Bakı, 13 dekabr, AZƏRTAC

9 dekabr - Beynəlxalq Korrupsiyaya Qarşı Mübarizə Günü ilə əlaqədar Beynəlxalq Antikorrupsiya Akademiyasının Avstriyadakı mənzil qərargahında magistr proqramını başa vurmuş məzunların növbəti buraxılış mərasimi keçirilib.

Baş Prokurorluğun mətbuat xidmətindən AZƏRTAC-a bildiriblər ki, Akademiya korrupsiyaya qarşı mübarizə üzrə biliklərin artırılması və peşəkarların təkmilləşdirilməsi sahəsində dünyada ilk təhsil ocağı kimi beynəlxalq təşkilat statusunda fəaliyyət göstərir.

Mərasimdə BMT-nin Narkotiklər və Cinayətkarlıq Ofisinin, digər beynəlxalq təşkilatların, diplomatik nümayəndəliklərin təmsilçiləri, Avstriya Hökumətinin yüksək vəzifəli şəxsləri iştirak ediblər.

Dünyanın 17 ölkəsindən olan 26 tələbə arasında beş azərbaycanlı - Milli Məclisin beynəlxalq əlaqələr şöbəsinin əməkdaşı Vüqar Məmmədov, Xarici İşlər Nazirliyinin əməkdaşı Süleyman Rüstəmov, Bakı Beynəlxalq Dəniz Ticarət Limanının əməkdaşı Məftun Abbasov, eləcə də proqramı fərqlənmə ilə bitirən, Korrupsiyaya Qarşı Mübarizə üzrə Komissiyanın katibi Kamal Cəfərov və Baş Prokuror yanında Korrupsiyaya Qarşı Mübarizə Baş İdarəsinin böyük prokuroru Elnur Musayev Akademiyanın magistr proqramının məzunu olublar.

Buraxılış mərasimində bütün məzunlar adından danışan magistr qrupunun rəhbəri Elnur Musayev internet vasitəsilə dünyaya yayımlanan çıxışında Azərbaycan Prezidenti İlham Əliyevin rəhbərliyi ilə ölkəmizdə korrupsiyaya qarşı mübarizə sahəsində həyata keçirilən məhkəmə-hüquq islahatları, institusional və cinayət təqibi tədbirləri haqqında ətraflı məlumat verib. O, eyni zamanda, Akademiyanın inkişafına dəstək verilməsi barədə dünya ictimaiyyətinə müraciət edib.

Akademiyanı bitirən məzunlara korrupsiyaya qarşı mübarizə üzrə mütəxəssis adı verilməsi ilə bağlı müvafiq diplomlar təqdim olunub.

Bundan başqa, Çirkli Pulların Yuyulmasına Qarşı Mübarizə üzrə Sertifikatlaşdırılmış Ekspertlər Assosiasiyasının müvafiq imtahanını uğurla keçmiş Kamal Cəfərov çirkli pulların yuyulmasına qarşı mübarizə üzrə ekspert sertifikatına da layiq görülüb.

Azərbaycan Respublikası korrupsiyaya qarşı mübarizə sahəsində ixtisaslaşmış ekspertlərin hazırlanması istiqamətində səylərini bundan sonra da davam etdirəcək.