Bakı, 27 iyun (AZƏRTAC, Ceyhun Rüstəmov). İyunun 27-də “Azərbaycan Polad İstehsalı Kompleksi” QSC-nin struktur vahidi olan “Daşkəsən Filizsaflaşdırma” ASC ilə Belarus Respublikasının “BelAZ” ASC-nin “İrridio Motors” lizinq şirkəti arasında lizinq və zəmanət müqavilələri imzalanmışdır.

AZƏRTAC xəbər verir ki, imzalanma mərasimi “Azərbaycan Polad İstehsalı Kompleksi” QSC-nin sədri Samir Cəfərov, “Daşkəsən Filizsaflaşdırma” ASC-nin direktoru Ələddin Sadıqov, “BelAZ” ASC-nin vitse-prezidenti Dimitri Zablodski, “İrridio Motors” lizinq şirkətinin direktoru Andrey Şerbakov və Belarusun ölkəmizdəki səfiri Nikolay Patskeviçin iştirakı ilə keçirilmişdir.

Müqaviləyə əsasən “Azərbaycan Polad İstehsalı Kompleksi” QSC 12 ədəd yeni “BelAZ” markalı karyer yük avtomobili alacaqdır. Beynəlxalq lizinq müqaviləsi sərfəli maliyyə şərtləri ilə uzunmüddətli dövr üçün bağlanmışdır. Belə ki, müqavilənin müddəti 4 il, ödəniləcək faiz dərəcəsi isə 4 faiz həcmində müəyyənləşdirilmişdir. Alınacaq “BelAZ-7547” markalı 10 avtomaşının yükgötürmə qabiliyyəti 45 ton, “BelAZ-75131” markalı 2 avtomaşınının yükgötürmə qabiliyyəti isə 140 tondur. Həmin maşınlardan dəmir filizi hasilatında istifadə ediləcək, bununla da hasil olunan filizin maya dəyərinin azı 20 faiz aşağı düşməsinə imkan yaranacaqdır.

İmzalanma mərasimindən sonra jurnalistlərin sualları cavablandırılmışdır.

Prezident İlham Əliyevin 2013-cü il 23 aprel tarixli Sərəncamı ilə yaradılan “Azərbaycan Polad İstehsalı Kompleksi”nin fəaliyyətinin təşkili istiqamətində görülən işlər barədə məlumat verən QSC-nin sədri S.Cəfərov bildirmişdir ki, Səhmdar Cəmiyyətin səhmləri dövlətə məxsusdur. Kompleks Gəncə şəhərinin və Daşkəsən rayonunun ərazilərində dəmir filizinin hasilatından polad istehsalına qədər bütün mərhələləri əhatə edən polad istehsalı kompleksinin layihələndirilməsini, tikintisini və idarə olunmasını, bu sahədə yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işləri yerinə yetirir. QSC-nin bu il iyunun 6-da rəsmi qeydiyyatdan keçdiyini deyən S.Cəfərov kompleksin 3-4 il ərzində tam gücü ilə fəaliyyətə başlayacağını vurğulamışdır.

QSC-nin sədri sərfəli şərtlərlə imzalanan müqavilə çərçivəsində alınacaq maşınların maddi-texniki bazanın gücləndirilməsində mühüm rol oynayacağını, müasir texnikaların alınması istiqamətində Belarus və Yaponiya şirkətləri ilə müəyyən razılaşmalar əldə edildiyini demişdir.

Kompleksin yüksək ixtisaslı kadrlarla təmin edilməsinə də toxunan S.Cəfərov bildirmişdir ki, hazırda Təhsil Nazirliyi, AMEA və bir sıra xarici qurumlarla danışıqlar aparılır, habelə yüksək ixtisaslı mütəxəssislərin hazırlanması üçün yerli kadrların xarici təhsil müəssisələrinə göndərilməsi planlaşdırılır.

Ölkələrimiz arasında əlaqələrin getdikcə genişləndiyini deyən səfir N.Patskeviç, əməkdaşlığın artıq bütün sahələri əhatə etdiyini vurğulamışdır. O, Azərbaycanın dinamik inkişafa nail olduğunu, Belarusun ölkəmizin qeyri-neft sektoruna investisiya yatırmağa maraq göstərdiyini diqqətə çatdırmışdır.