Bank VTB (Azərbaycan) ASC-nin çağrı mərkəzinə 47 mindən çox müraciət daxil olmuşdur

Bakı, 8 aprel (AZƏRTAC). Bank VTB (Azərbaycan) ASC-nin çağrı-mərkəzi (call center) fəaliyyətə başladığı dövrdən 47 mindən çox müştərinin müraciətini cavablandırmışdır.

Bankın mətbuat xidmətindən AZƏRTAC-a bildirmişlər ki, 2012-ci ilin oktyabrından fəaliyyət göstərən mərkəzdə 39 min 679 zəng, bankın rəsmi saytındakı onlayn-məsləhət xidməti vasitəsilə 6 min 133 müraciət və 1390-dan artıq onlayn-ərizə qeydə alınmışdır.

Bank VTB (Azərbaycan) ASC-nin çağrı mərkəzinin rəhbəri Ayaz Əhmədov qeyd etmişdir ki, bayram günlərində də müştərilərə fasiləsiz xidmət göstərilir. Çağrı mərkəzi daxil olan zəngləri və kreditlər üzrə bankın saytına daxil olan onlayn-sifarişləri qəbul edir, habelə ödənişi gecikdirən müştərilərlə işləyir. Bundan başqa, mərkəzdə “zəng sifarişi” xidməti də fəaliyyət göstərir: bankın saytında öz telefon nömrəsini yerləşdirmiş müştərilərə çağrı mərkəzinin mütəxəssisi tərəfindən məsləhət xidməti göstərilir. Cari ildə mərkəz vasitəsilə aktiv satışların gerçəkləşməsi və hüquqi şəxslərlə aparılan işin genişləndirilməsi də planlaşdırılır.