Baş Prokurorluq ekologiya sahəsində qanun pozuntularına qarşı mübarizəni gücləndirib

Bakı, 27 yanvar, AZƏRTAC

Ötən il Baş Prokurorluq tərəfindən ekoloji hüquqpozmalarla bağlı 212 cinayət işi, 124 inzibati xəta haqqında iş üzrə icraat başlanıb, 22 vəzifəli şəxs barəsində təqdimat verilib.

AZƏRTAC xəbər verir ki, bu barədə Baş prokuror Kamran Əliyev yanvarın 27-də Baş Prokurorluqda keçirilən kollegiya iclasında məlumat verib.

Baş prokuror qeyd edib ki, ekoloji hüquqpozmalara dair məlumatların araşdırılması zamanı ətraf mühitin mühafizəsi üzrə dövlət fonduna vurulmuş ziyan üzrə dövlət büdcəsinə 486 min 621 manat məbləğində pul ödətdirilib. Bununla yanaşı, kəsilmiş ağacların əvəzinə 493 min manat dəyərində yeni ağacların əkilməsi təmin olunub.