İQTİSADİYYAT
Bakıda VI illik Xəzər Texniki konfransı keçirilir VİDEO
Bakı, 16 oktyabr, Ruslan Manafov, AZƏRTAC
Oktyabrın 16-da Bakıda Azərbaycan Respublikası Dövlət Neft Şirkətinin (SOCAR) təşkilatçılığı ilə VI illik Xəzər Texniki konfransı - SPE (Neft-Qaz Sənayesi Mühəndisləri Cəmiyyəti) öz işinə başlayıb. Tədbir “Rəqəmsal transformasiya: Gələcək üçün imkanlar” mövzusunda keçirilir.
AZƏRTAC xəbər verir ki, SPE 2020-nin prezidenti, “Petrol Corporation” şirkətinin nümayəndəsi Şouna Nunanın moderatorluğu ilə keçirilən tədbirin açılışında SOCAR-ın yataqların işlənməsi üzrə vitse-prezidenti Yaşar Lətifov, BP-nin Azərbaycan, Gürcüstan və Türkiyədə hasilat üzrə vitse-prezidenti Con Stefonson, “Total E&P Azerbaijan” şirkətinin direktoru Denis Lemarşal, Bakı Dövlət Universitetinin rektoru Elçin Babayev və başqaları çıxış ediblər.
SOCAR prezidenti Rövnəq Abdullayev və birinci vitse-prezident Xoşbəxt Yusifzadənin adından konfrans iştirakçılarını salamlayan Yaşar Lətifov Xəzər dənizinin Azərbaycan sektorunda yerləşən yataqların yerləşdiyi xəritəni təqdim edib. Xəritədə göstərilib ki, bugünədək Xəzərin Azərbaycan sektorunda yerləşən yataqlardan 1 milyard 90 milyon ton neft və 713 milyard kubmetr qaz hasil edilib. Qurudakı yataqlardan 979 milyon ton neft və 139 milyard qaz çıxarılıb. Bundan başqa, indiyədək quruda 53 neft-qaz yatağı aşkar olunub ki, onlardan 40-ı bu gün də fəaliyyətdədir. Dənizdə kəşf olunan 28 yataqdan 19-u da hazırda işləyir.
Konfransın mövzusu ilə bağlı fikirlərini səsləndirən SOCAR-ın yataqların işlənməsi üzrə vitse-prezidenti deyib ki, müasir şəraitdə kəşfiyyat və hasilat kimi proseslərin həyata keçirilməsində müxtəlif həll yollarının, o cümlədən ən qabaqcıl rəqəmsal texnologiyaların tətbiqinə böyük tələbat var. O qeyd edib: “SOCAR bununla bağlı bir sıra uğurlu layihələr və nailiyyətlərlə öyünə bilər”.
Y.Lətifov daha sonra informasiya-kommunikasiya texnologiyalarının şirkətin gündəlik fəaliyyətində tətbiqi məsələlərindən ətraflı bəhs edib.
BP şirkətinin Azərbaycan, Gürcüstan və Türkiyədə hasilat üzrə vitse-prezidenti Con Stefonson peşəkar sahələr, mühəndislər, ekspertlər və digərləri arasında təcrübə mübadiləsi baxımından konfransın əhəmiyyətini qeyd edib. O, şirkətin operatoru olduğu “Azəri-Çıraq-Günəşli” və “Şahdəniz” yataqlarında rəqəmsal texnologiyaların tətbiqindən bəhs edib.
“Total E&P Azerbaijan” şirkətinin rəhbəri Denis Lemarşal qeyd edib ki, alternativ və bərpaolunan enerji mənbələrindən istifadənin genişlənməsinə baxmayaraq, neft və qaz əsas enerji mənbəyi olaraq qalır. Neft-qaz sektorunda problemlərə və risklərə toxunan natiq yataqların istismarı zamanı onun şirkəti tərəfindən risklərin azaldılması istiqamətində müasir texnologiyaların istifadəsindən danışıb.
Oktyabrın 18-dək davam edəcək tədbirdə Xəzər regionunda və bütün dünyada peşəkarların təcrübəsinə və qabaqcıl praktikaya əsaslanan dəyişikliklər müzakirə olunacaq.
Bu tədbir peşə ixtisasının artırılması üçün platformadır və iştirakçılar arasında işgüzar əlaqələrin və tanışlıqların yaradılmasına, habelə bilik və təcrübə mübadiləsinə imkan verir.
Son bir neçə ildə yeni texnologiyaların istifadəsi neft-qaz sənayesində dəyişikliklər yaradıb. Bir sıra əməliyyat proseslərinin sadələşdirilməsi, əmək saatlarının azaldılması, avadanlığın daha etibarlı olması və təhlükəsizlik üçün yeni rəqəmsal yanaşmalar tətbiq edilib. “Rəqəmsal transformasiya: Gələcək üçün imkanlar” mövzusu çərçivəsində konfrans iştirakçıları rəqəmsal texnologiyaların neft-qaz sektoruna, həmçinin onun müasir və gələcək rəqəmsal trendlərinə və əlavələrinə təsiri məsələlərini nəzərdən keçirəcəklər.
Konfransda müzakirələr üç əsas panel sessiyalarda aparılacaq. Tədbirin ilk günündə birinci sessiya - “Keçmiş, bu gün və gələcək” paneli keçirilib. Darrel Lankaster (“Halliburton”) və Favat Kurayşi (“Equinor”) sədrlik etdikləri sessiyanın spikerlər Tyerri Debertrand (“Total”), Ramin İsayev (“SOCAR AQŞ”), Yaşar Lətifov (SOCAR), Luis Kuinterro (“Halliburton”) və Qoxan Sayqi (“Schlumberger”) şirkətlərin tarixi, hazırkı vəziyyəti və informasiya texnologiyalarının gələcəkdə tətbiqinə istiqamətlənmiş fəaliyyətlərindən bəhs ediblər. Xüsusən, SOCAR-ın vitse-prezidenti Yaşar Lətifov “SOCAR: Keçmiş, bu gün və gələcək” mövzusunda məruzə ilə çıxış edib.
Qeyd edək ki, oktyabrın 17-də konfrans çərçivəsində “Davamlı inkişaf, artım və mənfəət” mövzusunda keçiriləcək ikinci sessiyaya Yaşar Lətifov (SOCAR) və Denis Lemarşal (“Total”) sədrlik edəcəklər. Panel iclasında Nayl Henderson (BP), Zair İbrahim (prezident, Səudiyyə Ərəbistanı, Şimal Körfəzi və Şərqi Aralıq dənizi, “Baker Hughes, a GE Company”), Mixail Krasik (“Total E&P Absheron”), Zaur Məmmədov (Azərbaycan Respublikası Energetika Nazirliyi), Arnd Vilhelms (“Equnior”, neft texnologiyaları üzrə vitse-prezident) çıxış edəcəklər.
Konfransın “Yeni nəslin istedadı və insan amili” mövzusunda keçiriləcək üçüncü sessiyası tədbirin sonuncu günündə təşkil ediləcək. Sessiyaya Xalik Məmmədov (SOCAR) və Emmanuil Okuqbaye (BP) sədrlik edəcəklər. Panel iclasının moderatoru Şouna Nunan (SPE 2020-nin prezidenti, “Occidental Pertoleum”) olacaq. Çıxışçılar Fabris Buşar (“Schlumberger”), Mehriban Eyyubova (BP), Emiliya Məmmədova (“Baker Hughes a GE Company”), Şarlot Payendir (Fransa-Azərbaycan Universiteti).
Konfrans çərçivəsində analoji peşəkar diskussiyalar 12 texniki sessiya üzrə (hər gün 4 texniki sessiya olmaqla) keçiriləcək və onların iştirakçıları tanınmış spikerlərin, o cümlədən “Total”, SOCAR, BP, “Occidental Pertoleum”, TCO, Azərbaycan Respublikasının Energetika Nazirliyi, “Schlumberger”, “Halliburton”, “Equnior”, “SOCAR AQŞ”, “Baker Hughes”, “a GE Company” və digər şirkətlərin mütəxəssislərinin çıxışlarını dinləyəcəklər. Qeyri-kommersiya peşə assosiasiyası olan Neft-Qaz Sənayesi Mühəndisləri Cəmiyyətinin (SPE) üzvləri enerji resurslarının hasilatı və işlənməsi ilə məşğuldur. SPE dünyanın 154 ölkəsində 156.000-dən çox üzvə öz xidmətlərini təqdim edir. Onun missiyası ictimai mənfəət gətirən neft-qaz resurslarının və müvafiq texnologiyaların hasilatı və işlənməsi üzrə texniki biliklərin toplanması, yayılması və mübadiləsi, həmçinin mütəxəssislərə texniki və peşə səlahiyyətlərinin artırılması üçün imkan yaradılmasıdır.
Qeyd edək ki, V illik Xəzər Texniki konfransı – SPE 2018-ci ildə Qazaxıstanda keçirilib. Tədbirdə Qazaxıstan Respublikası hökumətini təmsil edən müxtəlif sənaye sahələrindən yüksək ixtisaslı beynəlxalq məruzəçilər, həmçinin iri neft-qaz şirkətlərinin və Xəzər regionunun birliklərinin nümayəndələri iştirak ediblər.
Bakıda keçirilən VI illik Xəzər Texniki konfransı – SPE oktyabrın 18-də öz işinə yekun vuracaq.
Tədbirin platin sponsoru BP şirkəti, gümüş – “SOCAR AQŞ”, bürünc – “Total” və “Worley” şirkətləridir.
Qeyd edək ki, AZƏRTAC konfransın rəsmi media tərəfdaşıdır.