İQTİSADİYYAT
Bakıda XXIV Beynəlxalq Qida Sənayesi sərgisi açılıb YENİLƏNİB VİDEO
Bakı, 16 may, Ramiz Quliyev, Sevda Cəfərova, AZƏRTAC
Mayın 16-da Bakıda XXIV Beynəlxalq Qida Sənayesi, XII Azərbaycan Beynəlxalq Kənd Təsərrüfatı və Xəzər Beynəlxalq Qablaşdırma, Tara, Etiket və Poliqrafiya sərgilərinin açılış mərasimi keçirilib.
AZƏRTAC xəbər verir ki, tədbirdə çıxış edən kənd təsərrüfatı naziri İnam Kərimov son illər Prezidenti İlham Əliyev tərəfindən ölkədə qeyri-neft sektorunun inkişafına göstərilən diqqətdən danışıb.
Bildirib ki, bu siyasətin nəticəsi olaraq, iqtisadiyyatın aparıcı sahələrindən biri olan aqrar sahə tamamilə yeni bir mərhələyə qədəm qoyub. Nazir qeyd edib ki, bu sahədə sosial-iqtisadi göstəricilərin yüksəlməsi nəticəsində respublikada kənd təsərrüfatının inkişafı prosesində əhəmiyyətli nailiyyətlər əldə edilib, istehsal edilən məhsulların rəqabətə davamlılığı ixrac imkanlarını genişləndirir. Hazırda yüksək məhsuldarlığın təmin edilməsi, yerli məhsulların rəqabət qabiliyyətinin artırılması, kənd təsərrüfatının inkişaf etdirilməsi əsas məqsəd olaraq qarşıya qoyulub. İnnovasiyaların tətbiqi, fermerə yaxınlıq, aqrar sektorda hesabatlılığın və şəffaflığın təmini nazirliyin əsas fəaliyyət prinsipləridir. Qarşıya qoyulan hədəflərə çatmaq üçün kənd təsərrüfatı məhsullarının istehsal və emal proseslərində ildən-ilə yeni texnologiyalar tətbiq olunur. Bu da bütövlükdə milli səviyyədə ərzaq təhlükəsizliyinin təmin edilməsinə öz töhfəsini verib. Aqrar sahənin inkişafında və təkmilləşdirilməsində, yerli və xarici iş adamları üçün məlumat mübadiləsində, biznes əlaqələrinin qurulmasında və genişləndirilməsində bu yönümlü sərgilər mühüm rol oynayır.
Nazir, həmçinin respublikamızda keçirilən belə sərgilərin beynəlxalq müstəvidə sıx əməkdaşlığın qurulmasına, investisiya artımına və aqrar sənayedə ən yeni texnologiyaların tətbiqinə şərait yaradacağına, ölkəmizin kənd təsərrüfatı sahəsindəki nailiyyətlərinin tanıdılmasına və kənd təsərrüfatı məhsullarının ixrac potensialının artırılmasına öz müsbət təsirini göstərəcəyinə əminliyini ifadə edib.
Qida Təhlükəsizliyi Agentliyinin sədri Qoşqar Təhməzli deyib ki, Azərbaycan Prezidentinin rəhbərliyi ilə aparılan iqtisadi islahatlar nəticəsində respublikada digər sahələr kimi kənd təsərrüfatı sahəsində də genişmiqyaslı inkişaf göz önündədir. Eyni zamanda Strateji Yol Xəritəsinə əsasən həyata keçirilən iqtisadi islahatların bir nümunəsi kimi də Azərbaycanda Qida Təhlükəsizliyi Agentliyi yaradılıb və uğurla fəaliyyət göstərir.
Q.Təhməzli diqqətə çatdırıb ki, kənd təsərrüfatı və qida sənayesinin inkişafı bütövlükdə ölkə iqtisadiyyatının güclənməsinə təkan verəcək.
ITE Group şirkətinin regional direktoru Edvard Stroon sərgilərin kənd təsərrüfatı sahəsində ən iri sərgilər olduğunu və bu sektorun ölkəmizdə sürətlə inkişaf etdiyini vurğulayıb.
E.Stroon əlavə edib ki, bu il ilk dəfə olaraq sərgilər BMT-nin Ərzaq və Kənd Təsərrüfatı Təşkilatı (FAO), eləcə də, Azərbaycanda İxracın və İnvestisiyaların Təşviqi Fondu (AZPROMO) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən də dəstəklənir.
Sərgilərdə 34 ölkədən 402 şirkət iştirak edir.