İQTİSADİYYAT


“Big Data”nın əsas elmi istiqamətləri üzrə Azərbaycanda araşdırmalar aparılır

Bakı, 10 mart, AZƏRTAC

39 milyon tədqiqatçı, 17 milyon məqalə arasında “Arnetminer” elmi sosial şəbəkəsi tərəfindən aparılmış araşdırmalara əsasən, kompyuter elmləri sahəsində fəal tədqiq olunan əsas elmi istiqamətlər - verilənlərin intellektual analizi (Data Mining), maşın təlimi (Machine Learning), sosial şəbəkə (Social Network), dərin təlim (Deep Learning) müəyyənləşdirilib.

Rabitə və Yüksək Texnologiyalar Nazirliyindən AZƏRTAC-a bildiriblər ki, AMEA İnformasiya Texnologiyaları İnstitutunda (İTİ) “Big Data”nın qeyd olunan istiqamətlərindən hər biri ilə bağlı araşdırmalar aparılır. Bu fikri İTİ-nin növbəti elmi seminarında institutun şöbə müdiri, texnika elmləri doktoru Ramiz Alıquliyev bildirib. İnstitutdan qeyd edilib ki, “Big Data” texnologiyalarının elmi-nəzəri problemləri haqqında məruzə ilə çıxış edən natiq bu sahədə mövcud texnologiyalar, metodlar və alqoritmlərin köməyilə toplanılması, saxlanılması, analizi və vizuallaşdırılması çətin və ya mümkün olmayan verilənlər çoxluğu, eləcə də “Big Data”nın mövcud problemləri, əsas istiqamətləri, gətirdiyi imkanlardan söz açıb.

Alim 2015-ci ilin ən yüksək strateji texnologiyaları haqqında məlumat verərək bu texnologiyalar sırasında “Hər yerdə hesablama”, “Əşyaların İnterneti”, “3D çap”, “Mükəmməl, mobil, görünməz analitika”, “Kontekst cəhətdən zəngin sistemlər”, “Ağıllı” maşınlar”, “Bulud/kliyent arxitektur”, “Proqramla müəyyən olunan infrastruktur və tətbiqlər”, “Veb miqyaslı informasiya texnologiyaları” və “Riskin qiymətləndirilməsinə əsaslanan təhlükəsizlik və özünü mühafizə”nin yer aldığını deyib.

Məruzəçi verilənlərin toplanması və saxlanılması, ötürülməsi, aşkarlanması, axtarışı, keyfiyyətinin təmin olunması, təkrar istifadəsi, analizi və vizuallaşdırılması kimi “Big Data” problemlərinə kommersiya və biznes, elmi tədqiqatlar və digər sahələrdə rast gəlindiyini söyləyib.

R. Alıquliyev “Big Data Mining” metodları və texnologiyaları, bu sahədə mövcud problemlər, “Big Data” sistemlərinin layihələndirilməsinin əsas prinsipləri, böyük verilənlərin araşdırılması istiqamətində fəaliyyət göstərən elmi mərkəzlər, tədqiqatçılar, nəşr olunan jurnallar, kitablar və keçirilən konfranslar, “Big Data” məhsulları istehsal edən şirkətlər haqqında da məlumat verib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.