“Barselona” bu mövsümdə üçüncü məğlubiyyətə uğrayıb

Bakı, 25 yanvar, Nicat Məmmədov, AZƏRTAC

Yanvarın 25-də İspaniya La Liqasının 21-ci turu çərçivəsində turnir cədvəlinin liderlərindən biri olan “Barselona” səfərdə “Valensiya” klubunun qonağı olub.

AZƏRTAC xəbər verir ki, maraq doğuran qarşılaşma meydan sahiblərinin 2:0 hesablı qələbəsi ilə başa çatıb. Birinci topu “Barselona”nın müdafiəçisi Jordi Alba öz qapısına vurub. İkinci qola “Valensiya”nın hücumçusu Maksi Qomez imza atıb.

Bu, Kataloniya təmsilçisinin cari mövsümdə üçüncü məğlubiyyətidir.

Turnir cədvəlində “Barselona” ilə birinci-ikinci yerləri bölüşən “Real Madrid” yanvarın 26-da səfərdə “Real Valladolid” komandası ilə qarşılaşacaq. Xatırladaq ki, hazırda hər iki komandanın hesabında 43 xal var.