CƏMİYYƏT


Bakıda dini ekstremizm və radikalizmlə mübarizəyə həsr olunmuş seminar-müşavirə keçirilib

Bakı, 13 may, AZƏRTAC

Azərbaycan Respublikası Səhiyyə Nazirliyinin və Dini Qurumlarla İş üzrə Dövlət Komitəsinin (DQİDK) birgə təşkilatçılığı ilə dini ekstremizm və radikalizmlə mübarizəyə həsr olunmuş seminar-müşavirə keçirilib.

AZƏRTAC xəbər verir ki, tədbirdə Dövlət Komitəsinin, Bakı Baş Səhiyyə İdarəsinin, eləcə də Baş İdarənin tabeliyində olan tibb müəssisələrinin rəhbərləri iştirak ediblər.

DQİDK-nin sədr müavini Səyavuş Heydərov qeyd edib ki, belə tədbirlərin keçirilməsində əsas məqsəd dini radikalizmlə mübarizə sahəsində maarifləndirmə işinin aparılmasından ibarətdir. Xarici ölkələrdəki bəzi dairələr tərəfindən İslamın terrorla eyniləşdirildiyini diqqətə çatdıran sədr müavini vurğulayıb ki, Yaxın Şərq ölkələrində gedən proseslər İslam dinini gözdən salmaq istəyən qüvvələrin məkrli siyasətinin nəticəsidir. Dünyada qlobal təhlükəsizlik problemlərinin əsasını dini və etnik zəmindəki münaqişələrin təşkil etdiyini bildirən sədr müavini respublikamızda dinlərarası və millətlərarası münaqişələrin baş vermədiyini bildirib. S.Heydərov Prezident İlham Əliyevin rəhbərliyi ilə Azərbaycanda ictimai-siyasi sabitliyin mövcud olduğunu diqqətə çatdırıb. Onun sözlərinə görə, ölkəmiz sabitlik, tolerantlıq və multikulturalizm nümunəsidir. O, Bakıda keçirilən mədəniyyətlərarası və humanitar forumların əhəmiyyətindən də danışıb, bunu ölkəmizin, xüsusilə dövlətimizin başçısının dinlərarası və sivilizasiyalararası dialoqa verdiyi töhfənin təzahürü kimi qiymətləndirib.

Dini radikalizmlə mübarizədə hər kəsi ayıq-sayıq olmağa çağıran DQİDK-nın sədr müavini deyib ki, dini ekstremizm və radikalizmlə mübarizə ümumxalq işinə çevrilməlidir.

Sonra təqdimatla çıxış edən Komitənin sədr müavini Gündüz İsmayılov bildirib ki, əsası ümummilli lider Heydər Əliyev tərəfindən qoyulan dövlət-din münasibətləri və ölkəmizdə mövcud olan məzhəblərarası vəhdət bütün dünya üçün bir nümunədir. Azərbaycanda müsəlmanlar ölkə əhalisinin 96 faizini təşkil edirlər. İslam dini ölkəmizdə təkcə ibadət ediləcək inanclar sistemi deyil, eyni zamanda, xalqımızın mədəniyyətinin tərkib hissəsidir. Dini ekstremizmin sosial və ictimai zərərləri, eləcə də dini radikalizmə qarşı mübarizə tədbirləri haqqında məlumat verən sədr müavini qeyd edib ki, radikal dini cərəyanların yayılması cəhdlərinin qarşısının alınması üçün milli-mənəvi, xüsusilə dini dəyərlərin təbliği düzgün aparılmalıdır. G.İsmayılov bildirib ki, müasir cəmiyyətdə dini dəyərlərin düzgün təbliğində, dini radikalizmə qarşı mübarizədə maarifçilik əsas silahdır. Dini radikalizmin yaranma səbəblərinə və onun fəsadlarına toxunan sədr müavini deyib ki, bəzi qruplar sülh və əmin-amanlıq dini olan İslamı siyasiləşdirərək, qarşıdurma yaratmaqla onu gözdən salmağa yönələn siyasət həyata keçirirlər.

Tədbirdə Dövlət Komitəsinin sifarişi ilə hazırlanmış “Şəhadət” sənədli filmi nümayiş etdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.