İQTİSADİYYAT
Bankların rəqəmsallaşmaya hazırlığı qiymətləndiriləcək
Bakı, 19 may, AZƏRTAC
Banklarda effektivliyi artıran rəqəmsallaşma informasiya texnologiyaları arxitekturasına zərurət yaradacaq.
AZƏRTAC xəbər verir ki, bunu Maliyyə Bazarlarına Nəzarət Palatasının ödəniş sistemlərinə nəzarət departamentinin böyük analitiki İlqar Hidayətoğlu mayın 19-da Bakıda Azərbaycan Mühasiblər və Risk Peşəkarları Assosiasiyasının (ARPA) təşkilatçılığı ilə “Maliyyə sektorunda informasiya texnologiyaları risklərinin idarəedilməsi” mövzusunda keçirilən “Risklərin İdarəedilməsi Forumu – 2017”də deyib.
Azərbaycan Mühasiblər və Risk Peşəkarları Assosiasiyasının Müşahidə Şurasının sədri Rüfət Mahmud mühasiblər forumunun müxtəlif sektorlarda çalışan peşəkar mühasiblərin görüşü, təcrübə mübadiləsi, həmkarları və işgüzar tərəfdaşları ilə peşəkar mövzuların müzakirəsi üçün bir platforma olduğunu bildirib. Qeyd edib ki, ARPA maliyyə sektorunda çalışan mütəxəssislərin bilik səviyyəsinin yoxlanılmasını hədəf qoyub. R.Mahmud ARPA-nın fəaliyyəti barədə ətraflı məlumat verərək forumda iştirak edən korporativ və fərdi üzvlərin fəallığını xüsusi vurğulayıb.
Maliyyə Bazarlarına Nəzarət Palatası (MBNP) ödəniş sistemlərinə nəzarət sektorunun böyük analitiki İlqar Hidayətoğlu bildirib ki, banklara IT risklər üzrə tələblər toplusu göndərilib. Tələblərə işçi stansiyalar, veb-təhlükəsizlik, xəbərdarlıq sistemi, məlumat kanallarının şifrələnməsi və s. daxildir. Digər tələblər isə yeniliklərin tətbiqi, yoxlamalar və testlərin aparılması, əməkdaşların informasiya texnologiyaları sahəsində məlumatlandırılması ilə bağlıdır.
Qeyd olunub ki, banklarda effektivliyi artıran rəqəmsallaşma informasiya texnologiyaları arxitekturasına zərurət yaradacaq. Banklarda rəqəmsallama ilə bağlı mövcud durumu araşdırmaq üçün Palatada məsul işçi qrupu yaradılacaq və bankların rəqəmsallaşmaya hazırlığı qiymətləndiriləcək. İnformasiya texnologiyaları qaydalarına dəyişikliklər həyata keçiriləcək. Banklarda rəqəmsallaşmanın sürətlənməsi dəstəklənəcək. Banklara qarşı irəli sürülən informasiya texnologiyaları tələblərinə yenidən baxılacaq.
“Hazırda əsas işlərdən biri də bank olmayan ödəniş xidməti təchizatçılarının fəaliyyətinin tənzimlənməsidir. Bu sahədə yeni qanunvericilik bazasının hazırlanması üçün işlər görülür. Beynəlxalq təcrübəyə əsaslanmaqla risklərin idarə edilməsi üzrə daxili tələblər irəli sürüləcək. Bu gün qanunvericilik bazası geniş olmasa da, ölkədə ödəniş xidməti göstərən şirkətlər var. Hədəflərdən biri bu təşkilatların fəaliyyətinin tənzimlənməsidir”, - deyə İ.Hidayətoğlu bildirib.
KPMG şirkətinin İnformasiya Risklərinin İdarəedilməsi Qrupunun baş meneceri Andrey Drozdov “Maliyyə sektorunda informasiya təhlükəsizliyi risklərinin idarə edilməsinin təşviqində tənzimləyici orqanların rolunun artırılması” mövzusunda təqdimatı zamanı Azərbaycanda informasiya texnologiyaları üzrə mütəxəssis sahəsində irəliləyişlərin olduğundan söz açıb. Natiq bu istiqamətdə mövcud beynəlxalq standartlar, Rusiya modeli üzərində həmin standartların tətbiqi, üstünlükləri haqqında danışıb, qlobal miqyasda tətbiq edilən yeniliklər haqqında ətraflı məlumat verib.
“ADA” Universitetinin informasiya texnologiyaları və mühəndislik fakültəsinin baş müəllimi Abzətdin Adamov “İrihəcmli məlumatlar və onların etibarlılığı - açıqlıq və gözləntilər” mövzusunda təqdimatında gündəlik həyatda rəqəmsal dünyada məlumat mübadiləsi və onları gözləyən təhlükələrdən bəhs edib. Natiq çıxışı zamanı qlobal şəbəkədə məlumat həcminin artıq mövcud hüdudları aşdığını və onların DVD disk formatına keçirilərsə, toplu halında Yerdən Aya qədər həcmə malik olduğunu bildirib. Hətta sosial şəbəkələrdə yerləşdirilən və pozulan məlumatların yalnız vizual olaraq silindiyini və fərdi məlumatların serverlərdə hər zaman qaldığını deyən A.Adamov sosial şəbəkələrdə uzun illərdən bəri yerləşdirdiyimiz məlumatları toplayaraq təhlil edən insanın bizi özümüzdən daha yaxşı tanımaq imkanı əldə etdiyini qeyd edib.
Çıxışlarda ARPA-nın fərdi və korporativ üzvləri sözügedən istiqamətdə qarşılaşdıqları problemlər, əldə etdikləri nailiyyətlər və mövcud modellər, eyni zamanda, ölkənin maliyyə sektorunda informasiya texnologiyaları risklərinin idarə edilməsi mövzusu geniş müzakirə olunaraq beynəlxalq standartlar və qabaqcıl təcrübə, elektron hökumət, maliyyə bazarları nöqteyi nəzərindən kibertəhlükəsizliyin hüquqi aspektləri, yoluxma xəritəsi və kibertəhlükəsizlik, maliyyə institutlarında layihələrlə bağlı texnoloji risklər və bu kimi digər məqamlara toxunulub.
Forumda “IT risklərin idarəedilməsi: beynəlxalq standartlar və qabaqcıl təcrübə”, “Azərbaycanda IT idarəetmə”, “Maliyyə bazarları nöqteyi-nəzərindən kibertəhlükəsizliyin hüquqi aspektləri”, “Yoluxma xəritəsi və kibertəhlükəsizlik”, “Azərbaycanın maliyyə təşkilatlarında informasiya texnologiyalarına dair əsas məsələlər”, “İnformasiya sistemləri”, “Şəbəkə təhlükəsizliyi”, “Mobil IT təhlükəsizlik” mövzusunda məruzələr dinlənilib.
Forumda ARPA-nın əsas tərəfdaşları - Maliyyə Bazarlarına Nəzarət Palatası (MBNP) ilə “ADA” Universitetidir. Sponsor qismində isə “AtaBank”ASC, “Deloitte Azərbaycan” şirkəti və Beynəlxalq Maliyyə Korporasiyası çıxış edir.
Forumda Azərbaycanda fəaliyyət göstərən və ölkəmizin hüdudlarından kənarda risklərin idarə olunması, informasiya texnologiyaları, bank və maliyyə sektorlarında kifayət qədər nüfuz qazanmış 50-dən artıq dövlət və özəl qurumları, reytinq agentlikləri, qlobal auditor şirkətlərindən 100-ə yaxın nümayəndə iştirak edib.