Bakı, 24 dekabr, AZƏRTAC

Dekabrın 24-də Bakıda Yeni Azərbaycan Partiyasının (YAP) təşkilatçılığı ilə “Möhtəşəm quruculuq. Dünən, bu gün, sabah” mövzusunda konfrans keçirilib.

AZƏRTAC xəbər verir ki, konfransda dövlət və hökumət rəsmiləri, Milli Məclisin deputatları, Yeni Azərbaycan Partiyasının üzvləri, ictimaiyyət nümayəndələri iştirak ediblər.

Baş nazirin müavini, Yeni Azərbaycan Partiyasının sədr müavini-icra katibi Əli Əhmədov konfransda çıxış edərək ölkəmizin inkişafının ulu öndər Heydər Əliyevin müəyyənləşdirdiyi siyasi kursun Prezident İlham Əliyev tərəfindən uğurla davam etdirilməsi ilə bağlı olduğunu qeyd edib. Vurğulayıb ki, Bakı şəhərinin əsaslı surətdə yenilənməsi buna bariz nümunədir. Lakin bu inkişaf təkcə Bakı ilə məhdudlaşmır, bütün bölgələrimizi əhatə edir. Bu əhəmiyyətli dəyişikliklərin müəllifi olan Prezident İlham Əliyevin rəhbərliyi ilə bütün sahələrdə quruculuq işləri aparılır. Son 15 il Azərbaycanın xüsusi qürur doğuran səhifəsini təşkil edir. Bu illər ərzində Azərbaycanda bütün sahələr yenilənib, müasirləşib. Ən başlıcası, insanlarımızın həyat səviyyəsi dəyişib, əhalinin güzəranı daha da yaxşılaşıb.

Əli Əhmədov qeyd edib ki, ölkədə son 15 ildə baş verən möhtəşəm inkişaf bütün sahələri əhatə edib. Qürur hissi ilə qeyd ediləcək məqamlardan biri də həyatımızın bütün sahələrinin yeni, modern əsaslarla qurulmasıdır. Bu gün biz Azərbaycanın ən parlaq dövrünü yaşayırıq.

Baş nazirin müavini bildirib ki, son 15 il ərzində aparılan quruculuq işlərinin nəticəsi olaraq, Azərbaycanın hər bir guşəsi tanınmaz dərəcədə dəyişib. Bakının müasir siması, infrastrukturunun tamamilə yenilənməsi bu nailiyyətlərin mühüm tərkib hissəsidir. Azərbaycanın bütün bölgələrində möhtəşəm quruculuq işləri bu gün də davam etdirilir.

İqtisadiyyat naziri Şahin Mustafayev çıxışında deyib ki, yaradılmasının 26-cı ildönümünü şərəflə qeyd edən Yeni Azərbaycan Partiyası ideyalarını uğurla yaşatdığı Ümummilli Liderimizin siyasi və ideoloji irsinin, Azərbaycan Respublikasının Prezidenti, Yeni Azərbaycan Partiyasının sədri İlham Əliyevin düşünülmüş, praqmatik və çevik siyasətinin harmoniyasıdır.

2003-cü ildə Azərbaycanı qüdrətli dövlətə çevirəcəyini bəyan edən Prezident İlham Əliyevin apardığı siyasət nəticəsində respublikamız regionun siyasi-iqtisadi və mədəni mərkəzi, qlobal enerji və nəqliyyat layihələrinin təşəbbüskarı və fəal iştirakçısı, dünya miqyasında mühüm enerji təminatçılarından biri, mötəbər beynəlxalq tədbirlərə uğurla ev sahibliyi edən ölkə kimi tanınıb, kosmos dövlətləri ailəsinə qoşulub, 2011-ci ildə 155 ölkənin dəstəyini qazanaraq BMT-nin Təhlükəsizlik Şurasının qeyri-daimi üzvü seçilib.

Azərbaycanın yüksək inkişaf tempi və möhkəm dayanıqlılıq nümayış etdirdiyini vurğulayan Şahin Mustafayev bildirib ki, 2004-2017-ci illərdə ÜDM real ifadədə 3,2 dəfə, o cümlədən qeyri-neft sektoru 2,8 dəfə, sənaye istehsalı 2,6 dəfə, qeyri-neft sənayesi 2,2 dəfə, əsas kapitala yönəldilmiş vəsaitlər 3 dəfə, dövlət büdcəsinin gəlirləri 13,5 dəfə artıb. Ölkənin strateji valyuta ehtiyatları 28 dəfə artaraq 45 milyard ABŞ dollarını ötüb. Həyata keçirilən sistemli tədbirlər nəticəsində ötən il kənd təsərrüfatı və emalı məhsullarının ixracı 28,6 faiz, bu ilin 11 ayında isə 11,8 faiz artıb. Son 15 ildə 2 milyondan çox iş yeri yaradılıb ki, bunun da 75 faizi regionların payına düşür.

Bakı Şəhər İcra Hakimiyyətinin başçısı Eldar Əzizov son 15 il ərzində Bakıda aparılan genişmiqyaslı quruculuq işləri barədə danışıb. Qeyd edib ki, paytaxtımız simasını tamamilə dəyişərək, dünyanın ən gözəl şəhərlərindən birinə çevrilib. Prezident İlham Əliyevin təşəbbüskarı olduğu layihələr nəticəsində Bakı, həmçinin investorlar üçün cəlbedici məkan kimi tanınır. Son bir ildə paytaxtımıza 12 milyard manat investisiya qoyulub. 2005-ci ildən indiyədək Bakıda sənaye istehsalı 4 dəfə artıb. Bakı 5 ulduzlu otellərin sayına görə postsovet məkanında ilk yerlərdə qərarlaşıb. Təkcə bu il Bakıya 2 milyondan çox turist gəlib.

İcra hakimiyyətinin başçısı xatırladıb ki, beynəlxalq agentliklərin reytinqinə görə, Bakı turistlər üçün memarlıq abidələri ilə yadda qalan 5 şəhərdən biri hesab edilir. Dünyanın mədəniyyət mərkəzlərindən birinə çevrilən paytaxtımız öz tarixinin misilsiz inkişaf dövrünü yaşayır. Bütün bunların əsasında İlham Əliyev fenomeni dayanır.

Tədbir bədii hissə ilə davam edib.