REGİONLAR
Baramaçılığın inkişaf etdirilməsi hacıqabullu kümçülər tərəfindən razılıqla qarşılanır
Hacıqabul, 8 iyun, Mahir Babayev, AZƏRTAC
Ötən ildən etibarən Hacıqabulda ipəkqurdu bəslənilməsinə başlanılıb. Ölkədə bu sahənin inkişafına yenidən önəm verilməsi hacıqabullu kümçülər tərəfindən də razılıqla qarşılanır. İndi onlarla rayon sakini təsərrüfatın bu gəlirli sahəsinə göstərilən dövlət dəstəyindən yararlanmaq üçün aidiyyəti qurumlarla müqavilələr bağlayaraq, barama istehsalı ilə məşğul olmağa başlayıblar.
Rayon Kənd Təsərrüfatı İdarəsindən AZƏRTAC-ın bölgə müxbirinə bildiriblər ki, ötən il rayonda 15 ailə ipəkqurdu bəsləyib və 450 kiloqram məhsul istehsal olunub. Bu il isə 33 ailəyə 78 qutu ipəkqurdu toxumu paylanılıb. Kümçülərin bu sahədə təcrübəsinin az olmasına baxmayaraq, mütəxəssislərin məsləhətlərinə düzgün əməl olunması nəticəsində yaxşı nəticə əldə edilib. Artıq bir neçə gündür ki, rayonda barama tədarükünə başlanılıb. Bu günə kimi tədarük məntəqələrinə 347 kiloqram barama təhvil verilib.
Kümçü Nəsir Həsənov uzun illərdən sonra bu il yenidən ipəkqurdu toxumu götürərək bəsləyib. O, sovet dövründə də baramaçılıqla məşğul olub və xeyrini görüb. “Rayonda barama istehsalına yenidən başlanması mənim də ürəyimcə olub. Ötən ildən başlayaraq barama bəsləməyə hazırlaşıram. Bu məqsədlə həyətyanı sahəmdə 3 min tut tingi əkib, yeni kümxana tikmişəm. Bu il 4 qutu ipəkqurdu toxumu götürüb bəsləmişəm. Bu günə kimi 182 kiloqram barama tədarük olunub. Hələ kümxanada toplanmamış məhsul çoxdur. Hesablamama görə bundan sonra daha 80 kiloqram barama olacaq”, - deyə Nəsir Həsənov bildirib.
Qeyd edək ki, bu il Hacıqabulda 2 ton 800 kiloqram barama istehsalı nəzərdə tutulub.