Bakı, 4 iyun, Pərvanə İmanova, AZƏRTAC

Bakıda yeni yaradılmış “Liatris Travel” turizm şirkətinin açılışı olub.

AZƏRTAC xəbər verir ki, tədbirdə şirkətin səyahət, sağlamlıq, istirahət, aviauçuşlar sahəsində təqdim etdiyi imkanlar, müxtəlif turpaketlər və digər xidmətlər barədə məlumat verilib. Həmçinin “Liatris Travel”in dünyanın müxtəlif ölkələrindəki turizm və səyahət şirkətləri ilə əməkdaşlığından bəhs edən videoçarxlar göstərilib.

Açılış mərasimində “Liatris Holding”in baş direktoru Ruhi Əliyeva bu qurumun tərkibinə daxil olan “Liatris Travel” şirkəti barədə məlumat verib. Bildirilib ki, peşəkar turizm agentlərinin çalışdıqları şirkət müştəri məmnuniyyətini, rahat və keyfiyyətli istirahəti, yüksək səviyyədə səyahətin təşkilini özünün başlıca prioriteti hesab edir. Xidmətlərə dünyanın istənilən ölkə və şəhərinə turların təşkili, məşhur müalicə ocaqlarının və sanatoriyaların bronlaşdırılması (tibbi tur), münasib, sərfəli qiymətlərə aviabiletlərin təşkili və digər xidmətlər daxildir. Bu işdə böyük komanda ilə çalışacaqlarını deyən R.Əliyeva turizm sahəsində peşəkar insanlarla görüşdüyünü və müxtəlif şirkətlərlə əməkdaşlıq etdiklərini vurğulayıb.

Bildirilib ki, qarşıda moda, zinət əşyaları və digər sahələrlə bağlı maraqlı layihələr var.

R.Əliyeva insanların xarici ölkələrdə rahat şəkildə dincəlmələri və səyahət etmələri üçün “Liatris Travel” tərəfindən təqdim olunan xidmətlərdən və yeniliklərdən söz açıb. Bildirilib ki, cəmiyyətin bütün təbəqəsindən olan insanların rahat, sərfəli, güzəştli şəkildə səyahət və istirahət etmələri üçün şirkət tərəfindən münasib qiymətlərə turpaketlər təqdim olunur. “Liatris Travel” vasitəsilə dünyanın istənilən ölkə və şəhərinə, maraqlı məkanlara, məşhur muzeylərə səyahət etmək mümkündür. Müxtəlif turpaketlərə aviabilet, sığorta, oteldə qonaqlama, qidalanma, transfer, viza dəstəyi, müşahidəçi və digər xidmətlər daxildir. “Liatris Travel” tərəfindən təqdim olunan yenilikləri diqqətə çatdıran R.Əliyeva bildirib ki, şirkət tərəfindən müalicəvi, tibbi səyahət turları da təşkil edilir. Belə ki, sağlamlığının qorunmasını təmin etmək, əziyyət çəkdiyi xəstəliklərdən etibarlı müalicə yolu ilə xilas olmaq istəyənlər dünyanın məşhur xəstəxanalarına və sanatoriyalarına güzəştli qiymətlərlə müalicəvi turpaketlərdən faydalana bilərlər. Şirkət, həmçinin Türkiyənin məşhur tibb ocaqlarında müalicə olunmağı arzulayanların da istəyini nəzərə alıb. Belə ki, şirkət qardaş ölkənin məşhur xəstəxana və həkimlərinin qəbulunu, eyni zamanda, həmin şəhərə aviabilet, istirahət üçün otel, hava limanı transferi, qonaqlama xidmətlərini təqdim etməklə tam komfortlu səyahət təşkil edir.

Diqqətə çatdırılıb ki, “Liatris Travel” tərəfindən müştərilər üçün xarici ölkələrlə yanaşı, Azərbaycanın dilbər guşələrində, sanatoriyalarında istirahət və müalicə almaq imkanı yaradılıb. Yetmişdən çox xəstəliyin müalicəsində əvəzsiz rol oynayan məşhur Naftalan vannaları qəbul etmək istəyən müştərilər şirkətin təqdim etdiyi sərfəli turpaketlərdən faydalana bilərlər.

Açılış mərasimində “Liatris Travel” şirkətinin icraçı direktoru Orxan Məmmədli təqdim olunan xidmətlər və gələcək planlar barədə məlumat verib. Bildirilib ki, müştərilərin rahat şəraitdə səyahət və istirahət etmələri üçün şirkət tərəfindən lazımi xidmətlər təqdim olunur. Məqsəd insanların heç bir əziyyət çəkmədən, dünyanın istənilən şəhər və ölkəsinə, eyni zamanda, tarixi məkanlara, maraqlı yerlərə səyahətlərini yüksək səviyyədə təmin etməkdir. O.Məmmədli deyib: “Müştərilərimizin istər getdikləri ölkə və məkanda, istərsə də hava limanı və oteldə rahat qarşılanmasını, yerləşdirilməsini heç bir problem yaşanmadan həyata keçirməyi qarşıya məqsəd qoymuşuq”.

Şirkətin icraçı direktoru insanların rahat şəkildə xaricdə müalicə almaları üçün “Liatris Travel” tərəfindən təqdim olunan tibbi turpaketlərin üstünlüklərindən söz açıb. Bildirilib ki, müalicəvi səyahət turları vasitəsilə şirkət tərəfindən müştərilərin heç bir əziyyət çəkmədən dünyanın istənilən məşhur xəstəxana və həkimlərinin qəbuluna yazılmaq təşkil edilir. Ən sərfəli qiymətlərlə təklif olunan bu turpaketlərə Türkiyə, Almaniya, İsrail və digər ölkələrin məşhur tibb ocaqlarında, həmçinin Kislovodsk, Truskavets istirahət mərkəzləri və sanatoriyalarında bütün xəstəliklərin müayinə və müalicəsi, eləcə də digər xidmətlər daxildir.

O.Məmmədli sərfəli və keyfiyyətli səyahət etmək istəyənlərə “Liatris Travel” şirkətini seçməyi tövsiyə edib. Onlar dünyanın romantik ölkələrinə - Fransaya, Baliyə, ərəb dünyasının ecazkar şəhərlərinə, xüsusilə Dubaya, zövqlə istirahət etmək istəyənlər isə əsrarəngiz Bodrum, Antalya, İstanbul, Şimali Kipr, London, Berlin, İspaniya, İtaliya və İsrailə turpaketlərdən faydalana bilərlər. O deyib: “Həmçinin unudulmaz Maldiv, müalicəvi Mirqorod, Şri-Lanka, Monteneqro və digər ölkələrə və tarixi məkanlara, məşhur muzeylərə səyahətinizi “Liatris Travel” ilə edə bilərsiniz. Əminik ki, şirkət tərəfindən sizin üçün nəzərdə tutulan müxtəlif turpaketlərdən məmnun qalacaqsınız”.