İQTİSADİYYAT
Berlində Almaniya-Azərbaycan Ticarət və İnvestisiyalar üzrə Yüksək Səviyyəli İşçi Qrupunun iclası keçirilib
Berlin, 23 noyabr, AZƏRTAC
Berlində Almaniya-Azərbaycan Ticarət və İnvestisiyalar üzrə Yüksək Səviyyəli İşçi Qrupunun 7-ci iclası keçirilib.
AZƏRTAC xəbər verir ki, iclasda İşçi Qrupunun həmsədri, Azərbaycan Respublikasının İqtisadiyyat Nazirliyi aparatının rəhbəri Səmir Vəliyevin başçılıq etdiyi nümayəndə heyəti iştirak edib. Azərbaycan nümayəndə heyəti Azərbaycan Respublikasının İqtisadiyyat Nazirliyi, Mədəniyyət və Turizm Nazirliyi, Kənd Təsərrüfatı Nazirliyi, Alternativ və Bərpa Olunan Enerji üzrə Dövlət Agentliyi, SOCAR və Azərbaycan İnvestisiya Şirkətinin rəsmilərindən ibarət olub.
İclasda Almaniyanı İşçi Qrupun həmsədri, Federal İqtisadiyyat və Energetika Nazirliyinin Xarici İqtisadi Siyasət İdarəsinin baş direktoru Ekhard Frantsın rəhbərlik etdiyi nümayəndə heyəti təmsil edib. Almaniya nümayəndə heyətinə müxtəlif federal nazirliklərin nümayəndələri, eləcə də Alman İqtisadiyyatının Şərq Komitəsinin, Şərqi Avropa Biznes Assosiasiyasının, Alman-Azərbaycan Xarici Ticarət Palatasının, Almaniya Ticarət və İnvestisiya Agentliyinin təmsilçiləri daxil olub.
Tədbirdə Azərbaycan və Almaniya arasında iqtisadi münasibətlər, eləcə də ikitərəfli əməkdaşlıq məsələləri ətrafında fikir mübadiləsi aparılıb. Bu xüsusda, enerji sektorunda, enerjiyə qənaət və alternativ enerji, təhsil, menecer təlimi, əczaçılıq, kənd təsərrüfatı, turizm və inkişaf naminə tərəfdaşlıq sahələrində əməkdaşlıq ətrafında müzakirələr keçirilib.
Azərbaycan Respublikasının Almaniyadakı fövqəladə və səlahiyyətli səfiri Ramin Həsənov İşçi Qrupun iclasında iştirak edib.
Görüşün sonunda İşçi Qrupun 8-ci iclasının 2018-ci ilin payızında Bakıda keçirilməsi razılaşdırılıb.
Vüqar Seyidov
AZƏRTAC-ın xüsusi müxbiri
Berlin