CƏMİYYƏT


Beynəlxalq Ailə Günü ilə əlaqədar maarifləndirici tədbir keçirilib

Bakı, 16 may, AZƏRTAC

15 may – Beynəlxalq Ailə Günü ilə əlaqədar Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) və Azərbaycan Respublikasının Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə Azərbaycan Dillər Universitetində “Reproduktiv sağlamlıq və ailə planlaşdırılması” mövzusunda tədbir keçirilib.

Bu barədə AZƏRTAC-a İSİM-in mətbuat xidmətindən bildirilib.

Tədbirdə Universitetin Mülki müdafiə və tibbi biliklərin əsasları kafedrasının baş müəllimi Sədaqət Musayeva bildirib ki, tibbi maarifləndirmə işinin aparılması əhalinin, xüsusilə də gənc nəslin sağlamlığının qorunmasında böyük rol oynayır. Ailə, Qadın və Uşaq Problemləri üzrə Dövlət Komitəsinin informasiya və analitik araşdırmalar şöbəsinin müdir müavini Aynur Veysəlova ailələri narahat edən problemlər və onların həlli istiqamətində ölkəmizdə görülən işlərdən söz açıb. İSİM-in Səhiyyə siyasəti və planlaşdırma şöbəsinin həkim-metodisti Lətafət Dadaşova geniş təqdimatla çıxış edərək, tələbələrə reproduktiv sağlamlıq və ailə planlaşdırılması, abortların fəsadları barədə ətraflı məlumat verib. Mütəxəssis gənc nəslə daha məsuliyyətli olmağı, səhhəti ilə bağlı məsələlərə biganə yanaşmamağı tövsiyə edib. O bildirib ki, gənclərin reproduktiv sağlamlıqlarına vaxtında məsuliyyətlə yanaşması gələcəkdə sağlam övladların dünyaya gəlməsi, ana və uşaq ölümlərinin azalması deməkdir.

Sonra 15 may – Beynəlxalq Ailə Günü ilə əlaqədar olaraq, hamilə xanımlara ginekoloji müayinə və konsultasiya üçün xüsusi kartlar təqdim edilib.

Yekunda mövzu ilə bağlı fikir mübadiləsi aparılıb, tələbələrə reproduktiv sağlamlıq və ailə planlaşdırılması ilə bağlı İSİM tərəfindən hazırlanmış maarifləndirici materiallar paylanılıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.