İDMAN
Bakıda su polosu üzrə beynəlxalq turnirin açılış mərasimi olub
Bakı, 7 may, Səxavət Quliyev, AZƏRTAC
Ümummilli lider Heydər Əliyevin anadan olmasının 92-ci ildönümü münasibətilə Bakı Su İdmanı Sarayında keçirilən su polosu üzrə beynəlxalq turnirin mayın 7-də açılış mərasimi olub.
AZƏRTAC xəbər verir ki, Azərbaycan Üzgüçülük Federasiyası və Gənclər və İdman Nazirliyi tərəfindən təşkil olunan yarışda yığmamız ilə yanaşı, Macarıstan, İtaliya, Rusiya, Türkiyə, Yunanıstan, Gürcüstan və Qazaxıstan komandaları iştirak edir. Turnir ilk Avropa Oyunlarında mübarizə aparacaq millimiz üçün test xarakteri daşıyıb.
Əvvəlcə turnirdə iştirak edən komandalar hovuz kənarına dəvət olunublar.
Ölkəmizdə idmana göstərilən dövlət qayğısından danışan Azərbaycan Üzgüçülük Federasiyasının prezidenti Xanlar Fətiyev turnirin bundan sonra ənənəvi xarakter daşıyacağını yarış iştirakçılarının diqqətinə çatdırıb. Qeyd edib ki, yarışın keçirildiyi məkan qısa müddət ərzində inşa olunub. Burada yaradılan infrastruktur beynəlxalq standartlara tam cavab verir. Turnirin yüksək səviyyədə təşkil olunduğunu diqqətə çatdıran federasiya prezidenti layiqli komandanın qalib gələcəyinə əminliyini ifadə edib.
Azərbaycanda idman siyasətinin əsasının ümummilli lider Heydər Əliyev tərəfindən qoyulduğunu deyən gənclər və idman nazirinin müavini İsmayıl İsmayılov atletlərimizin beynəlxalq arenalarda qazandıqları nailiyyətlər barədə məlumat verib. Vurğulayıb ki, ölkəmiz möhtəşəm idman bayramı ərəfəsindədir. Tarixdə ilk dəfə təşkil olunacaq birinci Avropa Oyunları təkcə qitənin deyil, bütün dünyanın diqqətini iyunda paytaxtımıza yönəldəcək. İyirmi idman növü üzrə təşkil olunacaq ilk Avropa Oyunlarında qitənin 6 mindən çox güclü atleti birincilik uğrunda mübarizə aparacaqdır.
Milli Məclisin deputatı Rauf Əliyev ölkəmizdə idman sahəsində qazanılan nailiyyətlərdən danışıb və paytaxtımızın ilk Avropa Oyunlarını qəbul etməyə tam hazır olduğunu bildirib.
Sonra Beynəlxalq Su Polosu Federasiyasının prezidenti Paollo Barellinin turnir iştirakçılarına təbrik məktubu oxunub.
Turnir açıq elan edildikən sonra dövlət himni səsləndirilib.
Yarışda 8 komanda iki qrupda əvvəlcə dairəvi sistem, sonra isə yerlər uğrunda mübarizə aparacaq.
Mayın 9-dək davam edəcək yarışın qalibləri medal, diplom və qiymətli hədiyyələrlə təltif olunacaq.