Beyləqan, 1 sentyabr (AZƏRTAC, Tahir Ağaməmmədov). Sentyabrın 1-də Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin Beyləqandakı 6 saylı ərazi idarəsinin yeni inzibati binası istifadəyə verildi.

AZƏRTAC xəbər verir ki, bu münasibətlə komitənin rəhbərliyinin və ərazi idarəsinin əməkdaşlarının iştirakı ilə keçirilən mərasimdə Daşınmaz Əmlakın Dövlət Reyestri Xidmətinin rəisi Məhəmməd İmanov belə tədbirlərin vətəndaşlara xidmətin səviyyəsinin yüksəldilməsi və sosial məmnunluğun artırılması istiqamətində görülən işlərin davamı olduğunu bildirdi. Qeyd etdi ki, bu istiqamətdə komitənin önəm verdiyi ən mühüm məsələ fəaliyyətin müasir əsaslarla qurulması, modern idarəetmə sisteminin və informasiya-kommunikasiya texnologiyalarının tətbiqidir. Yeni inzibati binanın istifadəyə verilməsi vətəndaşlara daha rahat və operativ, müasir tələblərə cavab verən xidmət şəraitinin yaradılması məqsədini daşıyır. 6 saylı ərazi idarəsinin yeni binasında Beyləqan, Ağcabədi, İmişli və Füzuli rayonlarından olan vətəndaşlara müasir tələblərə uyğun qeydiyyat xidmətləri göstəriləcəkdir.

Tədbir iştirakçıları binada yaradılmış şəraitlə tanış oldular. Məlumat verildi ki, sahəsi 745 kvadratmetr olan ərazi idarəsinin inzibati binası 3 mərtəbədən ibarətdir. Vətəndaşlara rahat və operativ xidmətin təşkili məqsədilə binanın birinci mərtəbəsində müasir üsullarla sənəd qəbulu və verilməsini təmin edən müasir xidmət zalı yaradılıb. Xidmətlər zamanı növbəliliyin tənzimlənməsi məqsədilə qəbul zalında elektron növbəlilik aparatı mövcuddur.

Binada daşınmaz əmlakın qeydiyyatı ilə bağlı hüquqi maarifləndirmə guşəsi də yaradılıb. Vətəndaşlar üçün daşınmaz əmlakın qeydiyyatına dair müvafiq izahedici, o cümlədən xidmət haqları və rüsumlar barədə məlumatlandırma lövhələri asılıb. Quraşdırılmış monitorlarda daşınmaz əmlakın qeydiyyatı prosedurları, zəruri sənədlər, habelə elektron xidmətlərlə bağlı məlumatların əyani surətdə əks olunması təmin edilib.

Yeni binada funksional xidmətlər üçün otaqlar, işçilər üçün inzibati otaqlar, vətəndaşların gözləmə zalı, iclas zalı, akt zalı və arxiv otağı mövcuddur. Bütün iş otaqları, iclas zalı və vətəndaşların qəbulu şöbəsində müasir avadanlıqlar və cihazlar quraşdırılıb. Yeni istifadəyə verilən binada yaradılmış müasir xidmət şəraiti müraciət edən vətəndaşlara keyfiyyətli və rahat xidmətin təşkilinə, vaxt itkisinin aradan qaldırılmasına imkan yaradır.

Tədbirdə regionlarda indiyədək 17 yeni inzibati binanın istifadəyə verilməsi, müasir xidmət şəraitinin qurulması, keçirilən “Açıq qapı” günü və hüquqi maarifləndirmə seminarları şəffaflıq, ictimai agahlıq və maarifləndirmənin təmin olunması, mobil ofis xidmətləri isə sosial amillərin və vətəndaş məmnunluğunun artırılması kimi xarakterizə olundu. Qeyd edildi ki, bu il ərzində elektron xidmətlərin sayının 29-a çatdırılması, qeydiyyatla bağlı onlayn xidmətlərə və respublika üzrə mobil ofis xidmətlərinə başlanılması komitənin ən mühüm nailiyyətləridir.

Diqqətə çatdırıldı ki, elektron xidmətlərin sayının və keyfiyyətinin artırılması əhalinin bu xidmətlərdən heç bir yerə getmədən optimal faydalanmasına və vaxta qənaət etmələrinə gətirib çıxarıb. Bu ildən etibarən daşınmaz əmlakın qeydiyyatı ilə bağlı onlayn xidmətlərin tətbiqi ərazi idarələrinə gediş-gəlişləri, məmur-vətəndaş ünsiyyətini kifayət dərəcədə azaldıb. İndiyədək elektron xidmətlər vasitəsilə 90 mindən çox müraciət icra edilib ki, bunun 68 mindən çoxu onlayn qaydada təmin edilib.

Bu ilin aprel ayından başlayaraq komitənin mobil ofisləri vasitəsilə daşınmaz əmlakın qeydiyyatı ilə bağlı xidmətlər şəhər və rayonlarda xüsusi sosial təbəqədən olan vətəndaşların ünvanına çatdırılır. Yeni alınmış nəqliyyat vasitələri isə mobil ofis xidmətlərinin respublikanın bir regionunda deyil, artıq eyni vaxtda bütün şəhər və rayonlar üzrə göstərilməsini təmin edəcəkdir. İndiyədək mobil ofislər vasitəsilə ölkə üzrə 10 minə yaxın vətəndaşa qeydiyyat xidmətləri göstərilib. Görülən işlərin nəticəsidir ki, 2014-cü ildə respublika üzrə 130 minə yaxın daşınmaz əmlak qeydiyyatdan keçib.

Həmin gün ərazi idarəsində daşınmaz əmlakın qeydiyyatı prosesi ilə əyani tanışlıq, vətəndaşlara, mətbuat nümayəndələrinə və digər iştirakçılara qeydiyyatla bağlı hüquqi prosedurları əyani çatdırmaq, yaradılmış rahat, çevik və modern xidmətləri nümayiş etdirmək məqsədilə “Açıq qapı” günü, daşınmaz əmlakın qeydiyyatı və kadastrı sahəsinə dair qanunvericiliklə bağlı ictimai maariflənmənin təmin olunması məqsədilə hüquqi maarifləndirmə seminarı keçirildi.

“Açıq qapı” günündə vətəndaşlar və mətbuat nümayəndələri ərazi idarəsində qeydiyyat prosesini əyani şəkildə izlədilər və qeydiyyat prosedurları ilə yaxından tanış oldular. Daşınmaz əmlakın qeydiyyatı ilə bağlı iş prinsipi, hüquqi tələblər və zəruri sənədlər, habelə sənədlərin qəbulu və hazırlanması qaydaları iştirakçılara əyani nümayiş etdirildi.

Xatırladaq ki, indiyədək Daşınmaz Əmlakın Dövlət Reyestri Xidmətinin Bərdə və Xaçmaz ərazi idarələrində “Açıq qapı” günləri, Lənkəran, Mingəçevir, Şamaxı, Şirvan, Bərdə və Xaçmaz rayonlarında hüquqi maarifləndirmə seminarları keçirilib.