“Baktelecom”un əməkdaşlarının əməkhaqqı artıb

Bakı, 5 iyul, AZƏRTAC

“Bakı Telefon Rabitəsi” MMC (“Baktelecom”) işçilərin sosial vəziyyətinin və rifah halının yaxşılaşdırılması məqsədilə əməkhaqqı islahatı həyata keçirib. Nəticədə fəhlə kateqoriyasından olan bir qisim işçinin əmək haqları orta hesabla 18 faiz artırılıb.

Nəqliyyat, Rabitə və Yüksək Texnologiyalar Nazirliyindən AZƏRTAC-a bildirilib ki, sözügedən kateqoriyadan olan əməkdaşlar iyun ayı üzrə maaşlarını iyuldan müvafiq artımla əldə ediblər. Ümumilikdə əməkhaqqı artımı 500-dək işçiyə şamil edilib.

Əməkhaqqı artımı qurumun fəaliyyətində aparılan optimallaşdırma nəticəsində qənaət olunmuş vəsait hesabına həyata keçirilib. Əməkdaşların rifah halının yüksəldilməsi istiqamətində islahatlar gələcəkdə də davam etdiriləcək.

Eyni zamanda, “Baktelecom” tərəfindən önümüzdəki dövr ərzində işçilərin bilik və bacarıqlarının artırılması, fəaliyyətinin obyektiv qiymətləndirilməsi və motivasiyalarının yüksəldilməsi üçün təlim və tədbirlərin keçirilməsi də nəzərdə tutulub.