İDMAN


Bakıda bədii gimnastika üzrə 35-ci Avropa çempionatının təntənəli açılış mərasimi olub

Bakı, 16 may, AZƏRTAC

Mayın 16-da Bakıda bədii gimnastika üzrə 35-ci Avropa çempionatının təntənəli açılış mərasimi olub.

AZƏRTAC xəbər verir ki, əvvəlcə iştirakçı ölkələrin paradı keçirilib.

Avropa Gimnastika İttifaqının (UEG) prezidenti Fərid Qayıbov açılış mərasimində çıxış edərək rəhbərlik etdiyi qurumun adından iştirakçıları təbrik edərək uğurlar arzulayıb. Azərbaycanın artıq dördüncü dəfədir bədii gimnastika üzrə Avropa çempionatına ev sahibliyi etdiyini xatırladan F.Qayıbov ölkəmizdə idmanın bu növünün inkişafına görə Azərbaycan Gimnastika Federasiyasının prezidenti xanım Mehriban Əliyevaya, həmçinin idmançılara və azarkeşlərə minnətdarlığını bildirib.

Sonra F.Qayıbov çempionatı açıq elan edib.

Sonra Əməkdar artist Sevda Ələkbərzadənin ifasında Azərbaycan Respublikasının dövlət himni səsləndirilib və rəsmi hissəyə yekun vurulub.

Açılış mərasimi gimnastika üzrə milli komandalarımızın üzvlərinin və xoreoqrafiya qrupunun ifasında “Bizim qəhrəmanlar” kompozisiyası ilə davam edib. Kompozisiyanın qəhrəmanları bir zamanlar paralel dünyada yaşayan iki qardaş – Su adam və Alov adam təşkil ediblər. Rəvayətə görə, bir gün qardaşlar oyun oynayırlar. Bu oyun zamanı Su adam qardaşına qalib gələrək 8 medal qazanır. Qəzəblənən Alov adam qardaşını insanların dünyasına qovur. İnsanların dünyasında Su adam super qəhrəmanların komandası ilə tanış olur. Bu qəhrəmanlar ona öz dünyasına qayıtmağa və qardaşının ordusuna qalib gəlməyə kömək edirlər. Bu yaxşılığın qarşılığında Su adam qazandığı medalları intiqam almaqda ona kömək edən bütün döyüşçülərə paylayır, sonuncu medalı isə sülh və dostluq əlaməti olaraq öz qardaşına – Alov adama verir. Kompozisiyanın əsas qayəsi olan səkkiz medal Avropa çempionatının səkkiz dəst medalını təcəssüm etdirir.

Dörd gün davam edəcək çempionatın fərdi proqramında böyük gimnastlar, qrup hərəkətləri proqramında isə gənc komandalar məharətlərini göstərəcəklər. Çempionatda 35 ölkədən gimnastlar iştirak edirlər.

Xatırladaq ki, 2007-ci, 2009-cu və 2014-cü illərdə də bədii gimnastika üzrə Avropa çempionatı Bakıda keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.