İQTİSADİYYAT


Bəxtiyar Aslanbəyli: SOCAR Cənubi Qafqaz Boru Kəmərinin texniki operatoru olmaqla regionun midstrim layihələrində iri əməliyyatçıya çevrilir

Bakı, 4 iyun, AZƏRTAC

Xəbər verdiyimiz kimi, Cənubi Qafqaz Boru Kəmərinin (CQBK) texniki operatorluğu “BP Eksploreyşn (Şahdəniz) Limited” şirkətindən SOCAR-ın törəmə müəssisəsi olan “SOCAR Midstream Operations” MMC-yə keçib.

BP şirkətinin Azərbaycan, Gürcüstan, Türkiyə regionunda əlaqələr, xarici işlər və strategiya üzrə vitse-prezidenti Bəxtiyar Aslanbəyli texniki operatorluğun ötürülməsi qərarını AZƏRTAC-a şərh edib.

“SOCAR-ın Cənubi Qafqaz Boru Kəmərinin yeni texniki operatoru olmasını məmnuniyyət hissi ilə qarşılayırıq. “Şahdəniz”in və CQBK-nın ən iri payçısı kimi biz boru kəmərinin təhlükəsiz və etibarlı istismarının davamlı olmasını təmin etmək üçün SOCAR-la birgə işləməkdə davam edəcəyik. Texniki operatorluğun SOCAR-a keçməsi, “Şahdəniz-2” və Cənubi Qafqaz Boru Kəmərinin Genişləndirilməsi (CQBKG) layihələrinə dair yekun investisiya qərarı çərçivəsində 2013-cü ilin dekabrında imzalanmış “Düzəliş Edilmiş və Yenilənmiş Boru Xətti Sahiblərinin Müqaviləsi”nə uyğun olaraq həyata keçirilib. Müqavilədə Cənubi Qafqaz Boru Kəmərinin Genişləndirilməsi tikintisinin başa çatmasının birinci ildönümündə SOCAR-ın CQBK-nın texniki operatoru olması nəzərdə tutulmuşdu. Bu, həm də SOCAR-ın uzunmüddətli strategiyasına uyğundur. Cənubi Qafqaz Boru Kəmərinin texniki operatoru olmaqla SOCAR regionun midstrim layihələrində də iri bir əməliyyatçıya çevrilir, neft və qaz əməliyyatlarındakı böyük təcrübəsini daha da genişləndirərək ixrac zənciri ilə birləşdirmiş olur”.

“Düşünürük ki, layihələrin təhlükəsiz və səmərəli şəkildə həyata keçirilməsində SOCAR-ın böyük təcrübəsi var. SOCAR bunu TANAP-ın 4 illik uğurlu tikintisi və onun ardınca təhlükəsiz istismarı zamanı nümayiş etdirib. Bundan əlavə, SOCAR artıq 5 ildir ki, çox səmərəli şəkildə CQBK-nın kommersiya operatoru qismində çıxış edir. Biz keçid mərhələsinin təhlükəsiz qaydada və ümumilikdə qazın nəqli əməliyyatlarına heç bir təsir yaratmadan tamamlanmasını təmin etmək üçün planlaşdırılmış dəyişikliklərin idarə olunması prosesində SOCAR-a dəstək olacağıq. Texniki operatorluğun ötürülməsi Azərbaycanda və Gürcüstanda CQBK-yə aid bütün obyektlərin əməliyyatlarını əhatə edir. Həm Bakı-Tbilisi-Ceyhan (BTC) boru kəmərinə, həm də CQBK-yə aid olan ümumi obyektlərin operatorluğunu isə BP şirkəti ümumi operator qismində davam etdirəcək. Səngəçal terminalının, BTC-nin və Qərb İxrac Boru Kəmərinin operatorluğunda heç bir dəyişiklik yoxdur, bu obyektlərin operatorluğunu BP şirkəti icra etməkdə davam edəcək. Texniki operatorluğun keçidi prosesinin bütün aspektlərinin səmərəli şəkildə yerinə yetirilməsi üçün SOCAR və BP cari il ərzində birgə işləməyə davam edəcək. Bütün ixrac sisteminin mükəmməl təhlükəsizlik göstəricilərinə nail olmasında əməkdaşlarımızın və işçi qüvvəmizin əzmkarlığı və fədakarlığı mühüm rol oynayıb, biz onlarla qürur duyuruq. Əminik ki, operatorluğun ötürülməsi ilə əməliyyatların təhlükəsizliyinə eyni dərəcədə yüksək diqqət və əməkdaşların iş icrasının eyni dərəcədə yüksək keyfiyyəti davam edəcək.

Qeyd edək ki, Cənubi Qafqaz Boru Kəməri şirkətinin sərmayədarları belədir: BP (operator) 28,8 faiz, “AzSCP” 10 faiz, “Cənub Qaz Dəhlizi Midstrim” 6,7 faiz, “Petronas” 15,5 faiz, “LUKoil” 10 faiz, “NICO” 10 faiz və “TPAO” 19 faiz. CQBK dünya səviyyəli boru kəməri sistemidir və 2006-cı ildən təhlükəsiz, etibarlı və səmərəli şəkildə fəaliyyət göstərməklə Azərbaycan, Gürcüstan və Türkiyənin regional bazarlarına qaz nəql edir.

“Şahdəniz-2” çərçivəsində əlavə hasilat həcmlərini qəbul etmək məqsədilə CQBK sistemi Türkiyəyə (ildə 6 milyard kubmetr) və Avropaya (ildə 10 milyard kubmetr) “Şahdəniz-2” həcmlərinin ixrac edilməsi üçün genişləndirilib. Boru kəmərinin genişləndirilmiş hissəsi 2018-ci ilin iyun ayından Türkiyəyə kommersiya qaz həcmlərinin nəqlinə başlayıb. Cari ildən başlayaraq bu kəmər ilk dəfə olaraq “Şahdəniz” qazının Avropaya ixrac edilməsinə imkan yaradacaq.

2019-cu il ərzində CQBK-nın gündəlik orta ötürücülük gücü 29 milyon kubmetr qaz təşkil edib. CQBK ixrac sistemi Azərbaycanda 443 kilometr və Gürcüstanda isə 248 kilometr boru kəmərindən ibarətdir. Sistemə, həmçinin Səngəçal terminalında iki kompressor, Gürcüstanda iki kompressor stansiyası və iki nəzarət-ölçü qovşağı daxildir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.