İQTİSADİYYAT
Bakıda “Xəzər İnşaat Həftəsi” öz işini başa çatdırıb
Bakı, 27 oktyabr, AZƏRTAC
Bakı Ekspo Mərkəzində inşaat və memarlıq, layihələndirmə və təmir sahəsində regionun ən mühüm tədbirinə çevrilmiş “Xəzər İnşaat Həftəsi” öz işini başa çatdırıb.
AZƏRTAC xəbər verir ki, builki forum XXIV Azərbaycan Beynəlxalq İnşaat “BakuBuild Azerbaijan”, XI Beynəlxalq istilik, havalandırma, kondisionerləşdirilmə, su təchizatı, santexnika və üzgüçülük hovuzu “Aquatherm Baku”, Xəzər Beynəlxalq mebel, interyer və dizayn “Caspian MebelExpo” və XI Xəzər Beynəlxalq mühafizə, təhlükəsizlik və xilasetmə vasitələri “Securika Caspian” sərgilərini ehtiva edirdi.
Dünyanın 22 ölkəsini təmsil edən 300-dən artıq şirkətin öz ekspozisiyası ilə çıxış etdiyi “Xəzər İnşaat Həftəsi”nin iştirakçıları tədbirin beynəlxalq səviyyədə aktuallıq və əhəmiyyətini bir daha ön plana çəkib.
Tədbirin iştirakçıları arasında Azərbaycan, Danimarka, Yunanıstan, Kanada, Çin, Türkiyə, Ukrayna, Finlandiya, Rusiya, Sloveniya və ABŞ bazarlarının aparıcı simaları, həmçinin Almaniya, Polşa, Birləşmiş Ərəb Əmirlikləri və İtaliyanın milli qrupları yer alıb.
Qeyd edək ki, sərgi iştirakçılarının təxminən 40 faizini yerli şirkətlər təşkil edib. Tədbirdə yerli şirkətlərin fəal iştirakı “BakuBuild Azerbaijan” sərgisinin uğurlarına böyük töhfə olub. Şəhərsalma sahəsində ixtisaslaşan beynəlxalq mütəxəssislər bu sərgidən öz məhsullarını “Made in Azerbaijan” brendi altında təqdim etmək üçün istifadə edən yerli şirkətlərin fəal iştirakını yüksək qiymətləndiriblər.
İnşaat materialları, döşəmə örtükləri, keramika, üzlük daşlar, mərmər, lak-boya məmulatları, dam materialları, qapı və pəncərələr, eləcə də bir sıra digər məhsulların geniş çeşidi “BakuBuild Azerbaijan 2018” ziyarətçilərinin diqqətinə təqdim edilib.
“Xəzər İnşaat Həftəsi”nin işgüzar proqramına bir sıra ixtisaslaşmış seminarlar, peşəkar görüş və müzakirələr, eləcə də yeni texnologiyaların və inşaat ustalıqlarının təqdimatları daxil olub. Bu il təşkilatçılar tərəfindən ilk dəfə olaraq “Aquatherm Baku” və “BakuBuild” sərgiləri çərçivəsində tədbirlərdə təqdim olunan material və məhsulların sınanması üçün xüsusi “Sınaq otağı” yaradılıb. Ziyarətçilər təşkilatçıların digər yeniliklərini - iştirakçıların öz yeni məhsullarını təqdim etdikləri “İnnovasiyalar guşəsi”ni və ziyarətçilərə iştirakçı şirkətlərin məhsul və ya xidmətlərini xüsusi endirimlə əldə etmək imkanı yaradan “Ziyarətçilər üzrə loyallıq” proqramını məmnuniyyətlə qarşılayıblar.
Sərgi təşkilatçılarının yüksək peşəkarlığı təkcə “Xəzər İnşaat Həftəsi”nin çoxsaylı iştirakçıları tərəfindən deyil, həm də bu tədbirə orijinal təklif və yeniliklər, o cümlədən ixtisaslaşmış məlumatlar, habelə işgüzar görüş və məsləhətləşmələr sorağı ilə gələn minlərlə ziyarətçi tərəfindən də müsbət qiymətləndirilib. Dörd ixtisaslaşdırılmış sərginin eyni platformada bir araya gəlməsi milli məhsulun lazımi qaydada təşviq olunduğuna əyani sübut olmaqla, bir sıra şirkətlərin inkişafına və sabitliyinə öz töhfəsini verib. Bu faktı VIP qonaqlar arasında olan tanınmış yerli ekspertlər bəyan ediblər.
Bu il “BakuBuild Azerbaijan” sərgisinin informasiya tərəfdaşı – “Caspian Energy” şirkəti ilə birlikdə Naxçıvandan gələn sahibkarlar üçün sərgi üzrə tanışlıq turu da təşkil edilib.
Həmçinin bu il “Aquatherm Baku 2018” sərgisi dünyanın 14 ölkəsindən su təchizatı, kanalizasiya, istilik, dispetçerləşdirmə, kondisionerləşdirilmə, havalandırma, habelə üzgüçülük hovuzu və SPA mərkəzlərinin təchizatı üzrə həll variantları təklif edən 69 şirkəti bir araya gətirib.