ELM VƏ TƏHSİL


Bakıda “Tibb, sağlamlıq və həyat elmləri” mövzusunda beynəlxalq elmi-praktik konfrans keçirilir

Bakı, 1 iyul, AZƏRTAC

İyulun 1-də Azərbaycan Milli Elmlər Akademiyası (AMEA) Dendrologiya İnstitutunun ev sahibliyi ilə “Tibb, sağlamlıq və həyat elmləri” mövzusunda 4-cü beynəlxalq elmi-praktik konfrans öz işinə başlayıb.

İnstitutdan AZƏRTAC-a bildirilib ki, konfrans AMEA və Təhsil və Elmdə Tədqiqat üzrə Beynəlxalq Cəmiyyət (ISRES) tərəfindən təşkil olunub.

Konfransın açılışında Azərbaycanın və Türkiyənin Dövlət himnləri səsləndirilib, türk dünyasının bütün şəhidlərinin xatirəsi bir dəqiqəlik sükutla yad edilib.

Tədbiri giriş sözü ilə Türkiyənin Qaziantep Universitetinin professoru Mehmet Özaslan açaraq Azərbaycanla Türkiyə arasında qədim tarixə malik dostluq və qardaşlıq əlaqələrindən danışıb. O deyib: “Təsadüfi deyil ki, Türkiyə dövlətinin qurucusu Mustafa Kamal Atatürk Azərbaycanın kədərini özlərinin kədəri, sevincini isə özlərinin sevinci hesab etmişdir. Türk dünyasının iki lideri ulu öndər Heydər Əliyev və Mustafa Kamal Atatürk öz müdrik kəlamları ilə hər iki dövlətin gələcək nəsillərinə əbədi olaraq bir mesaj qoymuşlar. Türkiyə və Azərbaycan arasındakı dostluq-qardaşlıq münasibətləri əbədi və sarsılmazdır”.

Mehmet Özaslan bildirib ki, konfransda Türkiyə və Azərbaycan istisna olmaqla, 91 beynəlxalq iştirakçı qeydiyyatdan keçib, 27 ölkənin nümayəndələri iştirak edirlər. O, konfransın bölmə iclaslarında müxtəlif ölkələrdən 117 nümayəndənin məqalə və tezislərinin müzakirə ediləcəyini söyləyib.

Türkiyəli professor konfransın Təşkilat Komitəsi adından Azərbaycan Milli Elmlər Akademiyasına, Dendrologiya İnstitutunun bütün əməkdaşlarına, müxtəlif ölkələri təmsil edən iştirakçılara, ISRES təşkilat heyətinə təşəkkürünü bildirib.

AMEA-nın vitse-prezidenti akademik İradə Hüseynova AMEA rəhbərliyi adından konfrans iştirakçılarını salamlayıb, tədbirin işinə uğurlar arzulayıb. Qeyd edib ki, elm Yer üzündə canlı həyatın davamına, yaşam keyfiyyətinin yüksəldilməsinə, insan cəmiyyətinin tərəqqisinə, rifahının yaxşılaşdırılmasına, beynəlxalq sülh və əməkdaşlığın təmin olunmasına xidmət etməlidir və bu baxımdan konfransın istiqamətləri hazırkı dövr üçün olduqca aktualdır.

Akademik İradə Hüseynova son illərdə ölkəmizdə həm tibb elmi və səhiyyə sistemi, həm də digər həyat elmlərinin xeyli inkişaf etdiyini, mühüm nailiyyətlərin əldə olunduğunu vurğulayıb: “Azərbaycan Milli Elmlər Akademiyası Biologiya və Tibb Elmləri Bölməsinin tibbə və biotibbə aid elmi istiqamətləri dövrün çağırışlarını və dünyada gedən tendensiyaları əhatə etməklə müəyyənləşdirilib. Bu gün qlobal problemləri həll etmək üçün elmi əməkdaşlıq əlaqələrinin gücləndirilməsinə böyük ehtiyac var. Bunsuz ortaq düzgün strategiya qəbul etmək mümkün deyil. Bu baxımdan konfransın uğurlu olacağına və əhatə etdiyi elm sahələrinə töhfələr verəcəyinə inanıram”.

Tədbirdə Dendrologiya İnstitutunun baş direktoru vəzifəsini icra edən biologiya üzrə fəlsəfə doktoru, dosent Samirə Bağırova Türkiyə-Azərbaycan qardaşlığının, din, dil, mədəniyyət birliyinin qədim tarixi köklərə malik olduğunu deyib. Türkiyə-Azərbaycan əlaqələrinin elmi istiqamətlərdə də inkişafının vacib amil olduğunu söyləyib. Qeyd edib ki, beynəlxalq konfransın təşkil olunmasının əsas məqsədlərindən biri də biologiya, tibb, kənd təsərrüfatı və s. kimi sahələrdə olan yeni elmi nailiyyətlərin, metodların və innovativ fikirlərin mübadiləsi, nəzəri və praktiki təcrübələrin bölüşdürülməsidir: “Məqsəd tibb və həyat elmləri ilə bağlı qabaqcıl ideyaları təqdim etmək və alimləri bir araya gətirməklə aparılan tədqiqatları beynəlxalq miqyasa çıxarmaq, diqqəti tibb, sağlamlıq və həyat elmləri sahəsində əldə edilən nailiyyətlərə, gələcək tendensiyalara və ehtiyaclara yönəltməkdir”.

Qeyd edilib ki, konfransa təqdim olunmuş ingilis dilindəki məqalələr “Eurasia Proceedings of Science, Technology, Engineering & Mathematics” (EPSTEM) jurnalında (www.epstem.net) dərc olunacaq.

Beynəlxalq konfrans işini iyulun 4-dək bölmələrdə davam etdirəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.