Biləsuvar, 25 sentyabr, İsmayıl Cəfərli, AZƏRTAC

Biləsuvarda pambığın kütləvi yığımına başlanılıb. Son illər bu sahəyə göstərilən yüksək dövlət qayğısı Biləsuvarı ölkənin pambıqçılıq rayonları arasında qabaqcıl təcrübənin ünvanına çevirib. Builki mövsümdə fermerlər 10 min 500 hektara yaxın sahədə bol məhsul yetişdiriblər.

AZƏRTAC xəbər verir ki, ötən il rayon pambıqçıları “ağ qızıl”dan 15 milyon manata yaxın gəlir əldə ediblər. Bundan əlavə, fermerlərə həm də toplanmış məhsula görə 2 milyon manatdan çox subsidiya verilib. Becərmə işlərinin yüksək aqrotexniki tələblər səviyyəsində aparılmasının nəticəsidir ki, hazırda tarlalarda bol məhsul var. Böyük zəhmət bahasına yetişdirilmiş bol məhsulu tez və itkisiz yığmaq üçün rayon Dövlət Aqrar İnkişaf Mərkəzinin nəzarəti ilə bütün qüvvələr səfərbər edilib. Fermerlərin builki hədəfi 35 sentnerə yaxın məhsuldarlıq əldə etməkdir. Sahələrdə əsasən Türkiyədən gətirilmiş yüksək məhsuldar pambıq sortları əkilib. Bu sortların özəllikləri zərərvericilərə qarşı davamlılığı, eləcə də, becərmə prosesində suya tələbatının az olmasıdır.

Bu il “MKT İstehsalat Kommersiya” MMC-nin Biləsuvar filialı pambıq əkini üçün 900 fermerlə müqavilə bağlayıb. Yığım mövsümünədək fermerlərə becərmə işlərinə görə 3 milyon 120 min manat avans verilib.

Filialın direktoru Qulamhüseyn Əliyev deyib: “Ötən il biz 3350 hektar sahədə pambıq əkmişdik, hədəfimiz yüksək nəticə göstərmək idi. Bu hədəfə buna nail olduq. Hər hektardan 28 sentner pambıq yığıb təhvil verdik. Bu il isə əkin sahəsini genişləndirərək 4100 hektara çatdırmışıq. Yeni hədəfimiz 30 sentner və ondan da yüksək məhsuldarlığa nail olmaqdır. Sahələrdə məhsul boldur. Hədəfimizə nail olub, növbəti dəfə yüksək nəticə göstrərəcəyik”.

Kənd Təsərrüfatı Nazirliyinin şöbə müdiri Vüqar Hüseynov bildirib ki, Azərbaycanda bu il 20 rayonda 100 min hektar sahədə pambıq əkilib. Pambıqçılara həsr olunan müşavirələrdə qeyd olunduğu kimi, bu il tarlalarda məhsul kifayət qədər bol olacaq.

Vüqar Hüseynov, həmçinin əlavə edib ki, dövlət pambıq əkini zamanı sahələrə verilən gübrənin qiymətinin 70 faizini subsidiyalaşdırır, fermerlər gübrəni dəyərin yalnız 30 faizini ödəməklə əldə edirlər. Hazırda istehsalçıların tədarükçülərə təhvil verdikləri xam pambığın hər 1 kiloqramına (kondisiya çəkisində) görə 0,1 manat subsidiya ödənilir: “Ötən ilin sonunda Prezident İlham Əliyevin tövsiyə və tapşırıqları əsasında Kənd Təsərrüfatı Nazirliyi və İqtisadiyyat Nazirliyinin emal müəssisələri ilə keçirdikləri görüş nəticəsində pambığın alış qiyməti artırıldı. Bundan başqa, dövlət pambıqçılıqda bütün sahələrə, o cümlədən becərmənin bütün mərhələlərinə subsidiya verir. Bu gün demək olar ki, nəticə etibarilə pambıqçılıq ölkədə ən gəlirli kənd təsərrüfatı sahələrindən birinə çevrilib”.

Qeyd edək ki, ölkəmizdə pambıqçılığın yeni inkişaf dövrü 2016-cı ildən başlayıb. 2016-cı ildə əkin sahələri 2,7 dəfə artırılaraq 51,4 min hektara, pambıq istehsalı isə 2,5 dəfə artaraq 89,4 min tona çatdırılıb. Azərbaycanın müstəqillik dövründə ən çox pambıq istehsalı isə 2018-ci ildə qeydə alınıb. Ötən il ölkə üzrə sahələrdən 230,4 min ton xam pambıq yığılıb. 2018-ci ildə Azərbaycanda 132,5 min hektar sahədə pambıq əkilib, 2019-cu ildə pambıq əkini sahələrinin həcmi məhsuldarlığı az olan torpaqların əkin dövriyyəsindən çıxarılması hesabına 100,1 min hektaradək azaldılıb. Bu addım pambıqçılıqda orta məhsuldarlığı artırmağa, pambıq əkini dövriyyəsindən çıxarılmış torpaqları daha səmərəli istifadə etməyə imkan verəcək.