Bakı, 31 may, AZƏRTAC

Mayın 31-də Beynəlxalq Miqrasiya Təşkilatının Azərbaycandakı nümayəndəliyi (BMqT) Azərbaycan Respublikası Xarici İşlər Nazirliyi ilə birgə “İnsan alveri ilə mübarizə sahəsində diplomatik nümayəndəliklərin rolu” mövzusunda seminar keçirib.

AZƏRTAC xəbər verir ki, tədbir Avropa İttifaqı və BMqT İnkişaf Fondu tərəfindən birgə maliyyələşdirilən Azərbaycanda İnsan alveri ilə mübarizədə milli potensialın gücləndirilməsi (ENCT) layihəsi çərçivəsində təşkil olunub.

Seminarda diplomatik nümayəndəliklərin, o cümlədən Avropa İttifaqına üzv dövlətlərin səfirliklərinin, eləcə də Moldova, Gürcüstan, Türkiyə və Ukraynanın Bakıdakı səfirlikləri, beynəlxalq təşkilatların və Azərbaycan Respublikasının müvafiq dövlət orqanlarının təmsilçiləri yerli və beynəlxalq miqyasda insan alveri ilə mübarizədə təcrübə, yanaşma və bacarıqların mübadiləsi imkanı əldə ediblər.

Seminarın açılış mərasimində BMqT-nin Azərbaycandakı nümayəndəliyinin rəhbəri Vladimir Qjorjiyev, Avropa İttifaqının Azərbaycandakı nümayəndəliyinin rəhbəri, səfir Kestutis Jankauskas, insan alverinə qarşı mübarizə sahəsində mühüm işlər görən Azərbaycan Hökumətinin səylərini, tərəfdaşlığını və əməkdaşlığını yüksək qiymətləndiriblər.

Xarici İşlər Nazirliyinin Konsulluq şöbəsinin rəisi Faiq Bağırov Azərbaycanda insan alverinə qarşı mübarizə sahəsində görülmüş işlərdən danışıb.

Faiq Bağırov Azərbaycan dövlətinin miqrasiya, konsulluq, xüsusilə də insan alveri ilə mübarizə sahəsində həyata keçirdiyi silsilə və vacib tədbirləri qeyd edib. Bildirib ki, Azərbaycanda insan alverinə qarşı mübarizə sahəsində kompleks tədbirlər görür. Bu istiqamətdə böyük nailiyyətlər əldə olunub. Ölkəmizin bu sahədə təcrübəsi bir sıra digər ölkələr üçün nümunədir. Azərbaycan insan alverinə qarşı mübarizə sahəsində ardıcıl və məqsədyönlü siyasət həyata keçirir. Ölkəmiz “Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı”nı uğurla həyata keçirib və hazırda yeni fəaliyyət planı üzərində iş aparılır. Son illər ərzində Azərbaycan insan alveri ilə mübarizə sahəsi üzrə ikitərəfli və çoxtərəfli formatda xarici ölkələrlə, o cümlədən BMT, BMqT, ATƏT, İslam Əməkdaşlıq Təşkilatı, Avropa Şurası kimi bir sıra beynəlxalq təşkilatlarla səmərəli əməkdaşlıq edir.

Daxili İşlər Nazirliyinin İnsan Alverinə Qarşı Mübarizə Baş İdarəsinin rəisi, polis general-mayoru Heydər Heydərov Azərbaycan dövlətinin güclü siyasi iradəsi sayəsində insan alverinə qarşı mübarizədə dünya standartlarına uyğun institusional islahatların aparıldığını, zəruri təşkilati və praktiki tədbirlərin həyata keçirildiyini deyib.

General-mayor Heydər Heydərov çıxışında insan alveri ilə mübarizədə Azərbaycan Hökumətinin, Daxili İşlər Nazirliyinin həyata keçirdiyi tədbirlərə toxunaraq, insan alveri ilə mübarizə üzrə son statistik məlumatları təqdim edib. Bildirib ki, ötən 5 ildə Azərbaycanda qeydə alınmış 755 insan alveri və məcburi əmək cinayəti üzrə 169 şəхs məhkəmə məsuliyyətinə cəlb olunub. Həyata keçirilmiş əməliyyat-axtarış tədbirləri ilə beynəlxalq cinayətkar şəbəkənin Azərbaycanda fəaliyyət göstərməsinin qarşısı alınıb, 2 mütəşəkkil dəstə, 58 cinayətkar qrup zərərsizləşdirilib. Müəyyən edilmiş 356 qurbandan 312-si təhlükəsiz sığınacağa yerləşdirilib və hər birinə birdəfəlik müavinət, 280 qurbana isə Kömək Fondundan yardımlar verilib. Daha 124 nəfər işlə təmin edilib, 188 nəfər peşə kurslarına cəlb olunub və onların bir çoxu Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun nəzdində İnsan Alveri Qurbanlarına Yardım Mərkəzində qeydiyyata götürülüb. Səhiyyə Nazirliyi tərəfindən isə 706 insan alveri qurbanına və potensial qurbana ciddi yardım göstərilib. İnsan alverinin və məcburi əməyin qarşısının alınması sahəsində fəaliyyətin səmərəliliyi nüfuzlu beynəlxalq təşkilatların aidiyyəti sənədlərində də xüsusi vurğulanır. Belə ki, Avropa Şurasının “İnsan alverinə qarşı mübarizə haqqında” Konvensiyasının Tərəflər Komitəsinin, Avropa Şurasının müvafiq sahədə ekspertlər qrupunun, ATƏT-in xüsusi nümayəndəsinin, BMqT-nin, ABŞ dövlət Departamentinin və digər nüfuzlu beynəlxalq qurumların hesabatlarında “Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı”nın icrası üzrə görülmüş işlər təqdirəlayiq hesab olunub, əldə edilmiş tərəqqi xüsusi vurğulanıb. Bu növ cinayətlərlə mübarizənin aidiyyəti dövlət orqanları və vətəndaş cəmiyyəti institutları ilə birgə sistemli şəkildə davam etdirilməsi məqsədilə 2019-2023-cü illəri əhatə edən sayca dördüncü yeni Milli Fəaliyyət Planının layihəsi hazırlanıb təqdim edilib.

Seminarda DİN-in İnsan Alverinə qarşı Mübarizə Baş İdarəsinin şöbə rəisi İlkin Qurbanov “Azərbaycanda insan alverinə qarşı mübarizə: Milli Fəaliyyət Planı və milli istiqamətləndirmə mexanizmi” mövzusunda məruzə ilə çıxış edib.

Seminarda müzakirə olunan mövzular arasında insan alverinə dair məlumatların mübadiləsi üzrə müvafiq dövlət orqanları arasında koordinasiyada çətinliklər və ən yaxşı təcrübələr, insan alveri haqqında diplomatik nümayəndəliklərdə məlumatlılığın artırılması, səfirliklər tərəfindən təyinat ölkəsində insan alveri qurbanlarına ilk kömək göstərilməsi və insan alverinə qarşı mübarizə sahəsində konsulluqların yardımı və dəstəyi yer alıb.

Seminarda, həmçinin məlumat mübadiləsi və ciddi ehtiyac içində olan miqrantlara köməyin göstərilməsi, diplomatik missiyaların öz təcrübələri, dövlətlər arasında komanda işinin vacibliyi, insan alveri ilə bağlı cinayətlərin qarşısının alınması, qurbanların qorunması, cinayətkarların təqibi və bu sahədə tərəfdaşlığın təmin olunması üçün görülmüş səmərəli tədbirlər müzakirə olunub.

Qeyd edək ki, ENCT layihəsinin məqsədi insan alverinə qarşı mübarizədə və insan alveri qurbanlarını qorumaq üçün Azərbaycan Hökumətinin imkanlarını gücləndirməkdir.