Bakı, 28 yanvar, AZƏRTAC

Yanvarın 28-də Bakıda Ümumdünya Gömrük Təşkilatı (ÜGT) Avropa Regionunun Potensialın Gücləndirilməsi üzrə Milli Əlaqələndirici Şəxslərinin iclası öz işinə başlayıb.

Dövlət Gömrük Komitəsinin mətbuat və ictimaiyyətlə əlaqələr idarəsindən AZƏRTAC-a bildirilib ki, ÜGT-nin Potensialın Gücləndirilməsi üzrə Avropa Regional Ofisində təşkil olunan iclasa Azərbaycan da daxil olmaqla, 20-yə yaxın iştirakçı ölkənin, eləcə də Ümumdünya Gömrük Təşkilatının nümayəndə heyətləri qatılıb. Tədbirdə əməkdaşlıq imkanlarının genişləndirilməsi, yeni yaranan problemlərin həlli, ticarətin asanlaşdırılması, təhlükəsizliyin təmin olunması və digər mövzular üzrə müzakirələr aparılacaq.

İclasın açılış mərasimində çıxış edən Dövlət Gömrük Komitəsi sədrinin müavini, gömrük xidməti general-mayoru İqbal Babayev Azərbaycan gömrüyündə aparılan islahatlarla bağlı məlumat verib. Qeyd edib ki, son vaxtlar Dövlət Gömrük Komitəsi kadr potensialının gücləndirilməsinə, elmi yanaşmaların praktiki fəaliyyətdə tətbiq edilməsinə xüsusi önəm verir. İnformasiya-kommunikasiya texnologiyalarının tətbiqinə də toxunan komitə sədrinin müavini bildirib ki, hazırda Dövlət Gömrük Komitəsi 14 elektron gömrük xidməti təqdim edir.

İ.Babayev onu da diqqətə çatdırıb ki, Prezident İlham Əliyevin “Xarici ticarət iştirakçılarının “Yaşıl dəhliz” buraxılış sistemindən daimi istifadə hüququnu əldə etməsi, həmin hüququn dayandırılması, ləğvi və bərpası Qaydası”nın təsdiq edilməsilə bağlı fərmanına əsasən, bu il fevralın 1-dən sistemin tam tətbiqinə başlanacaq, “Yaşıl dəhliz” buraxılış sisteminin istifadəyə verilməsi biznesin inkişafında, ticarətin asan və sürətli şəkildə həyata keçirilməsində, könüllü riayət mədəniyyətinin formalaşmasında əhəmiyyətli rol oynayacaq.

Vurğulayıb ki, Ümumdünya Gömrük Təşkilatı Avropa Regionunun Potensialın Gücləndirilməsi üzrə Milli Əlaqələndirici Şəxslərinin iclası tərəflər arasında əlaqələrin daha da genişlənməsinə töhfəsini verəcək, bu əməkdaşlıq gömrük işinin təşkili və potensialın gücləndirilməsinə müsbət təsir edəcək.

ÜGT-nin potensialın gücləndirilməsi üzrə direktor müavini Brenda Mundiya isə bildirib ki, 4 ildən çox fasilədən sonra Azərbaycanda yenidən keçirilən iclas olduqca əhəmiyyətli hesab olunur. Tədbir müddətində daha təcrübəli iştirakçılar təqdimat keçirəcək, komandaya yeni qatılan nümayəndələr isə ÜGT-nin iş prinsipləri ilə yaxından tanış olacaq, bilik və bacarıqlarını artıracaqlar. O deyib ki, bununla yanaşı, regional məsələlər əlaqələndirici şəxslərlə müzakirə ediləcək, həmçinin Regional Ofisin iş fəaliyyətini tənzimləyən strateji sənədlərə baxılacaq, iştirakçıların təklifləri öyrəniləcək. Təkliflər əsasında həmin sənədlər daha da təkmilləşdiriləcək və apreldə Sankt-Peterburqda Avropa regionu üzrə gömrük xidməti rəhbərlərinin görüşündə təqdim olunacaq.

ÜGT-də Çin Gömrük Əməkdaşlıq Fondunun meneceri Penq Ni təmsil etdiyi qurumun fəaliyyəti barədə məlumat verib, fondun institusional artım və potensialın gücləndirilməsi istiqamətində fəaliyyət göstərdiyini bildirib. Qeyd edib ki, fond bir sıra Avropa ölkələrində potensialın gücləndirilməsi proqramlarını maliyyələşdirir: “Potensialın gücləndirilməsi məsələsinin bütün gömrük xidmətləri üçün aktualdır, vaxtilə Çin Xalq Respublikası da müvafiq təlimlərdən çox yararlanıb və buna görə digər ölkələrin inkişafına töhfə verməyə çalışır”.

Daha sonra ÜGT-nin Potensialın Gücləndirilməsi üzrə Avropa Regional ofisinin rəhbəri Roger Herman xüsusi ehtiyaclara cavab vermək məqsədilə əlaqələndirici şəxslər arasında potensialın gücləndirilməsi üçün daha effektiv, daha səmərəli əməkdaşlıq imkanlarının genişləndirilməsinin vacibliyini vurğulayıb.

İki gün davam edəcək iclas müddətində Ümumdünya Gömrük Təşkilatının strateji planı, regional prioritetlər və onların əlaqələndirilməsi, təşkilati inkişaf potensialının gücləndirilməsi, ÜGT-nin potensialın gücləndirilməsinə dəstək proqramının hazırlanması, milli əlaqələndirici şəxslərin rolu, vəzifə və səlahiyyətləri, təşkilatın ekspert qruplarının səfərbər olunması və digər məsələlərin müzakirəsi nəzərdə tutulub. Həmçinin iclas ərəfəsində ÜGT-nin yeni distant təhsil üzrə modulları və internet vasitəsilə təlim almaq imkanını əks etdirən təqdimatlar keçiriləcək.