İQTİSADİYYAT
Belçikada Azərbaycanın biznes imkanları yüksək dəyərləndirilir
Avropa Azərbaycan Cəmiyyətindən AZƏRTAC-a verilən məlumata görə, 200-dən artıq nümayəndənin qatıldığı tədbir Belçika şirkətlərini Azərbaycanın tikinti, kənd təsərrüfatı və ətraf mühitin qorunması sahəsindəki biznes imkanları ilə tanış etmək məqsədi daşıyırdı. Forumda AWEX-lə bərabər “Flanders İnvestment and Trade” (FİT), “Brussels İnvestment and Export (BİE) şirkətlərinin təmsilçiləri də iştirak edirdilər.
TEAS-ın direktoru Lionel Zetter biznes forumundakı çıxışında Azərbaycanın biznes imkanlarını yüksək dəyərləndirərək deyib: “İqtisadiyyatının inkişafı, Qərb ölkələri ilə bağların artması və stabilliyi baxımından Azərbaycan çiçəklənən ölkədir. Azərbaycanı ziyarət edənlərin hamısı bilməlidir ki, bu ölkədə biznes qurmaq çox asan və azaddır. Azərbaycan “Şərq Tərəfdaşlığı” çərçivəsində Avropa İttifaqına ən yaxın ölkələrindən biridir. Bu ölkə gəzmək, yaşamaq və biznes qurmaq üçün çox əlverişlidir”.
Belçika Xarici İşlər Nazirliyinin şöbə müdiri Johan Van Dessel öz çıxışında qeyd edib ki, ölkələrimiz arasındakı ikitərəfli münasibətlər yüksələn xətt üzrə inkişaf edir. Lakin bu münasibətləri daha da yaxşılaşdırmağa ehtiyac var. Avropa İttifaqının bir üzvü kimi Belçika Azərbaycanla “Şərq Tərəfdaşlığı” proqramı çərçivəsində əməkdaşlıqdan məmnundur. Hazırda Azərbaycan Avropa Şurasının Nazirlər Komitəsinin sədri missiyasını həyata keçirir. Noyabr ayında bu quruma sədrlik Belçikaya keçəcək. “Biz Azərbaycanın uğurlu işini davam etdirməyə ümid bəsləyirik”, - deyə Johan Van Dessel əlavə edib.
Azərbaycan Respublikasının Belçika Krallığındakı fövqəladə və səlahiyyətli səfiri və eyni zamanda Avropa İttifaqında Azərbaycan nümayəndəliyinin rəhbəri Fuad İsgəndərov “Cənub” qaz dəhlizinin təməlqoyma mərasimi haqqında məlumat verərək deyib ki, 45 milyard dollar dəyəri olan layihədə iştirak edən səhmdarlardan biri də Belçikanın “Fluxys” şirkətidir. Azərbaycanı daha da inkişaf etdirmək üçün Qərb texnologiyalarına və elmi yanaşmalara ehtiyac duyulur. Məhz buna görə, müvafiq Dövlət Proqramı çərçivəsində hər il yüzlərlə azərbaycanlı gənc dövlət hesabına xaricdə təhsil almağa göndərilir.
Səfir çıxışını biznes nümayəndələrinə bu çağırışla tamamlayıb: “Azərbaycan sizin yolunuzu gözləyir. Mənim ölkəm öz gələcəyinin qurulmasında sizin iştirakınız üçün açıqdır”.
Azərbaycan İnvestisiya Şirkətinin (AİŞ) icraçı direktoru Rövşən Nəcəf ölkəmizin iqtisadiyyatı barədə danışaraq deyib ki, son beş ildə qeyri-neft sektoru ümumi iqtisadiyyatın katalizatoruna çevrilib və bu sahəni inkişafına dair aydın strategiya mövcuddur. Azərbaycan elm üzərində qurulmuş dövlət yolunu seçib. Burada azad sərmayə şəraiti var və biz 46 qarşılıqlı sərmayə sazişi imzalamışıq. Ümid edirik ki, Brüsseldə keçirilən bu biznes-forum AİŞ və Belçika şirkətlərinin müştərək müəssisələr yaratması ilə nəticələnəcək.
Dünya Bankının Baş infrastruktur müfəttişi Hacı Hüseynov, Azərbaycan Kənd Təsərrüfatı Nazirliyinin şöbə müdiri Rəşad Məcidov, “Təmiz Şəhər” ASC-nin Abşeron Göllərinin Bərpası proqramının ictimaiyyətlə əlaqələr şöbəsinin müdiri Oqtay Məmmədov Azərbaycanda həyata keçirilən irimiqyaslı layihələr, nəzərdə tutulan işlər, ölkəmizdəki sərmayə mühiti və biznes imkanları bərədə məlumat veriblər. Qeyd olunub ki, hazırda Bakı şəhərinin 2030-ci ilədək inkişaf planı reallaşmaqdadır. 2015-ci ildə Bakıda keçiriləcək ilk Avropa Oyunlarına hazırlıq çərçivəsində nəqliyyat infrastrukturu yenilənir və təkmilləşdirilir. Hökumət, həmçinin 85 yeni su anbarının yaradılması və istifadə olunmuş çirkab suların təmizlənməsinə dair yeni plan hazırlayıb.
Forum iştirakçılarının diqqətinə çatdırılıb ki, Azərbaycan aqrar sektorda da böyük potensiala malikdir. Burada yetişdirilən bir çox meyvə-tərəvəz məhsulları əsasən Türkiyə, Rusiya və Gürcüstana ixrac olunur. Bu məhsullara Qərbi Avropada da tələbat var. Ölkə əhalisinin 40 faizinin çalışdığı kənd təsərrüfatı karbohidratlardan sonra ikinci ən böyük ixrac sahəsi və qeyri-neft sektorunun lokomotividir. Ötən onillik ərzində bu sahədə hər il 5 faizlik artıma nail olunub. Kənd təsərrüfatı texnikasına, yeni avadanlıq və digər vasitələrə sərmayə cəlb etmək üçün hökumət vergi güzəştləri siyasəti yürüdür. Azərbaycanda Belçika təcrübəsini tətbiq etmək üçün böyük imkanlar var.
Həmçinin məlumat verilib ki, Azərbaycan hökuməti Sovet dövrünün tənzimlənməyən neft hasilatı nəticəsində çirklənmiş doqquz gölün bərpasına 500 milyon avro vəsait ayırmağı planlaşdırır. Bu göllərin təmizlənməsində Belçika şirkətləri də iştirak edə bilərlər.