İQTİSADİYYAT


Bəzi yollarda tıxac və ləngimələrin aradan qaldırılması istiqamətində yenidənqurma işləri yekunlaşıb VİDEO

Bakı, 7 iyun, AZƏRTAC

Sıxlıq və tıxacların aradan qaldırılması məqsədilə Bakı–Quba–Rusiya Federasiyası ilə dövlət sərhədi avtomobil yolunun 16-cı kilometrində, "VAZ dairəsi" kimi adlanan ərazidə yerləşən yol qovşağında, həmçinin Saray-Novxanı yolunda aparılan yenidənqurma işləri artıq yekunlaşıb.

Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən AZƏRTAC-a bildirilib ki, yenidənqurma işləri çərçivəsində paytaxt istiqamətindən yol qovşağına qalxan yolda, həmçinin Novxanı qəsəbəsindən gələn yolun dairədən Sumqayıt istiqamətinə düşən hissəsində genişləndirmə işləri aparılıb, yeni yol hissəsi yaradılıb. Bunun üçün ərazidə tikinti altına düşən maneələrin köçürülməsi, qazma-dolma işləri, yeni yol yatağının və yol əsasının tikintisi işləri icra olunub.

Daha sonra yeni yol hissəsinə iri və xırda dənəli olmaqla asfalt-beton örtüyü döşənib. Asfaltlanma işləri yol ötürücüsünə qalxan və düşən digər istiqamətdəki yollarda da aparılıb. Bununla ərazidə nəqliyyat vasitələrinin sərbəst və fasiləsiz hərəkəti də təmin edilib.

Bundan başqa, Novxanı qəsəbəsi, eləcə də Xırdalan şəhəri istiqamətində yol ötürücüsü üzərində mövcud hər iki dairənin həndəsi ölçüləri kiçildilərək yeri dəyişdirilib, ətrafına təhlükəsizliyi təmin etmək üçün yeni dəmir-beton maneələr qoyulub. Yol ötürücüsünün özündə dayanıqlığı artırmaq məqsədilə alt hissədə olmaqla yeni istinad divarları inşa edilib.

Günün pik saatlarında yaranan sıxlıq və tıxacın aradan qaldırılması üçün Saray qəsəbəsinə giriş hissədə olan yolun da genişləndirməsi işləri aparılıb. Sözügedən ərazinin zəruri hissəsində yeni yol yatağı və yol əsası inşa edilib, asfaltlanma işləri görülüb. Saray-Novxanı yolunda təmirə ehtiyacı olan 180 metrlik yol sahəsində təmir işləri başa çatdırılıb, yol ayrıcına yeni səki daşları düzülüb, yolboyu müasir işıqlandırma sistemi quraşdırılıb.

Həmçinin son mərhələ üzrə yenidənqurma işlərinin aparıldığı ərazidə hərəkət üstünlüyünü müəyyənləşdirən məlumatverici, göstərici və digər müvafiq yol nişanları quraşdırılıb, lazımi nişanlama xətləri çəkilib və hər bir istiqamət üzrə 3 hərəkət zolağı təşkil olunmaqla Saray-Novxanı yolunda da nəqliyyat vasitələrinin təhlükəsiz və sərbəst hərəkətinə şərait yaradılıb.

Bütün işlər mövcud “İnşaat Norma və Qaydaları”nın tələblərinə əsasən aparılıb. Ümumilikdə, qeyd edilən ərazilərdə hərəkət intensivliyi və yay fəslinin gəlməsi ilə əlaqədar olaraq Saray, Novxanı və bu istiqamətdə yerləşən qəsəbələrə gediş-gəlişin artacağı nəzərə alınaraq görülmüş işlər yarana biləcək tıxacların qarşısının alınmasını təmin etməyə imkan verəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.