu beynəlxalq ekspertlər də təsdiqləyiblər. O, bunun davamlı olmağını arzu edib.
Müdafiə Nazirliyinin nümayəndəsi Aydın Əyyubov Ordumuzun 100 illiyi barədə məruzə ilə çıxış edib. O, gənc nəslin hərbi-vətənpərvərlik mövzusunda tərbiyəsinin vacibliyini diqqətə çatdıraraq deyib: “Vətənpərvərlik fədakarlıq deməkdir. Müasir Azərbaycanın banisi ulu öndər Heydər Əliyevin qurduğu dövlət indi güclü orduya və güclü iqtisadiyyata əsaslanır. Bu gün müstəqilliyimizin, dövlətçiliyimizin təməli ulu öndər Heydər Əliyev tərəfindən qoyulan Milli Ordumuzdur. İnkişaf və tərəqqisinin yeni mərhələsinə qədəm qoyan nizami ordumuz regionda ən güclü orduya və xalqın güvənc yerinə çevrilib. Ümummilli Liderin ordu quruculuğu sahəsində müəyyənləşdirdiyi siyasətin Prezident İlham Əliyev tərəfindən uğurla davam etdirilməsi Ordumuzun qüdrətini gündən-günə artırır. Azərbaycan qüdrətli ordunun hesabına itirilmiş torpaqları ilə yanaşı, tarixi torpaqlarını da geri qaytaracaq. Zəngin hərbi tarixə malik Azərbaycan xalqı öz Silahlı Qüvvələrinin əzm və qüdrətinə arxalanaraq dövlət quruculuğu yollarında daha inamla addımlayacaq və yeni zəfərlər qazanacaq”.
Tədbir hərbi vətənpərvərliyin gücləndirilməsində milli-mənəvi dəyərlərimizin rolu, bu sahədə görülən işlər və qarşıda duran məsələlərin müzakirəsi ilə işini yekunlaşdırıb.