ELM VƏ TƏHSİL


Bilik Fondu 10-cu Bilik Evini açdı

Bakı, 30 oktyabr, AZƏRTAC

Oktyabrın 30-da Azərbaycan Respublikasının Prezidenti yanında Bilik Fondunun növbəti Bilik Evi Ağsu rayonunda fəaliyyətə başladı.

Fonddan AZƏRTAC-a bildirilib ki, Ağsu Rayon İcra Hakimiyyətinin dəstəyi ilə rayonun Heydər Əliyev Mərkəzində fəaliyyət göstərəcək Bilik Evinin açılış mərasimindən öncə icra hakimiyyətində görüş olub.

Ağsu Rayon İcra Hakimiyyətinin başçısı Ənvər Seyidəliyev bildirib ki, Azərbaycan Prezidenti İlham Əliyevin rəhbərliyi ilə ölkədə aparılan daxili və xarici siyasətin mahiyyətinin yerlərdə əhaliyə dəqiq və dolğun çatdırılmasına, milli-mənəvi dəyərlərin təbliğinə, gənclərin müasir dövrün tələblərinə uyğun formalaşması istiqamətində maariflənməsinə ehtiyac var. Bu səbəbdən rayonda Bilik Evinin fəaliyyəti məqsədəuyğundur və yerli rəsmi qurumlar maarifləndirici layihələrin icrasında Fonda dəstək olmağa hazırdır.

Bilik Fondunun icraçı direktoru Oktay Səmədov rəhbərlik etdiyi qurumun ölkə ərazisində həyata keçirdiyi layihələrdən danışaraq, Bilik evlərinin açılmasını bu yöndə atılan əhəmiyyətli addım kimi qiymətləndirib. Hazırda Nardaran, İsmayıllı, Oğuz, Qax, Ağdaş, Şəmkir, Astara Bilik evlərinin, Qarabağ və Ağstafa regional Bilik evlərinin fəaliyyət göstərdiyini xatırladan icraçı direktor növbəti maarif ocağının Ağsuda açılmasından məmnun olduğunu bildirib.

Açılış mərasimindən sonra Fondun icraçı direktoru yerli ictimaiyyət nümayəndələri ilə görüşüb, rəsmi qurumların təmsilçiləri, təhsil işçiləri, jurnalistlər və fəal gənclərin iştirakı ilə keçirilən tədbirdə çıxış edib.

Ağsu Rayon İcra Hakimiyyəti başçısının müavini Sevil Mirzəliyeva tədbiri açaraq, gələcəyin məhz bilikli insanlar tərəfindən qurulacağına, maarifçilərin bu yolda sərf etdikləri əməyin bəhrə verəcəyinə əminliyini bildirib.

Rayondakı Heydər Əliyev Mərkəzinin direktoru Reyhanə Tacızadə çıxışında Bilik Fondu ilə əməkdaşlığın perspektivlərinə toxunub.

Göstərilən diqqətə görə rayon rəhbərliyinə minnətdarlığını bildirən Oktay Səmədov bilikli cəmiyyətin daim inkişafa meyilli olduğunu vurğulayıb, gənclərə sürətlə dəyişən dünyanın müasir çağırışlarına cavab verəcək səviyyədə hazırlıqlı olmağı tövsiyə edib.

İcraçı direktor Bakıda, Heydər Əliyev Mərkəzində “Yeni dünya və yeni insan formalaşdıraq: kreativlik və insan inkişafı” mövzusunda keçirilmiş VI Bakı Beynəlxalq Humanitar Forumunun açılış mərasimində Azərbaycan Prezidenti İlham Əliyevin çıxışında söylədiyi fikirləri xatırladıb. Bildirib ki, iqtisadi baxımdan dayanıqlı, siyasi mənada stabil, sosial təminatlı bir ölkədə neft kapitalının insan kapitalına çevrilməsi vacibdir və yeni yaradılan Bilik Evinin fəaliyyəti əsasən bu istiqamətdə qurulacaq.

Rayon ziyalılarını Bilik Evinə dəstək verməyə çağıran O.Səmədov ictimaiyyətin bütün təbəqələrinin birgə səyi nəticəsində böyük nəticələr əldə etməyin mümkünlüyündən danışıb.

Digər çıxış edənlər rayonda yeni maarifçilik ocağının fəaliyyətə başlamasını böyük ruh yüksəkliyi ilə qarşıladıqlarını vurğulayıb, yerli sakinlərin Bilik Evi vasitəsilə maarifləndirilməsi işinə töhfə verməyə hazır olduqlarını qeyd ediblər.

Bilik Fondunun nümayəndələri Bilik Evi ilə tanış olub, yeni məkana zəruri avadanlıq verib, Heydər Əliyev Mərkəzinə kitablar hədiyyə ediblər.

Bilik Evində kitabxana fondunun yaradılması, elmi biliklərin müxtəlif sahələri üzrə mühazirələrin təşkili, tələbata uyğun təlim kursları və dərnəklərin açılması barədə ilkin fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.