REGİONLAR


Bakıda Novruz bayramı ilə əlaqədar kənd təsərrüfatı məhsullarının satış yarmarkaları başa çatmışdır

Bakı, 19 mart (AZƏRTAC). Xəbər verdiyimiz kimi, Novruz bayramında əhalinin bazar qiymətlərindən daha ucuz ərzaq və kənd təsərrüfatı malları ilə təmin olunması məqsədilə Kənd Təsərrüfatı Nazirliyi martın 19-dək Bakı şəhərinin müxtəlif yerlərində 5 günlük satış yarmarkaları təşkil etmişdir.

Bayram satış yarmarkaları Xətai rayonunun Məhəmməd Hadi küçəsində (Ukrayna dairəsindən H.Aslanov metrosuna gedən yolda), Yasamal rayonunun Bakı Rabitə və Nəqliyyat Kollecinin həyətində, Nərimanov rayonunda metronun “Gənclik” stansiyasının yaxınlığında, Binəqədi rayonunun Dərnəgül yaşayış sahəsindəki 6 nömrəli peşə liseyinin həyətində, Suraxanı rayonunda Yeni Günəşli qəsəbəsi, “Günəş” ticarət mərkəzinin yanında, Nəsimi rayonunda Təzə bazarın ərazisində, Səbail rayonunun Badamdar qəsəbəsindəki 239 nömrəli məktəbin yanında keçirilmişdir.

Azərbaycan Respublikası Prezidentinin “Kənd təsərrüfatı və ərzaq məhsulları bazarının fəaliyyətinin təkmilləşdirilməsi sahəsində əlavə tədbirlər haqqında” 2014-cü il 16 yanvar tarixli Sərəncamında Kənd Təsərrüfatı Nazirliyinə yerli icra hakimiyyəti orqanları ilə birlikdə Bakıda keçirilən kənd təsərrüfatı məhsullarının satış yarmarkalarının daha səmərəli təşkili tapşırılmışdır. Sərəncama əsasən, yarmarkaların fəaliyyətinə normal şərait yaradılmalı, əhali və fermerlər üçün əlverişli ticarət mühiti formalaşdırılmalı, sui-istifadə hallarının aradan qaldırılması üçün təxirəsalınmaz tədbirlər görülməli, habelə kənd təsərrüfatı məhsulları istehsalçılarının topdan və pərakəndə satış bazarlarına çıxış imkanlarının genişləndirilməsi məqsədilə şəhərlərdə və rayon mərkəzlərində yarmarkalar təşkil olunmalıdır.

Sərəncamdan irəli gələn vəzifələrin icrası məqsədilə Bakıda kənd təsərrüfatı məhsullarının satış yarmarkaları üçün ayrılan yerlər müasir standartlara uyğun və qapalı formada qurulmuş, əhali və fermerlər üçün daha əlverişli ticarət mühiti yaradılmışdır.

Martın 19-da da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının bayram satış yarmarkaları davam etmişdir. Bu yarmarkalara mövsümə uyğun meyvə-tərəvəz, ərzaq, həmçinin Novruz süfrələrimi bəzəmək üçün müxtəlif çərəzlər, şirniyyatlar və digər məhsullar çıxarılmışdır.

“Təzə bazar” MMC-nin həyətindəki yarmarkada beş gün ərzində Sabirabad, Gədəbəy, Hacıqabul və digər rayonlardan gətirilmiş 100 tondan çox məhsul təklif olunmuşdur. Alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdir.

Kənd Təsərrüfatı Nazirliyinin nümayəndəsi Rövşən Əliyev dedi ki, beş gündə yarmarkada 90 tondan çox məhsul satılmışdır. Qiymətlər bazardakından 20-25 faiz ucuzdur. Qoyun ətinin kiloqramı 6 manata, mal əti 5 manata, soğan 45-60 qəpiyə və s. satılır.

Yasamal rayonunda, Bakı Rabitə və Nəqliyyat Kollecinin həyətində - qapalı şəraitdə, göz oxşayan səliqə-sahman yaradılmış məkanda təşkil edilmiş yarmarkaya bu əraziyə təhkim olunmuş Salyan, Qusar, Astara, Şabran, bundan əlavə, Quba, Göyçay və Gədəbəy rayonlarının fermerləri və torpaq mülkiyyətçiləri tərəfindən bol meyvə-tərəvəz, bostan bitkiləri, mal və qoyun əti, ağartı, Novruz çərəzləri və digər məhsullar gətirilmişdir. Azərbaycanda qida məhsullarının istehsal edən şirkətlər də bayramla bağlı öz məhsullarını yarmarkaya çıxarmışlar.

Kənd Təsərrüfatı Nazirliyinin nümayəndəsi Fəxrət Eminov məlumat verdi ki, beş gündə burada 242 tona yaxın məhsul satılmışdır.

Məhsullar arasında mövsümə uyğun kənd nemətləri, o cümlədən kartof, soğan, kələm, yerkökü, çuğundur, badımcan, balqabaq, bibər, alma, armud, nar, heyva, göyərti, həmçinin qoz, fındıq, şabalıd, meyvə qurusu və digər çərəzlər üstünlük təşkil etmişdir. Məhsullar bazarlarla müqayisədə 20-30 faiz ucuz qiymətə təklif olunmuşdur.

Yarmarkaya daxil olan bütün məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılmışdır.

Yarmarkada nəzarət tərəzisi qoyulmuş, bütün məhsulların bazarla müqayisəli qiymətləri göstərilmişdir.

Badamdar qəsəbəsinin mərkəzində, 239 nömrəli məktəbin yaxınlığındakı yarmarkada Novruz bayramı ilə əlaqədar qoz, fındıq, şabalıd və meyvə qurusu çoxluq təşkil edirdi. Baharın rəmzi olan qırmızı lentli yaşıl səmənilər xüsusilə göz oxşayırdı.

Burada satışa Ağdaş, Salyan, Masallı və digər rayonlardan 36 tondan çox kənd təsərrüfatı məhsulları çıxarılmışdır.

Kənd Təsərrüfatı Nazirliyinin nümayəndəsi Məmməd Həziyev bildirdi ki, məhsulların keyfiyyəti ciddi surətdə yoxlanılmış, xüsusilə ət və süd məhsulları baytar müayinəsindən keçirilmişdir.

Paytaxt sakinləri kartof, soğan, alma, naringi, kələm, yerkökü, çuğundur, yumurta, ət, süd, həmçinin Novruz çərəzlərini həvəslə alırdılar.

Məhsulların keyfiyyətli və bazardakından 25-30 faiz ucuz olması alıcılar tərəfindən razılıqla qarşılanır. Bunun nəticəsidir ki, beş gündə burada ümumi məhsulun 95 faizindən çoxu satılmışdır.

Yarmarkanın davam etdiyi beş gündə Suraxanı rayonundakı “Günəş” ticarət mərkəzinin (32,5 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin (4,9 ton) ərazilərindəki yarmarkalarda Samux, Quba, Biləsuvar, Cəlilabad və Ağsu rayonlarından gətirilmiş 37,4 ton məhsulun, demək olar ki, hamısı satılmışdır.

Kənd Təsərrüfatı Nazirliyinin nümayəndəsi Mustafa Rüstəmov bildirdi ki, hər iki yarmarkada çərəzlər, meyvələrdən alma, armud, nar, heyva, tərəvəzlərdən pomidor, xiyar, göyərti, həmçinin mövsümi kənd nemətlərindən kartof, soğan, balqabaq və digər məhsulların alıcıları çoxluq təşkil etmişdir. Qiymətlər bazarlarla müqayisədə 25-30 faiz ucuz olmuşdur.

Məhsulların keyfiyyəti ciddi yoxlanılmış, ət və süd məhsulları baytar müayinəsindən keçirilmişdir.

Xətai rayonunda təşkil olunmuş bayram yarmarkasına Salyan, Biləsuvar, Qax, Şəmkir, Kürdəmir, Quba, Astara və digər rayonlardan 500 tona yaxın müxtəlif kənd təsərrüfatı məhsulları gətirilmişdir.

Kənd Təsərrüfatı Nazirliyinin nümayəndəsi Oqtay Hüseynov məlumat verdi ki, 5 gün davam edən yarmarka martın 19-da başa çatmışdır. Məhsulların, demək olar ki, hamısı satılmışdır.

Yarmarkada nümunəvi səliqə-sahman hökm sürür. Fermerlərə və digər torpaq mülkiyyətçilərinə, bazarlığa gələnlərə əlverişli şərait yaradılmışdır. Bir neçə yerdə nəzarət tərəzisi qoyulmuş, lövhələrdə qiymətlərin bazarla müqayisəsi göstərilmişdir.

Yarmarkada kartof, soğan, meyvə, tərəvəz, süd, ət, Novruz çərəzləri və digər məhsullar satılır. Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılır. Qiymətlər bazara nisbətən 20-30 faiz ucuzdur.

Kənd Təsərrüfatı Nazirliyinin nümayəndəsi Savalan Seyfəddinov bildirdi ki, beş gün üçün Nərimanov rayonunda, metronun “Gənclik” stansiyasının yaxınlığındakı kənd təsərrüfatı məhsullarının satış yarmarkasına respublikamızın 10 rayonundan gətirilmiş 98 ton kənd təsərrüfatı məhsullarının və 30 min ədəd yumurtanın 95 faizindən çoxu satılmışdır.

Yarmarka müasir standartlara uyğun və qapalı formada təşkil edilmiş, istehlakçılar və fermerlər üçün daha əlverişli ticarət mühiti yaradılmış, habelə kənd təsərrüfatı məhsulları istehsalçılarının topdan və pərakəndə satış bazarlarına çıxış imkanları genişləndirilmiş, sui-istifadə hallarının aradan qaldırılması üçün təxirəsalınmaz tədbirlər görülmüşdür.

Fermerlər və digər torpaq mülkiyyətçiləri Novruzun rəmzi olan səmənini, meyvə qurusunu, qozu, fındığı, meyvə-tərəvəzi, göyərtini və ağartı məhsullarını bazardakından 25-30 faiz ucuz qiymətə təklif edirdilər.

Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya Bərdə, Ağstafa, Siyəzən, Goranboy və digər rayonlardan alma, armud, nar, kələm, kartof, pomidor, çuğundur, yerkökü, Novruz süfrələrini bəzəmək üçün çərəzlər və digər məhsullar gətirilmişdir. Alıcılar burada məhsulların qiymətlərinin bazardakından 20-30 faiz ucuz olduğunu söyləyirdilər.

Kənd Təsərrüfatı Nazirliyinin nümayəndəsi Qadir Həsənovun verdiyi məlumata görə, beş gün ərzində burada 40 tonadək məhsul satılmışdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.