REGİONLAR
Balakəndə əkin sahələri ötən illə müqayisədə 10,5 faiz artıb
Balakən, 31 iyul, Mustafa Dadaşov, AZƏRTAC
2016-cı ilin birinci yarısında Balakən rayonunda ümumi məhsul buraxılışının həcmi 62,3 milyon manat təşkil edib. Məhsul buraxılışı ötən ilin eyni dövrü ilə müqayisədə 2,7 faiz artıb. Müddət ərzində rayonda 2,4 milyon manatlıq sənaye, 24,7 milyon manatlıq kənd təsərrüfatı məhsulları istehsal edilib, 2,2 milyon manatlıq tikinti işləri görülüb.
AZƏRTAC xəbər verir ki, bu barədə iyulun 30-da Balakəndə 2016-cı ilin birinci yarısının yekunları və qarşıda duran vəzifələrə həsr olunmuş müşavirədə məlumat verilib.
Hesabat məruzəsində bildirilib ki, iqtisadiyyatının əsasını kənd təsərrüfatı məhsulları istehsalı təşkil edən Balakən rayonunda ötən dövrdə aqrar sahənin mövcud potensialının üzə çıxarılması, əkin sahələrinin, torpaqlardan istifadənin səmərəliliyinin artırılması istiqamətində zəruri işlər görülüb, nəticədə payızlıq taxıl və yazlıq bitkilərin əkin sahələri əvvəlki illə müqayisədə 10,5 faiz artıb.
Diqqətə çatdırılıb ki, qarğıdalı bitkisinin əkin sahəsinə görə Balakən rayonu bu il də respublikada birinci yerdə qərar tutub. Belə ki, bu il rayonun təsərrüfatlarında 7 min 244,5 hektar sahədə qarğıdalı əkilib. Əlverişli keçən iqlim şəraiti bu il rayonda bol qarğıdalı istehsal olunacağından xəbər verir və sahələrdən 45 min ton məhsul gözlənilir.
Məruzədə qeyd olunub ki, Prezident İlham Əliyevin mövcud iqtisadi potensialdan daha səmərəli istifadə edilməsi ilə bağlı verdiyi tapşırıqlar Balakən rayonunda da uğurla icra olunur. Belə ki, son illər ərzində ilk dəfə olaraq cari mövsümdə Balakən rayonunda 501 hektar sahədə “İtiyarpaq” və “Virciniya” növlü tütün əkilib. Hazırda sahələrdə tütün yığımı davam edir. Eyni zamanda, kümçülər “Şəki-İpək” ASC ilə bağlanmış müqaviləyə əsasən, 3,3 ton yaş barama istehsal edərək, müəssisəyə təhvil veriblər. Baramaçılığın yem bazasının möhkəmləndirilməsi üçün yaz aylarında rayon ərazisində 10 min ədəd tut tingi əkilib. Payız mövsümündə daha 50 min tut ağacının əkilməsi və növbəti ildə barama istehsalının 15 tona çatdırılması hədəf kimi müəyyən edilib.
Diqqətə çatdırılıb ki, Balakən taxılçılıq rayonu olmasa da, ötən ilin payızında rayonda taxıl əkini sahələri 2,5 dəfə artırılaraq 1183 hektara çatdırılıb, cari biçin kampaniyası dövründə sahələrdən 3517 ton məhsul götürülüb. Hər hektardan məhsuldarlıq 30 sentner olub.
Qeyd olunub ki, müddət ərzində rayonda əvvəlki illərdə salınmış 187 hektar meyvə bağlarına aqrotexniki xidmət göstərilib, 3,5 hektarda qoz, 139 hektar sahədə isə yeni fındıq bağları salınıb.
Müşavirədə, həmçinin ilin birinci yarısında vətəndaşların qəbulu, onların ərizə və şikayətlərinə baxılması, səyyar qəbullar zamanı qaldırılan məsələlərin həlli istiqamətində görülən işlər ətraflı təhlil olunub, qarşıda duran vəzifələrdən bəhs edilib. Qeyd olunub ki, rayonun kənd təsərrüfatında mövcud olan potensial imkanlar üzə çıxarılmalı, yabanı meyvə və giləmeyvələrin qurudulması və qablaşdırılması, meyvələrdən ekoloji təmiz şirə məhsulları istehsal edilməsi, konsentratların hazırlanması, quşçuluq sahəsinin inkişaf etdirilməsi ilə bağlı zəruri tədbirlər həyata keçirilməli, kənd təsərrüfatı məhsullarının emal sənayesinin inkişaf etdirilməsinə diqqət artırılmalıdır.