İQTİSADİYYAT
Bakıda keçiriləcək ilk Avropa Olimpiya Oyunları ilə əlaqədar Nəqliyyat Nazirliyinə həvalə olunmuş bütün işlərin icrası vaxtında və yüksək səviyyədə təmin olunacaqdır
Bakı, 7 mart (AZƏRTAC). Bakıda keçiriləcək ilk Avropa Olimpiya Oyunlarına hazırlıq dövründə və oyunların keçiriləcəyi müddətdə Nəqliyyat Nazirliyinə həvalə olunmuş bütün işlərin icrası vaxtında və yüksək səviyyədə təmin olunacaqdır.
AZƏRTAC xəbər verir ki, bunu nəqliyyat naziri Ziya Məmmədov demişdir.
Nazir bildirmişdir ki, ilkin məlumata görə, 49 ölkənin iştirak edəcəyi bu tədbirdə rəsmi heyətlərin ölkəyə gəlişi və gedişi üçün əsas nəqliyyat bağlantıları olaraq Heydər Əliyev Beynəlxalq Hava Limanı, Bakı Dəmir Yolu Vağzalı, avtomobil nəqliyyatı strukturları nəzərdə tutulur. Qonaqların əksəriyyətinin gəliş-gedişi Heydər Əliyev Beynəlxalq Hava Limanı vasitəsilə planlaşdırılır ki, bu da proqnozlara görə iştirakçıların təxminən 90 faizini əhatə edəcəkdir.
Nəqliyyat xidmətlərinin göstərilməsində rəsmi heyətlərin xüsusi yer tutduğunu qeyd edən Z.Məmmədov demişdir ki, onlara ayrıca nəqliyyat vasitələrinin ayrılması təmin ediləcəkdir. Olimpiada vaxtı bu şəxslərin, həmçinin idmançıların və onları müşayiət edənlərin Olimpiya şəhərciyindən Olimpiya stadionuna və idman oyunlarının keçiriləcəyi digər obyektlərə, eləcə də turist gəzintilərinə daşınması həyata keçiriləcəkdir.
Bu xidmətlərin təşkili məqsədi ilə tərəfimizdən Bakı şəhərində nəqliyyat problemlərinin aradan qaldırılması üçün 2013-2014-cü illərə dair Tədbirlər Planının layihəsi hazırlanmışdır və Təşkilat Komitəsində baxılacaqdır. Əsas tədbir və oyunların keçiriləcəyi Bakı Olimpiya Stadionuna gedən yolların, bağlantıların tikintisi vacib məsələlərdən biridir. Hazırda Ziya Bünyadov prospektinin yenidən qurulması və prospekt üzərində yol qovşaqlarının tikintisi davam etdirilir və 2014-cü ilin əvvəllərində yekunlaşdırılacaqdır. Heydər Əliyev və Ziya Bünyadov prospektlərinə paralel olan Həsən Əliyev küçəsinin sonundan Keşlə stansiyasına və Ziya Bünyadov prospekti üzərindən Olimpiya stadionuna birbaşa yolun tikintisinə yaxın günlərdə başlanılacaq və 2015-ci ilin birinci rübündə başa çatdırılacaqdır. Həmçinin Buzovna-Mərdəkan-Qala və Qala-Zığ şosesi yolu 2014-cü ilin birinci yarısında yekunlaşdırılacaqdır. Şəfa stadionun qarşısındakı tunel və yeraltı piyada keçidi, Maştağa-Buzovna yolu, Qələbə meydanı qovşağı bu il istismara veriləcəkdir. Sadalanan bu yollar Olimpiya Oyunları zamanı nəqliyyatın əsas marşrutlarını əhatə edir. Bundan başqa, şəhərin digər mövcud yollarında da təmir-bərpa və genişləndirmə işləri aparılacaqdır. Eyni zamanda, respublika və yerli əhəmiyyətli yollarda da işlər davam etdirilir.
Qonaqların gəliş-gedişinin təmin ediləcəyini və yüksək səviyyədə xidmətin göstəriləcəyini deyən Z.Məmmədov demişdir ki, bu məqsədlə Bakı Dəmir Yolu Vağzalında yenidənqurma işləri davam etdiriləcək və vaxtında yekunlaşdırılacaqdır. Həmçinin Bakıda ictimai nəqliyyatın fəaliyyətinin təkmilləşdirilməsi tədbirləri davam etdiriləcək, avtobuslarda elektron ödəmə sisteminə keçid təmin olunacaqdır. Vətəndaşlarımıza və qonaqlara yüksək səviyyədə xidmət göstərilməsi üçün mövcud avtobus parkı əsaslı şəkildə bərpa ediləcək və yeniləşdiriləcəkdir. Qeyd etmək lazımdır ki, Bakı şəhərində əlavə olaraq 1200 yeni avtobusa və 2000 taksiyə ehtiyac vardır. Şübhəsiz ki, hazırlıq işləri dövründə həllini gözləyən bir sıra məsələlər də olacaqdır ki, bununla bağlı tərəfimizdən zəruri tədbirlər görüləcək və Təşkilat Komitəsinə müvafiq hesabatlar təqdim olunacaqdır.