İQTİSADİYYAT
Bankların maliyyə texnologiyalarının xərclərinin 48,9 faizi proqram təminatı və lisenziyaların alınmasına yönəldilib
Bakı, 15 noyabr, AZƏRTAC
Bankların maliyyə texnologiyalarına çəkilən xərclərin 48,9 faizi proqram təminatı və lisenziyaların alınmasına yönəldilib.
AZƏRTAC xəbər verir ki, bu barədə Azərbaycan Banklar Assosiasiyasının prezidenti Zakir Nuriyev "Nağdsız iqtisadiyyat: Ənənəvi bankçılıqdan rəqəmsal bankçılığa keçid" mövzusunda Bakıda keçirilən III Beynəlxalq Bankçılıq Forumunda deyib.
O bildirib ki, Azərbaycanda bank sektoru yeni texnologiyaların tətbiqi sahəsində iqtisadiyyatın qabaqcıl sektorları arasında yer alır. 2012-2017-ci illərdə Azərbaycan bank sektorunda maliyyə texnologiyalarının tətbiqinə təqribi hesablamalara görə 310 milyon manat həcmində vəsait yönəldilib ki, bu, qeyd olunan dövrdə bank sektorunun qeyri-faiz xərclərin 8 faizini təşkil edir və sektor tərəfindən əldə edilmiş xalis mənfəətin 25 faizi qədərdir.
Z.Nuriyevin sözlərinə görə, maliyyə texnologiyalarına çəkilən xərclərin 96,5 faizi bir neçə əsas istiqamətin payına düşür. Bunlara 48,9 faizi proqram təminatının və lisenziyaların alınması xərcləri, 16,4 faizi proqram təminatının saxlanması xərcləri, 15,9 faizi rabitə xərcləri, 15,3 faizi server və şəbəkə avadanlıqlarına çəkilən xərclər daxildir.