Bakı, 11 sentyabr (AZƏRTAC, M.Əlioğlu, M.İsayev). Sentyabrın 11-də Bakı Ekspo Mərkəzində birinci Azərbaycan Beynəlxalq müdafiə sənayesi “ADEX 2014” sərgisinin açılışı olub.

AZƏRTAC xəbər verir ki, mərasimdə dövlət və hökumət rəsmiləri, xarici ölkələrin Azərbaycandakı səfirliklərinin, beynəlxalq təşkilatların təmsilçiləri, bir sıra ölkələrin müdafiə nazirliklərinin nümayəndələri iştirak ediblər.

Tədbirdə Azərbaycan Respublikası Prezidentinin müdafiə məsələləri üzrə köməkçisi, Prezident Administrasiyası rəhbərinin müavini, general-leytenant Vahid Əliyev Azərbaycan Prezidenti İlham Əliyevin sərgi iştirakçılarına təbrik məktubunu oxudu.

Müdafiə sənayesi naziri Yavər Camalov çıxış edərək ölkəmizdə və regionda ilk dəfə keçirilən Azərbaycan Beynəlxalq müdafiə sənayesi “ADEX 2014” sərgisinin açılması münasibətilə nümayəndə heyətlərini, şirkətlərin təmsilçilərini və ziyarətçiləri salamladı.

Nazir diqqətə çatdırdı ki, sərginin Azərbaycanda keçirilməsi təsadüfi deyil. Ermənistanın hərbi təcavüzü nəticəsində Azərbaycan ərazilərinin 20 faizi işğal olunub, bir milyondan çox soydaşımız qaçqın və məcburi köçkün vəziyyətinə düşüb. Respublikamızın müharibə şəraitində olması nəzərə alınaraq Azərbaycanın müdafiə qüdrətinin möhkəmləndirilməsi məqsədilə həyata keçirilən mühüm tədbirlərdən biri məhz Müdafiə Sənayesi Nazirliyinin yaradılması olub. Ümummilli lider Heydər Əliyevin qurucusu olduğu müstəqil Azərbaycan Respublikası uğurlu inkişaf yolu keçib.

Bildirilib ki, Azərbaycan Prezidenti, Silahlı Qüvvələrin Ali Baş Komandanı İlham Əliyevin məqsədyönlü siyasəti ölkəmizdə güclü iqtisadi və hərbi potensialın formalaşması ilə nəticələnib.

Artıq ölkəmizdə müasir texnologiyalara əsaslanan müdafiə sənayesi müəssisələrinin fəaliyyətə başladığını deyən Y.Camalov bildirib ki, Azərbaycanın hərbi qüdrəti durmadan artır. Azərbaycan Silahlı Qüvvələri peşəkarlıq, nizam-intizam, silah-sursat, texniki təchizat və döyüş qabiliyyəti baxımından Cənubi Qafqazın ən güclü ordusuna çevrilib.

Nazir son illərdə ölkəmizin müdafiə sənayesinin uğurla inkişaf etdiyini xüsusi vurğulayıb. Diqqətə çatdırıb ki, müdafiə sənayesi müəssisələri tərəfindən buraxılan hərbi təyinatlı məhsulların çeşidi artıb. Milli Ordumuzun müasir silah növləri ilə təchiz edilməsi üçün zəruri addımlar atılıb. Ən müasir silahlarla təchiz olunmuş Azərbaycan Ordusu bu gün ərazilərimizi işğaldan azad etmək də daxil olmaqla, qarşıya qoyulan bütün vəzifələri yerinə yetirməyə qadirdir.

Qeyd edilib ki, “ADEX 2014” sərgisində dünyanın 34 ölkəsindən 200 şirkət və rəsmi nümayəndə heyəti iştirak edir. Bu, bir daha sübut edir ki, 2005-ci ildən fəaliyyətə başlayan Müdafiə Sənayesi Nazirliyi ötən müddətdə hərbi-texniki əməkdaşlıq sahəsində böyük uğurlar qazanıb. Müxtəlif ölkələrin hərbi sənaye kompleksləri ilə əməkdaşlıq əlaqələrinin qurulması artıq öz bəhrəsini verməkdədir. Hazırda ölkəmizdə doqquz yüz adda müxtəlif hərbi təyinatlı məhsul istehsal edilir.

Y.Camalov vurğulayıb ki, dost və tərəfdaş ölkələrlə əməkdaşlıq əlaqələrinin möhkəmləndirilməsi hərbi texnika, silah, döyüş sursatları istehsal edən müəssisələrimizin tamamilə yenidən qurulmasına imkan yaradıb. Həyata keçirilən tədbirlər nəticəsində bu gün Azərbaycanın Müdafiə Sənayesi Nazirliyinin tabeliyində olan müəssisələrdə qabaqcıl dünya və NATO standartlarına cavab verən məhsullar istehsal edilir.

Müdafiə sənayesi naziri sonda diqqətə çatdırıb ki, “ADEX 2014” sərgisi iştirakçılar arasında yeni əməkdaşlıq sahələrini müəyyən edəcək, əlaqələrin daha da genişləndirilməsinə öz töhfəsini verəcək.

Sonra tədbir iştirakçıları sərgi ilə tanış olublar.

Sərgidə Azərbaycan, Türkiyə, Rusiya, Belarus, Koreya Respublikası, Polşa, İsrail və Ukraynanın milli qrupları öz ekspozisiyalarını nümayiş etdirirlər. “ADEX 2014”də Azərbaycan, Türkiyə, Polşa, İsrail və Belarus ekspozisiyalarının miqyası ilə fərqlənirlər.

Sərginin platin sponsoru Niderland Krallığının “Damen Shipyards Group” gəmiqayırma şirkəti, təşkilati tərəfdaşları isə “Iteca Caspian” və “Caspian Event Organisers” şirkətləridir. Sərginin qızıl sponsoru qismində Türkiyənin “Roketsan” şirkəti çıxış edir. “ADEX 2014” sərgisinə olan böyük maraq beynəlxalq aləmdə Azərbaycanın mühüm strateji tərəfdaş kimi yüksək rolunu və əhəmiyyətini bir daha təsdiq edir.

“ADEX 2014”də Azərbaycan Respublikası Müdafiə Sənayesi Nazirliyinin 168 adda müdafiə təyinatlı məmulatı nümayiş etdirilir.

Sərgidə sənaye müəssisələrinin əldə etdikləri ən yeni nailiyyətlər, quru qoşunları və hərbi-dəniz qüvvələrinin silah və texnikaları, aviasiya və aviasiya silahları, hava hücumundan müdafiə üzrə sistem və vasitələr, xüsusi təyinatlı vasitələr, informasiya texnologiyaları, rabitə sistemləri, ordunun inzibati və texniki təminatı, kosmik texnologiyalar istiqamətləri üzrə məhsullar nümayiş olunur.

Sərgi sentyabrın 13-dək davam edəcək.