CƏMİYYƏT
Bayraq Günü Dövlət Sərhəd Xidmətində silsilə tədbirlərlə qeyd edilir
Bakı, 8 noyabr, AZƏRTAC
Dövlət Sərhəd Xidmətində (DSX) 9 noyabr - Dövlət Bayrağı Günü silsilə tədbirlərlə qeyd edilir.
DSX-nin mətbuat mərkəzindən AZƏRTAC-a bildiriblər ki, bütün hərbi hissə və bölmələrdə keçirilən mədəni-kütləvi tədbirlərdə elm və incəsənət xadimləri, yerli icra hakimiyyəti orqanlarının və ictimaiyyətin çoxsaylı nümayəndələri iştirak ediblər.
Noyabrın 8-də Dövlət Bayrağı Günü münasibətilə Nəsimi Rayon İcra Hakimiyyətinin təşkilatçılığı ilə Dövlət Sərhəd Xidmətinin Sahil Mühafizəsində təntənəli tədbir keçirilib.
Tədbir iştirakçıları əvvəlcə Heydər Əliyev İdeoloji Mərkəzi ilə tanış olub, Ulu Öndərin abidəsi önünə əklil qoyublar.
Azərbaycan Respublikasının dövlət himninin səsləndirilməsi ilə başlayan mərasimdə Dövlət Sərhəd Xidmətinin rəisi, general-polkovnik Elçin Quliyevin təbrik teleqramı şəxsi heyətə çatdırılıb.
Mərasimdə tariximizin şanlı səhifələrindən olan Şərqdə ilk demokratik respublikanın - Azərbaycan Xalq Cümhuriyyətinin yaranması və onun üçrəngli, ay-ulduzlu bayrağının qəbul edilməsi haqqında ətraflı məlumat verilib. Bu əlamətdar hadisənin təkcə Azərbaycan üçün deyil, bütün müsəlman dünyası üçün mühüm əhəmiyyət kəsb etdiyi vurğulanıb.
Tədbirdə Azərbaycan Xalq Cümhuriyyəti süquta uğradıqdan 70 il sonra üçrəngli bayrağımızın məhz ulu öndər Heydər Əliyevin təşəbbüsü və iradəsi sayəsində yenidən bərpa edilərək 1990-cı il noyabrın 17-də Naxçıvan Muxtar Respublikasının, 1991-ci il fevralın 5-dən isə Azərbaycan Respublikasının rəsmi dövlət bayrağı kimi təsdiq olunması minnətdarlıq hissi ilə qeyd edilib. Azərbaycan Respublikasının müstəqilliyinin bərpasından sonra dövlət bayrağımızın milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilməsi, dövlət bayrağına hörmət və ehtiramın ən böyük nümunəsini ulu öndər Heydər Əliyevin və Azərbaycan Respublikasının Prezidenti İlham Əliyevin nümayiş etdirmələri qürur hissi ilə vurğulanıb.
Prezident İlham Əliyevin dövlət bayrağımıza yüksək məhəbbətin təzahürü olaraq, 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu il noyabrın 17-də isə Dövlət Bayrağı Gününün təsis edilməsi haqqında sərəncamlar imzalaması və Dövlət Bayrağı Meydanının açılışında “Bizim bayrağımız qürur mənbəyimizdir. Bu bayraq bizim milli dəyərimizdir. Bu Bayraq Meydanının yaradılması Azərbaycanın gücünü, Azərbaycan xalqının öz dövlətinə sevgisini, dövlət rəmzlərimizə ehtiramımızı göstərir” deməsi iftixarla xatırlanıb.
Nəsimi Rayon İcra Hakimiyyətinin başçısı Asif Əsgərov bayram münasibətilə sərhədçiləri təbrik edib.
Tədbirdə Heydər Əliyev dövlətçilik ideyalarına daim sadiq olan, sərhədlərimizin keşiyində qürurla dayanan Azərbaycan sərhədçisinin bundan sonra da yaradılmasının 100 illiyini böyük təntənələrlə qeyd etdiyimiz Azərbaycan Respublikasının müstəqilliyinin simvolu olan dövlət bayrağımızın daima yüksəklərdə dalğalanması üçün əllərindən gələni əsirgəməyəcəklərinə, fədakar xidmətləri ilə göstərilən etimadı layiqincə doğruldacaqlarına əminlik ifadə olunub.
Mərasimdə xidmətdə fərqlənmiş bir qrup hərbi qulluqçuya mükafatlar təqdim edilib.
Tədbirin sonunda Dövlət Sərhəd Xidmətinin nümunəvi hərbi orkestri və incəsənət ustaları geniş konsert proqramı ilə çıxış ediblər.
Noyabrın 8-də Dövlət Sərhəd Xidməti Akademiyasında Dövlət Bayrağı Muzeyinin direktoru, tarix elmləri üzrə fəlsəfə doktoru Könül İmamverdiyevanın kollektivlə görüşü keçirilib.
K.İmamverdiyeva “Dövlət Bayrağımız qürur mənbəyimizdir” mövzusunda mühazirə-təqdimatla çıxış edərək Azərbaycan Respublikasının dövlət bayrağı, həmçinin Azərbaycan ərazisində mövcud olmuş dövlətlərin, xanlıqların bayraqları barədə ətraflı məlumat verib, sərhədçi kursantların suallarını cavablandırıb.