CƏMİYYƏT
Beynəlxalq təşkilatlar həmvətənlərimizə qarşı ermənilərin törətdiyi təxribatlara ədalətli hüquqi qiymət verməlidirlər
Bakı, 27 iyul, AZƏRTAC
Son vaxtlar xarici ölkələrdəki Azərbaycan diplomatik nümayəndəliklərinə, eləcə də Ermənistanın işğalçı siyasətinə qarşı etiraz aksiyası keçirən soydaşlarımıza qarşı yönəlmiş erməni təxribatları artmaqdadır. Ermənilər tərəfindən həyata keçirilən bu təxribatlar ilk dəfə deyil. Tarixin ən müxtəlif zamanlarında Azərbaycan xalqı ermənilərin təzyiq və zorakılığına məruz qalıb, çoxsaylı amansız soyqırımlarla qarşılaşıb.
AZƏRTAC xəbər verir ki, bunu Azərbaycan Respublikası Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib.
Polkovnik deyib ki, son bir həftədə xarici ölkələrdə baş verən hadisələr də ermənilərin tarixi məkrli siyasətlərindən əl çəkmədiyini göstərir. Bu baxımdan baş verənlər bir əsrdən çox tarixi olan erməni terror və təxribatçılıq siyasətinin davamı sayıla bilər. Bu təxribatlar bir daha sübut edir ki, ermənilər bu gün də təcavüzkar, aqressiv siyasətlərini xaricdəki soydaşlarımıza təzyiq göstərməkdə, zorakılıq sərgiləməklə davam edirlər.
Dünyada mövcud olan erməni terror təşkilatları sadəcə Azərbaycan və türk dövlətləri üçün deyil, bütün dünya üçün böyük təhlükə mənbəyidir. Odur ki, bütün beynəlxalq təşkilatların, aparıcı dövlətlərin bu terror təşkilatlarını nəzarətə götürməsinə, onların zərərsizləşdirilməsi istiqamətində ciddi addımlar atmasına ehtiyac var. Ermənilərin diplomatlara qarşı terror və zorakılıq siyasətinin tarixi ötən əsrdən başlayır. Hələ XX əsrin 70-80-ci illərində ermənilər dünyanın bir sıra ölkələrində türk diplomatlarına qarşı çoxsaylı terror aktları həyata keçirib.
C.Xəlilov qeyd edib ki, bu gün Azərbaycanın xaricdəki diplomatik binalarının da təxribatlara məruz qalması daha ciddi mətləblərdən xəbər verir. Ermənilərin heç bir zorakılıq və terror aktından çəkinmədiyini nəzərə alsaq, xaricdəki diplomatik nümayəndəliklərimizin daha etibarlı şəkildə qorunmasına ehtiyac var.
Müvafiq beynəlxalq təşkilatların ermənilərin xaricdəki soydaşlarımıza qarşı kütləvi zorakılıqlar fonunda susması arzuedilməzdir. Artıq bir həftədən çoxdur ki, xaric ölkələrdə yaşayan həmvətənlərimizə qarşı davam edən erməni təxribatları ilə bağlı heç bir beynəlxalq təşkilat qəti bəyanatla çıxış etməyib. Halbuki, onların vəzifəsi insan hüquqlarını qorumaq, insanların təhlükəsizliyinin, azadlığının keşiyində durmaqdır. Beynəlxalq təşkilatların bu susqunluğu onların ikili yanaşma və siyasətinin göstəricisidir və bunu şiddətlə qınayır, onları vəzifələrini vicdan və məsuliyyətlə yerinə yetirməyə çağırırıq.
“Baş verən son hadisələr bir daha sübut etdi ki, Azərbaycan dövləti dünyanın harasında yaşamasından asılı olmayaraq, hər bir soydaşımızın taleyinə həssaslıqla yanaşır və onların üzləşdiyi problemlərə görə narahatlıq keçirir. Birinci vitse-prezident Mehriban Əliyeva da ABŞ-ın Los-Anceles şəhərində və bəzi Avropa ölkələrinin paytaxtlarında baş vermiş hadisələrlə bağlı həmvətənlərimizə müraciət edib, ermənilərin zorakı, qeyri-insani davranışlarını kəskin şəkildə pisləyib, beynəlxalq təşkilatları bu hadisələri ədalətli şəkildə qiymətləndirməyə səsləyib. Xaricdəki soydaşlarımızın üzləşdiyi təxribat və zorakılıqlar hazırda dövlətimizin diqqət mərkəzindədir. İnanıram ki, xaricdəki erməni təxribatları onların təcavüzkar xislətinin ifşası ilə nəticələnəcək və dünya Azərbaycanın haqlı mövqeyinə növbəti dəfə şahid olacaq”, - deyə polkovnik C.Xəlilov vurğulayıb.