Bakı, 15 mart, AZƏRTAC

Azərbaycan Respublikasının Prezidenti yanında Bilik Fondu Prezident İlham Əliyevin “2018-ci ilin Azərbaycan Respublikasında “Azərbaycan Xalq Cümhuriyyəti İli” elan edilməsi haqqında və “1918-ci il azərbaycanlıların soyqırımının 100 illiyi haqqında” imzaladığı müvafiq sərəncamlardan irəli gələrək silsilə tədbirlərini davam etdirir.

Bilik Fondundan AZƏRTAC-a bildirilib ki, Salyan rayon Peşə Liseyində təşkil olunan tədbirdə bu təhsil ocağının direktoru fond ilə əməkdaşlıq çərçivəsində görülən işlərdən danışıb.

Sonra Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunun baş elmi işçisi Xuraman Hümmətova “Cümhuriyyət dövründə ədəbiyyat” mövzusunda mühazirə oxuyub.

Cümhuriyyətin tarixi, yaranma şəraiti, həmin dövrdəki ədəbiyyatın əsas məqsəd və vəzifələri barədə məlumat verən məruzəçi M.Ə.Rəsulzadə, M.B.Məmmədzadə, Ə.Hüseynzadə, Ə.Cavad və A.İldırımın həyat və fəaliyyətlərindən bəhs edib.

X.Hümmətova qeyd edib ki, Azərbaycan Xalq Cümhuriyyəti dövründə yaranan ədəbiyyat M.F.Axundov, N.Nərimanov, F.Köçərli, S.Ə.Şirvani, N.Vəzirov, Ə.Haqverdiyev və başqa ədiblərimiz tərəfindən əsası qoyulan ənənələrdən güc alıb. Bunun qayəsində “dövlətdən və milli dövlətçilik şüurundan qiymətli heç nə yoxdur” ideyası durur.

Məruzəçi sonda Cümhuriyyət dövründə yaşayıb yaradan sənətkarlar və onların əsərləri haqqında tələbələrə ətraflı məlumat verib, vətənpəvərlik, əzmkarlıq hissi ilə yaşamağın ən gözəl həyat yolu olduğunu deyib.

Şabran rayonu Gəndov kənd klubunda “Şabran-Quba bölgəsində bolşevik və erməni-daşnak dəstələrinə qarşı mübarizə” mövzusunda da mühazirə təşkil olunub.

Şabran şəhər T.Abbasov adına 1 nömrəli tam orta məktəbin direktoru, Bilik Fondunun rayon nümayəndəsi Fikrət Şamxalov mühazirəsində tarixi faktlar əsasında bolşeviklərin və erməni-daşnak dəstələrinin həyata keçirdikləri vandalizm aktlarından danışıb.

Binəqədi rayonundakı İctimai İaşə və Xidmət üzrə Bakı Dövlət Peşə Təhsil Mərkəzində “Şərq” qəzetinin baş redaktoru, filologiya üzrə fəlsəfə doktoru Akif Aşırlının mühazirəsi “Azərbaycan Xalq Cümhuriyyəti dövrü mətbuatında azərbaycanlıların soyqırımının əks olunması” mövzusuna həsr olunub.

Şərqdə ilk müstəqil ölkədə qurulan mətbuatın fəaliyyətindən bəhs edən mühazirəçi soyqırımı hadisələrinin işıqlandırılmasının nə qədər ağır olduğunu diqqətə çatdırıb. Bildirilib ki, bu çətinliyə baxmayaraq, mətbuat cəmiyyəti informasiya ilə təmin edə bildi və bu gün araşdırmalarda həmin mənbələrə istinad olunur.

Turizm və Sosial Xidmətlər üzrə Bakı Dövlət Peşə Təhsil Mərkəzində maarifləndirici mühazirə Bakı Dövlət Universitetinin sosial elmlər və psixologiya fakültəsinin fəlsəfə kafedrasının dosenti Hüseyn Məmmədov tərəfindən aparılıb. “Azərbaycan Xalq Cümhuriyyətinin qurulmasının tarixi əhəmiyyəti” mövzusunda oxunan mühazirədə dinləyicilərə dövrün tarixi həqiqətləri faktlarla izah olunub. Vurğulanıb ki, Cümhuriyyət qurucuları şəraiti vaxtında dəyərləndirməyi bacarıblar. Bu bacarıq onların Vətənə olan sevgisindən və siyasi fəhmlərinin genişliyindən irəli gəlib.

“Üzeyir Hacıbəyli və Azərbaycan Xalq Cümhuriyyəti” mövzusunda tədbir isə böyük bəstəkarın adını daşıyan ev muzeyində təşkil olunub.

Tədbirdə Bilik Fondunun lektorlar qrupunun üzvü, professor Solmaz Amanova Üzeyir Hacıbəylinin yaradıcılığından, Cümhuriyyət dövründəki yazıçılıq fəaliyyətindən danışıb.