Bakı, 11 dekabr, AZƏRTAC

Dekabrın 11-də Azərbaycan Yazıçılar Birliyinin Natəvan klubunda “Qızıl qələm” mükafatı laureatı, Prezident təqaüdçüsü, şair Süleyman Rzazadənin Azərbaycan xalqının ümummilli lideri Heydər Əliyevin 95 illiyi münasibətilə tərtib etdiyi “Zamana şöhrətdir sənin qüdrətin” kitabının təqdimatı keçirilib.

AZƏRTAC xəbər verir ki, pedaqogika üzrə fəlsəfə doktoru, şair Əziz Musanın aparıcılığı ilə reallaşan tədbirdə Ümummilli Liderin xatirəsi bir dəqiqəlik sükutla yad edilib.

Naxçıvan Muxtar Respublikasının Şahbuz rayonunun Badamlı kəndində dünyaya göz açan Süleyman Rzazadənin həyat yolu və yaradıcılığından söz açılaraq vurğulanıb ki, bu antologiya şairin oxucularla sayca altıncı görüşüdür. Ümummilli lider Heydər Əliyevin vəfatının 15-ci ildönümü ərəfəsində təqdimatı keçirilən bu kitabda müxtəlif yaş qruplarından olan müxtəlif peşə sahiblərinin, hətta orta məktəb şagirdlərinin Ulu Öndərə həsr etdiyi bədii nümunələr toplanıb. Orijinallığı qorunsun deyə bəzi şeirlərə toxunulmamış, olduğu kimi təqdim olunmuşdur.

Təqdimat mərasimində şairlər Zeynal Vəfa, Dilqəm Quliyev və kitabda şeirləri yer alan qələm adamları çıxış edərək yeni nəşrin ərsəyə gəlməsində əməyi olan hər kəsə minnətdarlıqlarını bildiriblər və ümummilli lider Heydər Əliyevin Azərbaycanın inkişafı naminə gördüyü çoxsaylı işlərdən söz açıblar.

Vurğulanıb ki, görkəmli dövlət xadimi, dünya miqyaslı siyasətçi, Azərbaycan milli dövlətçiliyini bütün təhlükələrdən xilas edib qoruyan və inkişaf etdirən qüdrətli şəxsiyyət kimi Heydər Əliyevin həyat və fəaliyyəti müasir tariximizin ən mühüm və şərəfli mərhələsini təşkil edir. Təsadüfi deyildir ki, Heydər Əliyevin Azərbaycana rəhbərlik etdiyi illər tariximizin qızıl dövrü kimi yaddaşlara həkk olunub. Gördüyü cahanşümul işlərin nəticəsidir ki, bu gün ölkəmizin hər yerində bu böyük şəxsiyyətin anım günü xalqın yüksək ehtiramı ilə geniş qeyd edilir. Ümummilli Liderin zəngin ictimai-siyasi fəaliyyətinin hərtərəfli öyrənilməsi və təbliği məqsədilə bütün bölgələrdə, idarə və müəssisələrdə, təhsil ocaqlarında yığıncaqlar, konfranslar, digər kütləvi tədbirlər keçirilir.

“Bu günlər hər birimiz Heydər Əliyevin Vətən və millət qarşısında misilsiz tarixi xidmətlərini bir daha minnətdarlıq hissi ilə xatırlayırıq. Azərbaycan mədəniyyətinin görkəmli xadimləri Heydər Əliyev dövründə olduğu qədər heç zaman tanınmamışlar. Heydər Əliyev mədəniyyətimizi yaradan, onu inkişaf etdirən insanların əməyini yüksək qiymətləndirir, onların daim qayğısını çəkirdi. Onların adlarını sadalamaqla qurtaran deyil. Heydər Əliyev yazıçıların, bəstəkarların, kinematoqrafçıların, teatr xadimlərinin, rəssamların qurultaylarında, konfranslarında iştirak edir, dərin, məzmunlu nitqi iştirakçıların alqışları ilə qarşılanardı. Onun hər çıxışı mədəniyyətin bir sahəsinin gələcək inkişaf proqramına çevrilərdi. Hansı sahədən danışırdısa, elə hiss edirdin ki, bu sahənin mütəxəssisi, bilicisidir. Heydər Əliyev özü də incəsənət meyilli şəxsiyyət idi. Elə gəncliyində də incəsənətə gəlmək, memar olmaq istəyirdi. Amma zaman Ulu Öndəri siyasət memarına çevirdi. Çünki bu xalqın belə bir siyasət xadiminə çox böyük ehtiyacı var idi”,- deyə natiqlər vurğulayıblar.

Qeyd edilib ki, “Təknur” mətbəəsində yüksək poliqrafik üslubda, nəfis tərtibatda çap olunan 560 səhifəlik kitabın redaktoru filologiya üzrə elmlər doktoru, professor Mahirə Nağıqızıdır.

Diqqətə çatdırılıb ki, kitabda dünya mütəfəkkirlərinin Heydər Əliyev haqqında dəyərli fikirlərinə də geniş yer verilib.

Sonda tədbirin təşkilatçılarına və iştirakçılarına minnətdarlığını bildirən Süleyman Rzazadə Ulu Öndərə həsr edilmiş kitabların hələ bundan sonra da çap ediləcəyini söyləyib.

Tədbirdə kitabda yer alan Ümummilli Liderə həsr edilmiş şeirlər səsləndirilib.