Bakı, 29 noyabr, AZƏRTAC

Azərbaycan Milli Qeyri-Hökumət Təşkilatları Forumunun (MQF) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi “QHT-lərə institusional inkişaf sahəsində xidmətlərin göstərilməsi” layihəsi çərçivəsində noyabrın 29-da Beynəlxalq Avrasiya Mətbuat Fondunda “Vətəndaş cəmiyyətinin inkişafı məqsədilə QHT-media əlaqələrinin gücləndirilməsi” mövzusunda tədbir keçirilib.

Milli Qeyri-Hökumət Təşkilatları Forumundan AZƏRTAC-a bildiriblər ki, MQF–nin prezidenti Rauf Zeyni layihə barədə məlumat verib. O qeyd edib ki, Azərbaycan Bakı-Tbilisi–Ceyhandan Bakı-Tbilisi-Qarsa qədər bir çox böyük layihələrə imza ataraq ölkənin inkişafını təmin edir. Bu gün biz də MQF olaraq bu layihəni həyata keçirərək vətəndaş cəmiyyətinə öz töhfəmizi veririk. Rauf Zeyni media və QHT əlaqələrinə toxunaraq bildirib ki, hazırda Ədliyyə Nazirliyində qeydiyyatdan 4000 QHT keçib. Lakin bunlardan 1000-ə qədəri media ilə birgə fəaliyyət göstərir, digərləri isə media ilə əlaqələrdə aktiv deyil.

Daha sonra “İki sahil” qəzetinin baş redaktoru Vüqar Rəhimzadə çıxış edib. O bildirib ki, MQF-nin təşəbbüsü və Dövlət Dəstəyi Şurasının dəstəyi ilə keçirilən layihə vətəndaş cəmiyyətinin mühüm tədbirlərindən biridir. Bu gün QHT-lərlə yanaşı, mətbuat orqanlarının sayı da artmaqdadır. Statistikaya əsasən, təkcə bir il ərzində 300-dən çox elektron media qeydiyyatdan keçib. Cəmi isə ümumi mətbuat orqanlarının sayı 6000-dir.

BAMF-ın sədri Umud Mirzəyev bu cür layihələrin həyata keçirilməsinin, eyni zamanda, QHT və media əlaqələrinin daim möhkəmlənməsinin vacibliyini vurğulayıb. O bildirib ki, QHT ilə media arasında münasibətin daha da inkişaf etməsi üçün müəyyən bir sistemləşmə olmalıdır: “Dövlətin QHT-lərə münasibətində bir sistemlilik yaranıb. QHT-lərə Dövlət Dəstəyi Şurası müxtəlif istiqamətlər üzrə QHT-lərin layihələrini maliyyələşdirir. O cümlədən Azərbaycanda fəaliyyət göstərən böyük şirkətlərin QHT-lərin layihələrinə qrant ayrılması prosesinə də cəlb edilməsinə başlanılıb və bu da təqdirəlayiq haldır. Əminəm ki, bundan sonra da QHT-lərlə media arasında sıx əməkdaşlıq davam edəcək. Cəmiyyətdə mövcud olan problemlərin QHT-lər və media vasitəsilə həlli, eyni zamanda, QHT-lərin özlərinin problemlərinin aradan qaldırılması yönündə daha böyük işlər görüləcək.

Tədbirdə çıxış edən Orta Asiya və Güney Qafqaz Söz Azadlığı Şəbəkəsinin sədri Azər Həsrət bildirib ki, media daim QHT-lərin üzünə açıqdır. Ümumilikdə qeyd edilən QHT sayına görə mediada aktiv olan QHT-lərin sayı azdır. Məsələnin bu yöndə olması ona görədir ki, QHT-lərin çoxu press relizlər yazmaqda, tədbirlər həyata keçirməkdə təcrübəsizdirlər. Bu halların qarşısının alınması üçün QHT-lərlə media arasında sıx görüşlər təşkil edərək, press reliz yazılması qaydalarını, tədbirlərin təşkil olunmasını onlara öyrətməyə ehtiyac var. A.Həsrət qeyd edib ki, Dövlət Dəstəyi Şurasının QHT-lərə ayırdığı vəsaitdən səmərəli istifadə olunaraq vətəndaş cəmiyyəti üçün əhəmiyyətli tədbirlər keçirilməlidir. Eyni zamanda, həyata keçirilən tədbirlərin xarici ölkələr tərəfindən məlumatlandırılması üçün ingiliscə paylaşılmasına, xəbərlərin video şəklində yayımlanmasına ehtiyac daha çoxdur.

Daha sonra iştirakçılardan ATXƏM-in nümayəndəsi İlqar İlkin, İİALD-ın nümayəndəsi Şahin Qurbanov, Azad Jurnalistlər Şəbəkəsinin sədri Ayaz Mirzəyev təcrübələrini iştirakçılarla bölüşərək, QHT media əlaqələrində üzə çıxan problemləri müzakirə ediblər.

Qeyd edək ki, tədbir MQF-nin bu il üzrə Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi “QHT-lərə institusional inkişaf sahəsində xidmətlərin göstərilməsi” layihəsinin sonuncu tədbiridir.