MƏDƏNİYYƏT


Belarus və Azərbaycan opera ulduzları Bakıda eyni səhnəni bölüşəcək

Bakı, 17 yanvar, AZƏRTAC

Fevralın 9-da Azərbaycan Dövlət Akademik Opera və Balet Teatrında italiyalı bəstəkar Cakomo Puççininin “Boqema” operası təqdim ediləcək.

Teatrın mətbuat xidmətindən AZƏRTAC-a bildirilib ki, səhnə əsərində əsas partiyalardan biri olan Rudolfun partiyasını ifa etmək üçün teatrın rəhbərliyi gənc və istedadlı həmyerlimiz Azər Rzazadəni dəvət edib. Vokalçı kimi karyerasına Azərbaycan Dövlət Akademik Opera və Balet Teatrının səhnəsində başlayan Azər sonradan təhsilini davam etdirmək üçün İtaliyaya gedib. Hazırda o Milanın La-Skala Teatrının solisti, vokalçıların beynəlxalq müsabiqələrinin laureatıdır. Operada Marsel partiyasını Belorus Milli Akademik Böyük Opera və Balet Teatrının solisti, Belorusun Əməkdar artisti, vokalçıların Beynəlxalq müsabiqələrinin laureatı Vladimir Qromov ifa edəcək.

Mimi rolunda Əməkdar artist Afaq Abbasova, Müzetta rolunda Əməkdar artist İnarə Babayeva çıxış edəcək. Səhnə əsərində, həmçinin Xalq artistləri Əli Əsgərov, Əkrəm Poladov, Əməkdar artistlər Tural Ağasıyev və Əliəhməd İbrahimov da iştirak edəcəklər.

Operanı teatrın baş dirijoru və musiqi rəhbəri, Əməkdar artist, dirijorların Beynəlxalq müsabiqələrinin laureatı Əyyub Quliyev idarə edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.