İQTİSADİYYAT
Bakıda III Milli Mühasiblər Forumu keçirilib YENİLƏNİB
Bakı, 12 iyun, AZƏRTAC
İyunun 12-də Bakıda III Milli Mühasiblər Forumu keçirilib.
AZƏRTAC xəbər verir ki, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev ənənəvi keçirilən forumun əhəmiyyətindən danışıb. Bildirib ki, məqsəd Azərbaycanda mühasibat uçotunun inkişafı, mühasibat uçotu və vergi qanunvericiliyi sahəsində baş verən dəyişikliklər ətrafında müzakirələrin təşkili, bu sferada islahatların dərinləşməsinə yönəlmiş təkliflərin toplanması və beynəlxalq təcrübə üzrə məlumatlılığın artırılmasıdır. Sahibkarların maliyyə savadlığının artırılmasına önəm verən Azərbaycan Sahibkarlar Konfederasiyası bu istiqamətdə daim iş aparır. Konfederasiya dövlət-özəl sektor əməkdaşlığı vasitəsilə respublikamızda daha əlverişli biznes mühitinin yaradılması prosesində və dayanıqlı inkişafın təmin olunmasında fəal iştirak edir.
“Ümid edirəm ki, forum iştirakçıları mühasibat uçotu sahəsində milli yanaşmalar, maliyyə hesabatının beynəlxalq standartlarının tətbiqi, rəqəmsal mühasibat uçotu, Azərbaycan reallığında auditin təşkili problemləri, mühasibat uçotu sahəsində qanunvericilikdə edilmiş dəyişikliklər, vergi qanunvericiliyi və inzibatçılığı sahəsində aparılan islahatlar, kommersiya qurumlarında mühasibat uçotu proqramları təminatında müasir çağırışlar, bu sahədə sertifikasiyanın rolu və bir çox aktual mövzularda ətraflı məlumat əldə edəcəklər”, - deyə M.Musayev qeyd edib.
Vergilər nazirinin müşaviri Xəqani Abdullayev deyib ki, yanvarın 1-dən bir neçə istiqamətdə vergi islahatları həyata keçirilməyə başlayıb. Əsas hədəflərimiz kölgə iqtisadiyyatının həcmini azaltmaq, maksimum şəffaflığa nail olmaq, vergi güzəştlərinin iqtisadi səmərəsini artırmaq, vergi bazasını genişləndirmək, vergi inzibatçılığını ən müasir standartlara uyğun qurmaq, vergiödəyicilərinin hüquqlarını qorumaq, eyni zamanda, sahibkarlığın inkişafına vergi stimulları vasitəsilə maksimum dəstək verməkdir. Məqsədimiz bu islahatların effektivliyini qiymətləndirməkdir.
İlin ilk 4 ayında vergi daxilolmalarının ötən ilin eyni dövrü ilə müqayisədə 9 faizdən çox artdığını deyən X.Abdullayev qeyd edib ki, vergi proqnozu 111,7 faiz icra olunub. Müsbət meyllərdən biri odur ki, qeyri-neft qaz sektorundan daxilolmalarda 18 faizdən çox artım qeydə alınıb, 116 faiz proqnoz icra olunub. Vergi daxilolmalarında artım tempi qeyri-neft sektorundakı ÜDM-in nominal artım tempini 2 dəfədən çox üstələyib. Dörd ayda vergi daxilolmalarında qeyri-neft qaz sektorunun xüsusi çəkisi ötən ilin müvafiq dövrü ilə müqayisədə 62 faizdən 67 faizə yüksəlib. Müsbət trendlərdən biri də qeyri-neft qaz sektorunun özəl bölməsindən vergi daxilolmalarının 22 faizdən çox artmasıdır. Eyni zamanda, birinci rübdə ölkədə muzdla işləyənlərin sayı 114 mindən çox olub. Artımın 97 mini qeyri-neft sektorunun payına düşüb. Qeyri-neft sektorunda əməkhaqqı fondu 19 faizdən çox artıb.
Maliyyə Nazirliyinin Uçot siyasəti şöbəsinin müdiri Firuzə Abdullayeva mühasiblərin peşəkarlığının inkişaf etdirilməsi istiqamətində görülən işlərdən danışıb. Diqqətə çatdırıb ki, dövlətimizin başçısının rəhbərliyi ilə həyata keçirilən uğurlu iqtisadi siyasət mövcud iqtisadi potensialdan səmərəli istifadə imkanlarının genişləndirilməsinə şərait yaradıb. Hazırda milli iqtisadiyyatların beynəlxalq səviyyədə inteqrasiya olunması şəraitində bazar münasibətlərini əks etdirən informasiyaların müəyyən edilmiş vahid qaydada uçota alınması və istifadəçilərə daha anlaşılan şəkildə çatdırılması zəruri məsələlərdəndir. İslahatların aparılması “Mühasibat uçotu haqqında” Azərbaycan Respublikası Qanunun qəbul edilməsi ilə ölkədə mühasibat uçotu standartlarının tətbiqinə başlanılıb, təşkilatlar tərəfindən həmin hesabatlara uyğun maliyyə hesabatlarının tərtib edilməsi prosesi həyata keçirilib. Mühasibat uçotu iqtisadiyyatın inkişafında mühüm amil olduğu üçün daim inkişaf edir, bu sahədə müvafiq islahatlar aparılır.
Digər çıxış edənlər dünya təcrübəsində mühasibat uçotunun təşkili və müasir çağırışlar barəsində təqdimatlarla çıxış ediblər.
Forumda “Mühasibat uçotu sahəsində müasir çağırışlar: milli yanaşmalar və beynəlxalq standartlar paradiqması”, “İrəliyə addım: rəqəmsal mühasibat uçotu və Azərbaycan reallığında auditin təşkili problemləri” və “Qanunvericilikdə edilmiş dəyişikliklərin mühasibat uçotuna təsirləri” mövzularında panel iclaslar keçirilib.
Tədbirdə Vergilər, Əmək və Əhalinin Sosial Müdafiəsi, İqtisadiyyat nazirliklərinin rəhbər vəzifəli şəxsləri, o cümlədən 200-dək müxtəlif yerli və xarici şirkətin maliyyə meneceri, baş mühasibləri və mühasibləri iştirak ediblər.
Forum çərçivəsində təşkil edilən sərgidə şirkətlər, universitetlər, nəşriyyat və kitab mağazaları öz məhsullarını təqdim ediblər. Ziyarətçilər üçün maraqlı olan qida məhsulları, meyvə şirələri, mineral sular, məişət mebelləri, mühasibat uçotu üzrə ali təhsil, təlim, beynəlxalq sertifikat proqramları, Azərbaycan, türk, rus, ingilis dillərində yerli və beynəlxalq ədəbiyyatlar sərginin əsas bölmələrini təşkil edib.