MƏDƏNİYYƏT
Bəhruz Əsgərov: Azərbaycan işgüzar turizm sektoru üçün təqdim etdiyi bir çox xidmətlərlə irimiqyaslı tədbirlərə ev sahibliyi etməyə hazırdır
İstanbul, 25 may, AZƏRTAC
Biz, Azərbaycan Turizm Bürosu, Azərbaycan Konqreslər Bürosu ilə birlikdə İstanbulda keçirilən “ACE of MICE” sərgisində ölkəmizdən olan 13 şirkətlə birlikdə Vətənimizin işgüzar turizm potensialını təmsil edirik. Bu sərgi işgüzar turizm sektorunun inkişaf etdirilməsi ilə yanaşı, türkiyəli tərəfdaşlarımızla yeni əlaqələrin qurulması, eyni zamanda, mövcud münasibətlərin müzakirəsi üçün çox böyük əhəmiyyət daşıyır. Azərbaycan özünün coğrafi yerləşməsi, müasir infrastrukturu, möhtəşəm tədbir salonları ilə yanaşı, işgüzar turizm sektoru üçün təqdim etdiyi bir çox xidmətlərlə birlikdə tam olaraq irimiqyaslı tədbirlərə ev sahibliyi etməyə hazırdır. Belə ki, bunun üçün Azərbaycanda Bakı Expo Mərkəzi, Qafqazın ən böyük konqres mərkəzi olan Bakı Konqres Mərkəzi, Heydər Əliyev Mərkəzi ilə yanaşı, müxtəlif büdcələrə uyğun yüksək səviyyəli və butik otellər mövcuddur. Bu da imkan verir ki, Azərbaycan böyük tədbirlərə ev sahibliyi edə bilsin.
Bu fikirləri AZƏRTAC-a müsahibəsində Azərbaycanın Turizm Bürosunun İdarə Heyətinin sədr müavini Bəhruz Əsgərov ifadə edib.
Pandemiya dövrü ərzində mütəmadi olaraq yeni tədbirlərin ölkəmizə cəlb olunması istiqamətində fəaliyyətlərini davam etdirdiklərini bildirən B.Əsgərov deyib: “Bu işi Azərbaycan Turizm və Azərbaycan Konqreslər büroları müvafiq qurumlarla birgə həyata keçirib və bu müddət ərzində bir sıra tədbirlərin Azərbaycana gətirilməsi təsdiqləndi. Bunlara, 2023-cü ildə keçiriləcək “74-cü Beynəlxalq Astronavtika” və “Avropa Üst Çənə Cərrahiyyəsi” konqreslərini misal çəkmək olar. Avropa Gənclər Parlamentinin də iclasının Azərbaycanda keçirilməsi planlaşdırılır”.
Tədbir çərçivəsində keçirilən görüşlərdə Qarabağda aparılan bərpa-quruculuq işləri, regionun turizm potensialı və işgüzar turizm üçün uyğunluğu barəsində də həm müzakirələrin aparıldığını, həm də tanıdıldığını qeyd edən müsahib deyib: “Məlum olduğu kimi, aparılan bərpa-quruculuq işlərinin nəticəsində il ərzində artıq Şuşa bir neçə böyük tədbirə ev sahibliyi edə bilib. Bunlara misal olaraq mayın 5-8-də keçirilən Beynəlxalq Qastronomiya Festivalını da qeyd etmək olar. Bu festival çərçivəsində Türkiyə də daxil olmaqla bir sıra ölkədən nümayəndələr ölkəmizə gəlib ki, bu da regionun gələcəkdə işgüzar turizm üçün böyük potensialını ehtiva edir”.
İstanbul