İDMAN
Bakıda keçiriləcək para-cüdo üzrə Qran-Pri yarışlarının qaliblərinə “Cırtdan”ın kimonoda olan fiquru hədiyyə ediləcək
Bakı, 22 yanvar, AZƏRTAC
Mayın 11-13-də Bakıda keçiriləcək para-cüdo üzrə Qran-Pri yarışlarının qaliblərinə Azərbaycan xalq nağılının qəhrəmanı olan “Cırtdan”ın kimonoda olan fiquru hədiyyə ediləcək.
Azərbaycan Respublikası Milli Paralimpiya Komitəsindən (ARMPK) AZƏRTAC-a bildiriblər ki, əlil arabası istifadəçisi Bahar Şıxıyeva belə bir təşəbbüslə çıxış edib. O, öz əl işi olan kuklanı ARMPK-nın rəhbərliyinə təqdim edib. B.Şıxıyeva cüdo yarışlarında qalib gələn hər bir idmançı üçün “Cırtdan” fiqurunu hazırlaya biləcəyini söyləyib.
ARMPK təşəbbüsü bəyənərək həmin hədiyyələrin B.Şıxıyeva tərəfindən qaliblərə şəxsən təqdim olunması barədə qərar qəbul edib. Komitənin dəstəyi ilə B.Şıxıyeva həmin hədiyyədən 70 ədəd hazırlayacaq.
“Tokio 2020” Yay Paralimpiya Oyunlarına lisenziya xalı qazandıran yarış şəhərimizdə ilk dəfə keçiriləcək. Yarışda 43 ölkədən 250 idmançı iştirak edəcək.