Bakı, 30 oktyabr, Səadət Hakıyeva, AZƏRTAC

Təcavüzkar və işğalçı Ermənistan Azərbaycanın mülki əhalisini və yaşayış məntəqələrini atəşə tutmaqla intensiv terror aktları həyata keçirməkdədir. Ermənistan ordusu beynəlxalq səviyyədə qadağan olunmuş döyüş sursatları tətbiq etməklə oktyabrın 28-də Azərbaycanın Bərdə şəhərini bombardmana məruz qoyub. Düşmənin hücumu nəticəsində azı 21 mülki şəxs həlak olub, 70 nəfər isə yaralanıb. Təəssüflər olsun ki, Ermənistanın törətdiyi terror aktları ilə bağlı dünya ictimaiyyətinin adi bir reaksiyası müşahidə olunmurdu. Bir çox hallarda bir sıra beynəlxalq təşkilatlar növbətçi bəyanatlar səsləndirməklə işlərini bitmiş hesab edirdilər. Başqa sözlə desək, təcavüzə uğramış tərəflə təcavüzkar arasında fərq qoyulmurdu. Təbii ki, törətdiyi qanunsuz əməllərə görə cəzalandırılmayan Ermənistan daha quduzlaşaraq cızığından çıxdı. İşğalçı ölkənin terrorçuluğa xidmət edən hərəkətləri artmağa başladı. Baş verənlər göstərir ki, dövlət siyasətinin əsasında terrorçuluq duran Ermənistan nəinki Azərbaycan üçün, bütün dünya üçün təhlükə mənbəyidir. İndi bəziləri anlayırlar ki, bu ölkənin əməlləri bəşəri dəyərlərə, bəşəriyyətə, insanlığa qarşı yönəlib.

Bu fikirləri AZƏRTAC-a açıqlamasında Milli Məclisin deputatı, siyasi elmlər doktoru Elşad Mirbəşiroğlu bildirib.

Deputat diqqətə çatdırıb ki, Ermənistanın Azərbaycanın mülki əhalisinə qarşı törətdiyi cinayətlər və bunun fonunda işğalçı ölkənin cəzasızlığı digərləri üçün təhlükəli presedent yaradır. Ermənistanın Azərbaycanın mülki əhalisinə qarşı törətdiyi qətliam beynəlxalq təhlükəsizlik sisteminə vurulan ciddi zərbədir. “Belə olan halda, dünya ictimaiyyəti Ermənistanın terrora xidmət edən hərəkətlərinə reaksiya vermək məcburiyyətində qalır. Çünki bu ölkənin Gəncədə, Bərdədə, Tərtərdə törətdiyi əməllər bəşəriyyətə qarşı yönələn cinayətdir. İndiyədək Qarabağ münaqişəsi ilə bağlı obyektiv mövqe nümayiş etdirməyən bir çox beynəlxalq təşkilatlar da artıq Ermənistanın terror aktları ilə bağlı fikir bildirirlər. Bu təşkilatlardan “Human Rights Watch” və “Amnesty İnternational”ın adlarını qeyd etmək olar. Həmin təşkilatlar Ermənistanın Azərbaycanın dinc sakinlərinə qarşı kasetli bombalardan istifadə etməsini, dinc insanların ölümünə səbəb olmasını pisləyib”.

E.Mirbəşiroğlu qeyd edib ki, nəhayət, “Human Rights Watch” və “Amnesty İnternational” təşkilatları öz susqunlarını pozdular. Deputatın sözlərinə görə, insan hüquqlarında toxunulmazlıqdan danışan və bunu həyat amalı seçən təşkilatların rəhbərləri artıq anladılar ki, subyektiv, qərəzli mövqe nümayiş etdirmək əvəzinə, doğruları görmək və demək lazımdır.

Ermənistanın əməllərinin təhlükəlilik dərəcəsi o yerə çatıb ki, adıçəkilən təşkilatlar obyektiv mövqe nümayiş etdirməkdən başqa çarələrinin qalmadığını görürlər. Burada söhbət həm də beynəlxalq nüfuzdan gedir.

Ermənistanın bəşəriyyətə qarşı yönələn cinayət əməlləri artıq bütün dünyanı narahat edir. Ermənistanın əməllərini qınayan subyektlərin sayı durmadan artmaqdadır. AŞPA-nın Miqrasiya, qaçqınlar və məcburi köçkünlər komitəsi tərəfindən də Ermənistanın cinayət əməllərini pisləyən bəyanat qəbul edilib.

“Artıq dünya ölkələrinin əksəriyyəti, bir çox beynəlxalq təşkilatlar Qarabağ münaqişəsi ilə bağlı dolğun məlumata malikdirlər. Eyni zamanda, son bir ayda Gəncədə, Bərdədə, Tərtərdə baş verənlər Ermənistanın təcavüzkar və terrorçu dövlət olduğunu bir daha ortaya qoydu. Baş verənlərlə bağlı həqiqətləri dünyaya çatdırmaq Azərbaycanın diplomatiya və informasiya sahələrində apardığı məqsədyönlü fəaliyyətin nəticəsidir və mühüm strateji əhəmiyyətə malikdir. Bu uğurları Azərbaycan Ordusu döyüş meydanında tamamlayır. Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə çox qısa müddət ərzində böyük uğurlara imza atmışıq və uğurlarımız davam edir. Münaqişənin nizama salınmasının yalnız Azərbaycanın ərazi bütövlüyü çərçivəsində mümkün olduğunu dünyaya sübut etdik”, - deyə Elşad Mirbəşiroğlu fikirlərini yekunlaşdırıb.