CƏMİYYƏT


Bayraqla getdi, bayraqla qayıtdı

Bakı, 29 iyul, AZƏRTAC

Onun qəlbində üçrəngli Azərbaycan bayrağına çox böyük məhəbbət var idi...

Orta məktəbi bitirəndən sonra hərbi xidmətə yola salınması məclisində, hərbi komissarlığa yola düşəndə üçrəngli Azərbaycan bayrağına bürünməsi də Turalın bayrağa olan sevgisinin ifadəsi idi.

Onun bir sevgisi də doğma Laçınla bağlı idi. Xırdalanda dünyaya göz açsa da, əslən Laçın rayonunun Korcabulaq kəndindən olan Tural kiçik qardaşı Mehdini həmişə Azərbaycan xəritəsinin qarşısına gətirər, Qarabağı, Laçının yerləşdiyi ərazini göstərər, həmin ərazilərin tezliklə geri qayıdacağını söyləyərdi. Nənəsi Gülbəsə “Laçını azad edib səni doğma yurduna aparacağam”, - deyirdi.

“Niyyətin hara, mənzilin ora”, - deyiblər. Vətən müharibəsi başlayanda Tural on bir ay idi ki, hərbi xidmətdə idi. O, sentyabrın 27-dən haqq savaşının ən ön sıralarında erməni yaraqlılarının torpağımızdan qovulub çıxarılması əməliyyatlarında iştirak edir. Onunla bir yerdə olan yoldaşlarının dediyinə görə, Tural çox böyük mərdlik və cəsarətlə döyüşürdü. Hissədə hamı onu qorxmaz və igid bir döyüşçü kimi tanıyır. Təəssüf ki, Vətən və bayraq sevdalısı olan cəsur əsgərin döyüş yolu oktyabrın 1-də Suqovuşan uğrunda qırılır. Laçını görmədən əbədiyyətə qovuşub.

Xırdalan şəhərində yerləşən Laçın rayon 45 saylı orta məktəbin məzunu olan Tural Rəhimli haqqında istər orta məktəb, istərsə də əsgər yoldaşları ən xoş xatirələr söyləyirlər. O, doğma torpağı azğın düşməndən təmizləmək üçün hər şeyə hazır idi və bunu heç kəsdən, hətta anasından da gizlətməyib. Müharibə başlayandan sonra anası Süsənlə telefon danışığında “Şəhid olsam, ağlamayın”, - demişdi.

Şəhidlik zirvəsinə oktyabrın 1-də qovuşdu. Suqovuşan uğrunda döyüşdə onun da qanı canından çox sevdiyi Vətən torpağına qarışdı. Bürünüb hərbi xidmətə getdiyi Azərbaycan bayrağına bürünərək qayıtdı. Onu Xırdalan qəbiristanlığında torpağa tapşırdılar.

Tural Rəhimov döyüş meydanında göstərdiyi igidliyə görə “ Vətən uğrunda”, “Cəsur döyüşçü” və “Suqovuşanın azad edilməsi uğrunda” medallarına layiq görülüb.

Laçının azad olunduğunu görməsə də, doğma yurda ayaq basa bilməsə də, müzəffər Azərbaycan Ordusunun rəşadəti hesabına işğal altında olan rayon öz sakinlərinə qovuşdu.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.