Şəki, 27 mart, Mustafa Dadaşov, AZƏRTAC

Hər il olduğu kimi, bu il də Novruz bayramı günlərində Şəkiyə gələn turistlərin sayında artım müşahidə edilib. Turistlərin ən çox üz tutduqları tarixi məkanlardan biri də “Yuxarı Baş” Milli Tarix-Memarlıq Qoruğunun ərazisidir. Bu ərazidə yerləşən muzey və karvansaraylar, XVIII əsrə aid dünya əhəmiyyətli nadir tarixi-memarlıq abidəsi - Şəki Xan Sarayı, həmçinin “ABAD” Keramika və Tətbiqi Sənət Mərkəzi yerli və xarici turistlərin daha çox marağına səbəb olur.

“Yuxarı Baş” Milli Tarix-Memarlıq Qoruğunun direktor müavini Vasif Paşayev AZƏRTAC-ın bölgə müxbirinə bildirib ki, bayram günlərində qoruğun ərazisinə gələnlərin əksəriyyətini yerli turistlər təşkil edib. Əcnəbi turistlər arasında isə ərəb ölkələrindən – Səudiyyə Ərəbistanından, Birləşmiş Ərəb Əmirliklərindən gələnlər daha çox olub.

Qoruğun rəsmisinin dediyinə görə, bayram günlərində şəhərə turist axınını nəzərə alaraq, qoruğun ərazisindəki bütün muzeylərin, o cümlədən Xan Sarayının qapıları səhər saatlarından axşamadək qonaqların üzünə açıq olub. Turistlərə xidmət göstərmək üçün Sarayın yaxınlığında, qədim qala divarları ilə əhatələnən geniş yaşıllıq ərazidə asudə vaxt və istirahət guşəsi yaradılıb, uşaqlar üçün müxtəlif attraksionlar quraşdırılıb. Turistlər Novruz bayramı münasibətilə Qoruğun ərazisində təşkil edilən bayram yarmarkasında, ümumşəhər şənliyində iştirak edib, xalqımızın qədim adət-ənənələri ilə yaxından tanış olub, sənətkarların əl işlərinə baxıb, pəhləvanların, musiqi, rəqs və folklor kollektivlərinin çıxışlarını izləyiblər.

Qoruğun direktor müavini bildirib ki, Şəkiyə turist axınının artmasının əsas səbəblərindən biri də onlara göstərilən xidmətin keyfiyyəti ilə bağlıdır. Şəki mətbəxinin özünəməxsusluğu, rəngarəngliyi turistləri daim özünə cəlb edir. Onlar milli yeməklərdən olan Şəki pitisinə, paxlavaya, müxtəlif çeşiddə şirniyyat növlərinə böyük maraq göstərirlər. Qoruğun ərazisində olan sənətkarlıq emalatxanaları da daim turistlərin xidmətindədir.

Ağdaş şəhər Habil Əliyev adına 1 nömrəli Uşaq Musiqi Məktəbinin kamança müəllimi Şahin İbrahimli Novruz tətili günlərini müəllim həmkarları ilə birlikdə Azərbaycanın qədim diyarlarından olan Şəkidə keçirməyi qərara alıb. Hər dəfə Şəkiyə gələndə bir qayda olaraq, Xan Sarayını ziyarət etdiyini vurğulayan ağdaşlı qonaq deyib: “Şəki ölkəmizin mühüm turizm mərkəzlərindən birinə çevrilib. Şəkidə tarixi-mədəni irsimizin qorunmasına yüksək diqqət və qayğı göstərilir. Xan Sarayı nəinki ölkəmizin, eləcə də dünyanın ən möhtəşəm memarlıq abidələrindəndir. Ona görə də hamıya məsləhət görürəm ki, Şəkiyə gələndə Azərbaycan memarlığının nadir incilərindən olan bu gözəl sarayı mütləq ziyarət etsinlər”.

Bakı şəhərindən gələn Rəşid İbadov deyib: “Hər il bayram günlərində ailəvi şəkildə Azərbaycanın müxtəlif bölgələrinə səyahətə çıxırıq. Bu dəfə Novruz tətili günlərini Şəkidə keçirməyi qərara aldıq. Novruz bizim ən əziz milli bayramımızdır. Mən özüm indiyədək bir neçə dəfə Xan Sarayında olmuşam. Bu saray, həqiqətən də, ən gözəl memarlıq abidələrimizdəndir. Fürsətdən istifadə edib, xalqımızı bu əziz bayram münasibətilə təbrik edirəm!”.