SİYASƏT


Beynəlxalq konfransda azərbaycanlılara qarşı törədilmiş soyqırımı aktları ilə bağlı müzakirələr aparılıb

Bakı, 30 mart, AZƏRTAC

Martın 29-da Avropa Azərbaycanlıları Konqresinin təşkilatçılığı ilə “Azərbaycanlılara qarşı soyqırımı və vandalizm aktlarına siyasi və hüquqi qiymət verilməsi istiqamətində Avropa məkanında səylərin konsolidasiyası” mövzusunda onlayn formatda beynəlxalq konfrans keçirilib.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Avropada fəaliyyət göstərən siyasi ekspertlərin, beynəlxalq jurnalistlərin, media qurumlarının rəhbərlərinin, Azərbaycanın Avropada fəaliyyət göstərən səfirlərinin, tanınmış siyasi xadimlərinin və ziyalıların iştirak etdiyi konfransa Milli Məclisin deputatları Musa Qasımlı, Rüfət Quliyev, Qənirə Paşayeva və Elman Nəsirov da qatılıblar.

Avropa Azərbaycanlıları Konqresinin prezidenti Sahil Qasımov Azərbaycan tarixinə bir çox şanlı səhifələrlə yanaşı, faciələrin və soyqırımların da həkk olunduğunu bildirib. Xüsusən son iki əsrdə erməni millətçilərinin Azərbaycan əhalisinə qarşı həyata keçirdikləri qanlı aksiyaların və soyqırımların miqyasının bilindiyindən daha çox olduğunu vurğulayan S.Qasımov ölkəmizin tarixinin müsibətlərlə dolu bu səhifələrinin dünyada və Avropada tanıdılmasının vacibliyinə toxunub.

Tədbirdə çıxış edən Musa Qasımlı ermənilərin Azərbaycanda törətdikləri soyqırımı və vandalizm aktlarının Azərbaycanda yaşayan digər bütün xalqlara qarşı da yönəldiyinin, onların xristian əhalini də kütləvi qırğına məruz qoymalarının tarixi mənbələrdə və arxiv materiallarında təsbit olunduğunu bildirib. Deputat ermənilərin soyqırımı və vandalizm siyasətini Azərbaycanda yaşayan bütün millətlərin və dini konfessiyaların məsələsi kimi dəyərləndirib.

Konfransda digər çıxış edənlər də iki yüz ildən artıqdır erməni millətçiləri tərəfindən xalqımıza qarşı həyata keçirilən etnik təmizləmə, deportasiya və soyqırımı cinayətləri, xüsusilə 1918-ci ilin mart-aprel aylarında erməni-daşnak silahlı dəstələri tərəfindən Bakıda, Qubada və digər məntəqələrdə azərbaycanlı əhalini qətliamlara məruz qoyması barədə danışıblar.

Tədbir iştirakçıları azərbaycanlılara qarşı həyata keçirilən soyqırımı və vandalizm aktlarına Avropa məkanında siyasi və hüquqi qiymətin verilməsinə nail olmaq üçün səylərin birləşdirilməsinin vacibliyini vurğulayıblar.

Konfrans iştirakçıları Ermənistanın Azərbaycan torpaqlarının işğal zamanı və işğalda saxladığı 30 ilə yaxın müddətdə həm azərbaycanlılara qarşı, həm də Azərbaycanın maddi-mədəni, tarixi abidələrinə, mədəni nümunələrinə qarşı törətdiyi soyqırımının miqyasından ürək ağrısı ilə söz açıblar. Onlar Azərbaycanın 44 günlük Vətən müharibəsini Zəfərlə başa çatdıraraq torpaqlarını erməni işğalçılarından azad etməsinin regionda davamlı sülhə və gələcək inkişafa möhkəm zəmin yaratdığını vurğulayıblar. Bu yeni imkanlardan bütün region ölkələrinin tam yararlanması üçün ilk növbədə, Ermənistanın revanşist cəhdlərdən, təxribatlardan, ən əsası faşist ideologiyasından əl çəkməsinin vacibliyini qeyd ediblər.

Tədbirdə çıxış edənlər sözügedən soyqırımı və vandalizm aktlarına siyasi-hüquqi qiymətin verilməsi üçün bu sahədə aparılan tədqiqatların dərinləşdirilməsinin, həqiqətin üzə çıxarılması istiqamətində səylərin, maarifləndirici materialların və tədbirlərin artırılmasının vacibliyini qeyd ediblər.

Konfransda Azərbaycanın Belçika Krallığı və Lüksemburq Böyük Hersoqluğundakı səfiri Fuad İsgəndərov, ölkəmizin Ukraynadakı səfiri Elmira Axundova, Diasporla İş üzrə Dövlət Komitəsinin sədr müavini Vaqif Seyidbəyli və digər rəsmi şəxslər də iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.