DÜNYA


Bayden milli təhlükəsizlik barədə informasiyadan istifadə imkanı əldə edib

Vaşinqton, 18 noyabr, AZƏRTAC

Diplomatik müşavirlər, kəşfiyyat və müdafiə üzrə müşavirlər yeni seçilmiş Prezident Baydeni məlumatlandırma brifinqləri keçiriblər.

AZƏRTAC xəbər verir ki, Ağ evin növbəti başçısını bu məlumatlarla tanış edən müşavirlər sırasında general Stenli Makkristal, admiral Uilyam Makreyven və Obama administrasiyasında Mərkəzi Kəşfiyyat İdarəsinin direktorunun müavini olmuş Devid Koen, həmçinin vitse-prezident Kamala Harris iştirak edib.

Müşavirə mətbuat nümayəndələri üçün qapalı keçsə də, artıq məlumdur ki, bir sıra xarici siyasət problemləri, o cümlədən Çin ilə mübahisəli münasibətlər, İranla və əvvəlki kimi öz nüvə arsenalını artırmaq cəhdlərini dayandırmayan Şimali Koreya ilə gərginliyin sərtləşməsi Baydenə miras qalıb. Bundan əlavə, bu həftə Pentaqon hərbi komandanlığa bildirib ki, İraq və Əfqanıstanda yerləşdirilən Amerika hərbi qulluqçularının sayı cari ilin sonunadək azaldılaraq bu ölkələrin hərəsində təqribən 2500 nəfərə endiriləcək.

Baydenin keçid səylərinə Trampın seçkilərdə ehtimal edilən məğlubiyyətini qəbul etməməsi də mane olur. Noyabrın 17-də keçirilmiş müşavirə ABŞ hökumətinin rəsmi brifinqi deyildi. Çünki ümumi xidmətlər administrasiyası Baydenin prezident seçkilərində qalib gəlməsi barədə hələ əminlik əldə etməyib. Agentliklərə əlaqə yarada bilməyən Bayden Obama administrasiyasından olan ekspertlərə, həmçinin Trampın hakimiyyəti dövründə hökumətdən gedən və Baydenlə əməkdaşlığa hazır olan insanlara ümid edir. Bazar ertəsi, noyabrın 16-da Bayden bildirib ki, keçid prosesində ləngimələrin davam etməsi koronavirusdan ölənlərin sayının artmasına səbəb ola bilər.

AZƏRTAC-ın Vaşinqton bürosu

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.